Staršynia asacyjacyi litoŭskich pieravozčykaŭ nazvaŭ Biełaruś «terarystyčnaj dziaržavaj»

Napružanaść u adnosinach Biełarusi i Litvy nie spadaje paśla sieryi hibrydnych atak ź biełaruskaj terytoryi.

Ministr zamiežnych spraŭ Biełarusi Maksim Ryžankoŭ 12 listapada zajaviŭ pra hatoŭnaść da pieramoŭ u luby momant, na luboj terytoryi i biez papiarednich umoŭ. Adnak 1100 litoŭskich hruzavikoŭ zastajucca, faktyčna, aryštavanyja ŭ Biełarusi. Heta było zroblena minskimi ŭładami ŭ adkaz na zakryćcio Litvoj aŭtamabilnych pahranpierachodaŭ na miažy ź Biełaruśsiu.

U svaju čarhu, zakryćcio pierachodaŭ stała asimietryčnym adazam na masiravanyja vylety mietearałahičnych šaroŭ z terytoryi Biełarusi. Vilni praz heta daviałosia šmatkroć zakryvać aeraport. Ničoha takoha z boku Litvy ŭ Biełaruś nikoli nie lacieła, jak nie zalatali i bieśpiłotniki — a zaloty i ich z terytoryi Biełarusi mieli miesca niekalki razoŭ.

Prezident Nacyjanalnaj asacyjacyi aŭtapieravozčykaŭ Linava Erłandas Mikienas zajaviŭ u intervju LRT, što nie vyklučaje, što tyja kiroŭcy, jakija zastalisia ŭ Litvie, mohuć zabłakavać darohi ŭ znak pratestu.

Paśla taho, jak Litva na viedamasnym uzroŭni ŭ paniadziełak uviečary paŭtorna źviarnułasia da Minska z prośbaj adkryć pamiežnyja punkty Miedniki i Salečniki dla litoŭskich pieravozčykaŭ, Mikienas nie vieryć, što Biełaruś dazvolić im viarnucca dadomu. Jon ličyć, što ŭrad Litvy niedaacaniŭ mahčymuju reakcyju Biełarusi.

«Nie budziem śmiešnymi i nie budziem na niešta spadziavacca. Viedajučy mientalitet takich terarystyčnych dziaržaŭ, nie varta čakać nijakich sastupak. Pakul miaža nie budzie adkrytaja — hruzaviki nie vyjeduć», — zajaviŭ Mikienas u kamientary dla BNS.

«Ja całkam upeŭnieny, što tyja transpartnyja srodki, jakija nie pajeduć na stajanki, buduć kanfiskavanyja», — skazaŭ Mikienas.

Pa słovach ministra Ryžankova, «kali litoŭski bok sapraŭdy hatovy zachoŭvać intaresy svaich hramadzian, sapraŭdy hatovy vybudoŭvać svaje dziejańni ŭ adpaviednaści z patrebami i patrabavańniami tych pradprymalnikaŭ, jakija ŭ ciapierašni čas pakutujuć ad hetych adnabakovych mier Litoŭskaj Respubliki, to jon u najbližejšy čas pazityŭna adkaža na našy prapanovy», «miery pavinny ŭ siabie ŭklučać ceły kompleks palityčnych i dypłamatyčnych rašeńniaŭ».

Havorka pra rašeńni, «jakija nakiravanyja … na jak maha chutčejšaje ŭrehulavańnie situacyi i adnaŭleńnie narmalnaha funkcyjanavańnia našaj miažy ŭ intaresach hramadzian abiedźviuch krain», — dadaŭ Maksim Ryžankoŭ.

11 listapada ministru zamiežnych spraŭ Biełarusi Maksimu Ryžankovu daručana pačać pieramovy ź litoŭskimi kalehami. Alaksandr Łukašenka pastaviŭ zadaču narmalizavać situacyju na miažy i damovicca pra adkryćcio punktaŭ propusku. Udzielničać u arhanizacyi pieramovaŭ budzie i kiraŭnik Rady biaśpieki Alaksandr Valfovič.

Faktyčna heta pryznańnie taho, što pytańnie nie źjaŭlajecca čysta ekanamičnym.

Litva zakryła miažu da 30 listapada z-za pavietranych šaroŭ, jakija zapuskali ź Biełarusi. U adkaz biełaruskija ŭłady zabłakavali 1100 litoŭskich hruzavikoŭ.

Spačatku biełaruskija ŚMI nazyvali ličbu «da 5000 litoŭskich hruzavikoŭ». U realnaści kolkaść akazałasia mienšaj.

Alaksandr Łukašenka zahadaŭ brać ź litoŭskich dalnabojščykaŭ pa 120 jeŭra za sutki na stajancy, a ŭ tych, chto nie budzie płacić, zabirać mašyny. Takim čynam, havorka pra 132 tysiačy jeŭra za sutki. Za pieršyja 11 dzion listapada, takim čynam, litoŭskim pieravozčykam daviadziecca zapłacić amal paŭtara miljona jeŭra. Kali zakryćcio miažy raściahniecca na miesiac, suma vyraście da 4 miljonaŭ jeŭra.

Ahułam ža ŭ zakładzie apynułasia majomaść na salidnuju sumu. Pa infarmacyi litoŭskaha Žinių radijas, siaredni košt litoŭskaha vielikahruza składaje prykładana 110 tysiač jeŭra. Heta značyć, havorka pra majomaść koštam prykładna 120 miljonaŭ jeŭra.

Praŭda, jašče pytańnie, jakaja častka z tych faktyčna biez suda aryštavanych transpartnych srodkaŭ naležyć ułasna litoŭskim kampanijam, a jakaja — biełaruskim ułaśnikam, što majuć firmy ŭ Litvie. Takaja praktyka stała masavaj paśla 2022 hoda, kali ŭ adkaz na napad Rasii na Ukrainu, jaki adbyŭsia z vykarystańniem terytoryi Biełarusi i z łahistyčnaj dy infarmacyjnaj padtrymkaj režymu Łukašenki, Jeŭrasajuz zabaraniŭ ruch hruzavikoŭ na rasijskaj i biełaruskaj rehistracyi. Statystyki nie isnuje, ale nie vyklučana, što vialikaja častka zabłakavanych mašyn — biełaruskich pryvatnych ułaśnikaŭ.

Pakul Asacyjacyja aŭtapieravozčykaŭ Litvy Linava razhladaje mahčymaść praviadzieńnia akcyj pratestu ŭ Litvie i Brusieli, ministr unutranych spraŭ Litvy Uładzisłaŭ Kandratovič ličyć, što bolš łahičnym krokam było b pravieści ich u Biełarusi, jakaja nie vypuskaje fury. «Biełaruś zakryvaje, ale pratestujem u Litvie. Ja dumaju, jany mahli b pratestavać i ŭ Biełarusi. Heta nie my ich nie vypuskajem, a biełarusy nie vypuskajuć, tamu pratestavać tam było b dla ich łahičnym i pravilnym krokam», — zajaviŭ Kandratovič žurnalistam u sieradu.

• 4
• 0
• 3
• 7
• 0
• 1
• 0
• 0