Bankrutuje lizinhavaja kampanija, jakaja kaliści ŭvachodziła ŭ piaciorku najbujniejšych na rynku
Ekanamičny sud Minska pačaŭ praceduru bankructva ŭ dačynieńni da kampanii «Premjerlizinh», jakaja ŭvachodziła ŭ top-5 lizinhavych arhanizacyj krainy. Pradpryjemstva isnavała z 1998 hoda i było adnym ź pieršych u hetaj halinie. Jano taksama viadomaje tym, što inviestavała ŭ budaŭnictva Turaŭskaha małočnaha kambinata i stvaryła łahistyčny kompleks «Dvaccać čatyry» ŭ Tabarach Minskaha rajona, piša Office Life.
Pavodle acenki kampanii «IPM-Kansałt acenka», aktyvy «Premjerlizinha» składajuć kala 27,3 miljona rubloŭ, u tym liku 1,5 miljona — srodki na rachunkach i bolš za 5 miljonaŭ — debitorskaja zapazyčanaść, jakaja moža być prablemnaj. Pry hetym ahulnyja zapazyčanaści pierad kredytorami — amal 35 miljonaŭ rubloŭ.
Sud nie pahadziŭsia z arhumientami tych, chto śćviardžaŭ, što majomaść była zanižanaja pry acency. Razhlad spravy pa sutnaści pryznačany na 11 lutaha 2026 hoda.
U apošnija dva hady kampanija pracavała sa stratami kala 2,4 miljona rubloŭ u hod, a z červienia 2025 hoda była vyklučanaja Nacbankam z rejestra lizinhavych arhanizacyj. Akcyjaniery jašče ŭ mai pryniali rašeńnie pra jaje likvidacyju.
Najbolšaha pośpiechu kampanija dasiahnuła ŭ 2008—2013 hadach, kali była adnym ź lidaraŭ rynku nieruchomaści i zajmała druhoje miesca pa abjomach ułasnaha kapitału.
Kamientary