Prybytak Ryanair uźlacieŭ na 40% dziakujučy niežadańniu jeŭrapiejcaŭ latać u ZŠA
Łaŭkostar Ryanair paviedamiŭ pra rezki rost prybytku ŭ pieršaj pałovie finansavaha hoda. Avijakampanija tłumačyć vydatnyja vyniki źmienaj turystyčnych pavodzin jeŭrapiejcaŭ, jakija ŭsio čaściej vybirajuć miascovy adpačynak zamiest padarožžaŭ praz Atłantyku.
Jak piša Financial Times, z krasavika pa vierasień prybytak avijakampanii dasiahnuŭ 2,89 miljarda jeŭra ŭ paraŭnańni z 2,06 miljarda jeŭra za anałahičny pieryjad letaś. Ahulnaja vyručka vyrasła na 13%, skłaŭšy 9,82 miljarda jeŭra.
Pa słovach kiraŭnika hrupy Ryanair Majkła O'Liry, asnoŭnym ruchavikom rostu stała «niežadańnie» jeŭrapiejcaŭ pravodzić adpačynak u Złučanych Štatach.
«Transatłantyčnyja pieravozki, ceny na jakija rezka rastuć, byli vielmi abmiežavanyja hetym letam. Usio bolš siemjaŭ zastajucca doma i pravodziać adpačynak u Jeŭropie, asabliva ŭ Mižziemnamorji», — adznačyŭ O'Liry.
Dziakujučy rostu popytu i bolš rańniaj, čym čakałasia, pastaŭcy niekatorych samalotaŭ Boeing 737 Max 8, kampanija Ryanair pavialičyła svoj hadavy prahnoz pasažyrapatoku z 206 miljonaŭ da 207 miljonaŭ čałaviek. Novyja samaloty dazvolać łaŭkostaru dadać mahutnaści ŭ zimovy pieryjad, u tym liku na Kalady i Novy hod.
Pavodle słoŭ O'Liry, kampanija taksama spadziajecca atrymać vyhadu ad padzieńnia cen na naftu i vahańniaŭ kursu dalara ZŠA. Jana zastrachavała košt paliva na nastupny hod pa canie nižej za 67 dalaraŭ za barel, u paraŭnańni z 76 dalarami, jakija jana płacić u hetym hodzie. Heta dazvolić zekanomić kala 650 miljonaŭ jeŭra na vydatkach na paliva.
Adnak O'Liry padkreśliŭ, što hetyja srodki buduć vykarystany nie dla nieadkładnaha źnižeńnia cen na kvitki, a dla papaŭnieńnia hrašovych reziervaŭ na vypadak nastupnaha hłabalnaha šoku (naprykład, novaj pandemii abo ekanamičnaha spadu).
Dziakujučy pastaŭkam novych samalotaŭ i mocnamu popytu, O'Liry ŭpeŭnieny, što ŭ nastupnyja vosiem hadoŭ avijakampanija pavialičyć hadavy pasažyrapatok da 300 miljonaŭ čałaviek.
Ciapier čytajuć
Vyzvaleny palitviazień Mikita Jemialjanaŭ, jakoha aryštavali jašče ŭ 2019 hodzie, 19‑hadovym3
Vyzvaleny palitviazień Mikita Jemialjanaŭ, jakoha aryštavali jašče ŭ 2019 hodzie, 19‑hadovym
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary