Kolki litoŭskich fur zabłakavana ŭ Biełarusi i jakaja cana pytańnia

11 listapada ministru zamiežnych spraŭ Biełarusi Maksimu Ryžankovu daručana pačać pieramovy ź litoŭskimi kalehami. Alaksandr Łukašenka pastaviŭ zadaču narmalizavać situacyju na miažy i damovicca pra adkryćcio punktaŭ propusku. Udzielničać u arhanizacyi pieramovaŭ budzie i kiraŭnik Rady biaśpieki Alaksandr Valfovič.

Faktyčna heta pryznańnie taho, što pytańnie nie źjaŭlajecca čysta ekanamičnym.

Litva zakryła miažu da 30 listapada z-za pavietranych šaroŭ, jakija zapuskali ź Biełarusi. U adkaz biełaruskija ŭłady zabłakavali 1100 litoŭskich hruzavikoŭ.

Spačatku biełaruskija ŚMI nazyvali ličbu «da 5000 litoŭskich hruzavikoŭ». U realnaści kolkaść akazałasia mienšaj.

Alaksandr Łukašenka zahadaŭ brać ź litoŭskich dalnabojščykaŭ pa 120 jeŭra za sutki na stajancy, a ŭ tych, chto nie budzie płacić, zabirać mašyny. Takim čynam, havorka pra 132 tysiačy jeŭra za sutki. Za pieršyja 11 dzion listapada, takim čynam, litoŭskim pieravozčykam daviadziecca zapłacić amal paŭtara miljona jeŭra. Kali zakryćcio miažy raściahniecca na miesiac, suma vyraście da 4 miljonaŭ jeŭra.

Jasna, što litoŭskaja asacyjacyja pieravozčykaŭ bje tryvohu. Prezident Nacyjanalnaj asacyjacyi aŭtapieravozčykaŭ Linava Erłandas Mikienas zajaviŭ u intervju LRT, što nie vyklučaje, što tyja kiroŭcy, jakija zastalisia ŭ Litvie, mohuć zabłakavać darohi ŭ znak pratestu.

Paśla taho, jak Litva na viedamasnym uzroŭni ŭ paniadziełak uviečary paŭtorna źviarnułasia da Minska z prośbaj adkryć pamiežnyja punkty Miedniki i Salečniki dla litoŭskich pieravozčykaŭ, Mikienas nie vieryć, što Biełaruś dazvolić im viarnucca dadomu. «Nie budziem śmiešnyja i nie budziem na niešta spadziavacca. Viedajučy mientalitet takich terarystyčnych dziaržaŭ, nie varta čakać nijakich sastupak. Pakul miaža nie budzie adkryta — hruzaviki nie vyjeduć», — zajaviŭ Mikienas u kamientary dla BNS.

«Ja całkam upeŭnieny, što tyja transpartnyja srodki, jakija nie pajeduć na stajanki, buduć kanfiskavanyja», — skazaŭ Mikienas.

Ahułam ža ŭ zakładzie apynułasia majomaść na salidnuju sumu. Pa infarmacyi litoŭskaha Žinių radijas, siaredni košt litoŭskaha vielikahruza składaje prykładana 110 tysiač jeŭra. Heta značyć, havorka pra majomaść koštam prykładna 120 miljonaŭ jeŭra.

Praŭda, jašče pytańnie, jakaja častka z tych faktyčna biez suda aryštavanych transpartnych srodkaŭ naležyć ułasna litoŭskim kampanijaj, a jakaja — biełaruskim ułaśnikam, jakija majuć firmy ŭ Litvie. Takaja praktyka stała masavaj paśla 2022 hoda, kali ŭ adkaz na napad Rasii na Ukrainu, jaki adbyŭsia z vykarystańniem terytoryi Biełarusi i z łahistyčnaj dy infarmacyjnaj padtrymkaj režymu Łukašenki, Jeŭrasajuz zabaraniŭ ruch hruzavikoŭ na rasijskaj i biełaruskaj rehistracyi. Statystyki nie isnuje, ale nie vyklučana, što vialikaja častka zabłakavanych mašyn — biełaruskich pryvatnych ułaśnikaŭ.

U vypadku dalejšaj eskałacyi situacyi Litva moža być vymušanaja ŭ jakaści miery apošniaj instancyi całkam spynić tranzit biełaruskich hruzaŭ. Heta, adnak, niavyhadna pieradusim dla samoj Litvy, jakaja na tym tranzicie zarablaje salidnyja hrošy.

Ale i łukašenkaŭski bok nie moža nie razumieć, što ryzykuje stracić na kanflikcie našmat bolš. Sama situacyja, jak i raniejšaje zakryćcio miažy Polščaj, znoŭ stavić pytańnie pra nadziejnaść biełaruskaha transpartnaha kalidora. Ściahnuŭšy niekalki miljonaŭ za zabłakavanyja fury, Biełaruś ryzykuje stracić dziasiatki ci navat sotni miljonaŭ — maštab ciažka acanić napierad, — kali tranzit praz krainu źmienšycca. Niepramyja straty taksama niemałyja: prablemy ź pierasiačeńniem miažy, jak i napružanaść na miežach, spryjajuć adtoku pracoŭnych siły, kapitału i pavyšajuć niedavier da krainy ŭ cełym.

Čytajcie taksama: Maštaby, jakich vy nie mahli sabie ŭjavić — biełaruskija cyharety kurać u mnohich krainach Jeŭropy. Jak pracuje hety biznes

Raniej biełaruskija ŭłady anałahična błakavali na stajankach hruzaviki z polskaj rehistracyjaj. 1453 polskija fury apynulisia ŭ zakładnikach u vieraśni 2025 hoda, kali miažu zakryvała Polšča. Paśla adkryćcia miažy im było dazvolena svabodna ruchacca.

Pavialičyć

Punkty propusku na miažy byli zakrytyja Litvoju ŭ adkaz na masavyja zaloty ź Biełarusi pavietranych šaroŭ z kantrabandaju. Praź ich uźnikała pahroza hramadzianskaj avijacyi, zakryvalisia aeraporty, paciarpieli niekalki dziasiatkaŭ tysiač pasažyraŭ. Vilnia ličyć heta hibrydnymi atakami, za jakimi stajać minskija ŭłady. Reč u tym, što vytvorčaść i handal tytuniovymi vyrabami ŭ Biełarusi całkam kantralujujecca dziaržavaj i niekalkimi biznesoŭcami, nabližanymi da siamji Alaksandra Łukašenki.

U kanałach «Našaj Nivy» ŭ tyktoku, šortsach i instahramie, asabliva ruskamoŭnych, učora i siońnia my zafiksavali tysiačy kamientaŭ, jakija my identyfikujem jak ad maskva– i łukacentryčnych bot-sietak. Samyja raspaŭsiudžanyja pasłańni: «Baćka, padtrymlivajem», «Baćka krasava», «Akazvajecca, u hetuju hulniu možna hulać udvuch», «Heta pomsta za biełaruskija pažarnyja mašyny», «Pravilna, tak Litvie i treba». Iranična, što apošniaje pasłańnie raspaŭsiudžvali navat boty ź litoŭskimi nikami, jakija pišuć na litoŭskaj movie.

• 2
• 0
• 0
• 1
• 0
• 0
• 3
• 0