Našto błohierki praktykujucca ŭ «słavianskim pozirku»? Usio pačałosia ź Miełanii Tramp
Apošni miesiac u tyktoku raźlacielisia videa, dzie błohierki z roznych krain z suvorym vyhladam pryžmurvajuć vočy na kamieru. Robiać jany heta, kab paŭtaryć słavianski pozirk (slavic stare) — miehapapularny miem apošniaha času.
Usio pačałosia jašče ŭ sakaviku 2025-ha. Trend naradziŭsia dziakujučy pieršaj łedzi ZŠA Miełanii Tramp, čyj strohi pozirk pryciahnuŭ uvahu sieciva.
Užo tady tyktokierki pačali zdymać videa sa svaimi sprobami paŭtaryć pozirk Miełanii. Šmat chto ź ich žartuje, što dziakujučy takomu pozirku možna znajści sabie bahataha muža — maŭlaŭ, jakraz heta i ŭdałosia ciapierašniaj pieršaj łedzi.
Pakolki Miełanija naradziłasia ŭ Słavienii, trend nazvali slavic stare, to-bok słavianski pozirk. Važna, što ŭ anhlijskaj movie dla hetaha vybrali słova stare — to-bok havorka nie pra zvyčajny pohlad, a kali čałaviek uhladajecca pilna, kali jon utaropiŭsia na niekaha.
Bolš za ŭsio rolikaŭ sa «słavianskim pozirkam» źjaviłasia ŭ apošni miesiac. Siarod ich jość tłumačalnyja videa pra toje, jak zrabić taki pozirk. Niekatoryja ź ich davoli padrabiaznyja:
«Pierš za ŭsio vam treba padumać pra niešta surjoznaje. Padumajcie pra niešta, što zdaryłasia z vami ŭ minułym, niešta takoje. A potym rassłabcie ŭsie muskuły na vašym tvary, dazvolcie im rassłabicca. Naprykład, kali vy ŭśmichajeciesia, nie napružvajcie nijakija muskuły».
Nie ŭsie, adnak, zhodnyja, što možna asvoić słavianski pozirk, kali ty nie maješ słavianskich hienaŭ. «Navat nie viedaju, čamu vy ŭsie sprabujecie jaho paŭtaryć, bo adzinyja ludzi, chto sapraŭdy moža zrabić słavianski pozirk — heta nasamreč słavianie, chto žyŭ słavianskim žyćciom», — miarkuje adna z błohierak.
Błohierka Nastaśsia Kaściuhova taksama źniała videa pra słavianski pozirk. Dziaŭčyna ličyć, što zachodniki niapravilna zrazumieli sutnaść trenda i zabłytalisia pamiž dvuma vidami pozirkaŭ.
Na dumku Nastaśsi, pozirk Miełanii Tramp — heta nie prosta niaŭśmiešlivy vyraz tvaru, charakterny dla słavian. Heta jašče i trochi pahroźlivy pozirk z pryžmuravańniem.
Slavic stare — heta jašče i nahoda pairaniziravać sa znakamitaj słavianskaj rysy: šmat chto z nas nie lubić uśmichacca biez nahody. Pryčym naša vonkavaja panuraść nie aznačaje, što my sumujem ci žurymsia.
Niekatoryja błohiery jašče i tłumačać zamiežnikam, čamu ŭ słavian taki ciažki pozirk, a zaadno i čamu my tak redka ŭśmichajemsia. Naprykład, slavic_diva kaža:
«Śmiech biez pryčyny — znak duračyny. Tak byli vychavanyja maje baćki, babuli i dziaduli, i tak jany vychavali mianie. U zachodnich krainach, asabliva ŭ ZŠA, uśmieška — heta znak dobrazyčlivaści i biaśpieki. Va Uschodniaj Jeŭropie ŭśmiešku biez pryčyny ŭsprymajuć jak falšyvuju, niebiaśpiečnuju, padazronuju i manipulatyŭnuju, a ŭ bolšaści vypadkaŭ prosta jak durnuju».
Heta nie adziny virusny žart pra pozirk u apošni čas, bo jašče bahata ź ich źviazanyja z aktrysaj Sidni Suini. Amierykanka trapiła na intervju, dzie jaje staranna raspytvali pra skandał vakoł rekłamy džynsaŭ American Eagle. Nahadajem, što kampanija była pabudavanaja na suhučnaści słovaŭ «good jeans / good genes» (dobryja džynsy / dobryja hieny), i za ŭdzieł u joj Suini abvinavacili ŭ rasiźmie.
Toje, jak dziaŭčyna adreahavała na pytańni pra rekłamu, jakraz paraŭnoŭvajuć sa słavianskim pozirkam — maŭlaŭ, Suini heta dobra ŭdałosia.
Sydney Sweeney clocks it during a GQ interview.
«Naša Niva» — bastyjon biełaruščyny
PADTRYMAĆČamu chamieleony kruciać vačyma va ŭsie baki? Navukoŭcy rastłumačyli tajamnicu «fatahrafičnaha» pozirku
«Praz pakaleńnie ŭ Afrycy budzie naradžacca pałova ŭsich dziaciej śvietu». Čamu Paŭdniovaja Kareja vymiraje i čym cikavy prykład Izraila
Top-5 žančyn biełaruskaj emihracyi pa viersii Kanstancina Kavieryna
Kamientary