Ukrainskija vojski adstupili ź niekalkich nasielenych punktaŭ na paŭdniovym uschodzie Zaparožskaj vobłaści, dzie praciahvajecca nastup rasijskich vojskaŭ.
Pavodle paviedamleńniaŭ kamandavańnia Sił abarony Poŭdnia, ukrainskija vajskoŭcy pieramiaścilisia na «bolš vyhadnyja pazicyi, kab zachavać žyćcio asabovaha składu». U Kijevie padkreślivajuć, što dalejšaje prasoŭvańnie rasijskich vojskaŭ u hetym rajonie spyniena, adnak bai pa-raniejšamu viaducca vielmi ciažkija.
Asabliva napružanaja situacyja zachoŭvajecca na alaksandraŭskim i hulajpolskim kirunkach. Tam rasijskaja armija nanosić masiravanyja ŭdary i viadzie šturmavyja dziejańni kala nasielenych punktaŭ Pryvolnaje, Zialony Haj, Raŭnapolle, Paŭłaŭka, Varanoje, Stepavaje i Navapaŭłaŭskaje.
Prajekt DeepState paviedamiŭ, što rasijskaj armii ŭdałosia akupavać adrazu dva siała — Novaje i Navaŭśpienaŭku, a taksama zachapić novyja terytoryi kala siołaŭ Sałodkaje, Raŭnapolle i Jabłykava. Da paŭnočnych uskrain Hulajpola armii RF zastajecca ŭsiaho 7 kiłamietraŭ.
Hałoŭnakamandujučy Uzbrojenych sił Ukrainy Alaksandr Syrski paviedamiŭ, što situacyja na ŭschodzie vobłaści «značna pahoršyłasia». Pa jaho słovach, praciŭnik, majučy pieravahu ŭ kolkaści ludziej i techniki, u žorstkich bajach zdoleŭ prasunucca i zaniać try nasielenyja punkty. Jon taksama adznačyŭ, što rasijskija vojski vykarystoŭvajuć ščylny tuman, kab pranikać pamiž ukrainskimi pazicyjami.
Na hetym fonie ŭłady Ukrainy abviaścili pra abaviazkovuju evakuacyju siemjaŭ ź dziećmi z pasiołka Małakaciarynaŭka ŭ Zaparožskaj vobłaści. Žycharam rajać nie adkładać vyjezd i vykonvać ukazańni słužbaŭ, bo hałoŭnaja meta — biaśpieka ludziej.
Evakuacyja arhanizavanaja taksama ŭ pryfrantavym horadzie Hulajpole. Pavodle miascovaj administracyi, ciapier u horadzie zastałosia mienš za 500 čałaviek z amal 12,8 tysiačy, jakija žyli tam da pačatku poŭnamaštabnaha ŭvarvańnia Rasii ŭ 2022 hodzie.
DeepState staŭ fiksavać prasoŭvańnie armii Rasii na poŭnač ad Hulajpola pryblizna z 5 listapada — z tych časoŭ rasijanie pieraadoleli pryblizna 10 kiłamietraŭ. Ukrainski Hienštab ranicaj 12 listapada paviedamiŭ pra 23 ataki na alaksandraŭskim i 3‑ch — na susiednim hulajpolskim — za minułyja sutki.
Rasijskija vojski zaniali čatyry siały pad Zaparožžam, pahroza navisła nad horadam Hulajpole
«Heta sapraŭdnaja niebiaśpieka dla Ukrainy». Va USU raście kolkaść vypadkaŭ samavołak i deziercirstva
Źjaviłasia VIDEA ŭjezdu rasijskich vajskoŭcaŭ u Pakroŭsk
Prychavanaje praniknieńnie: jakija źmieny ŭ taktycy rasijskaj armii pakazaŭ šturm Pakroŭska?
Kamientary