Prychavanaje praniknieńnie: jakija źmieny ŭ taktycy rasijskaj armii pakazaŭ šturm Pakroŭska?

U chodzie bajoŭ za Pakroŭsk ukrainskija vojski jak minimum dvojčy sutyknulisia ź niepryjemnymi siurpryzami.

Spačatku ŭ žniŭni rasijskija čaści ździejśnili raptoŭny kidok na poŭnač ad horada, u napramku Dabrapolla, ukliniŭšysia va ŭkrainskija pazicyi adrazu na 10 i bolš kiłamietraŭ. A ŭ kastryčniku raptam vyśvietliłasia, što rasijskaja piachota, asobnyja padraździaleńni jakoj jašče letam byli zaŭvažanyja na paŭdniova-zachodnich uskrainach Pakroŭska, zdoleła praniknuć u bolšuju častku haradskich rajonaŭ, i mnohija ŭkrainskija pazicyi faktyčna apynulisia ŭ tyle ŭ rasijan.

Padobnaja situacyja skłałasia i ŭ Kupiansku Charkaŭskaj vobłaści, dzie rasijskija šturmavyja hrupy nieprykmietna pratačylisia ŭ centralnuju častku horada i zaviazali tam bai.

U čym asablivaść novaj taktyki rasijskaj armii i ci zmohuć USU joj supraćstajać?

U ahulnych rysach pryjom infiltracyi ŭjaŭlaje saboj schavanaje praniknieńnie nievialikich šturmavych hrup u tył pieradavym padraździaleńniam USU, ukryćcio, zamacavańnie i nazapašvańnie sił u haradskoj zabudovie z nastupnaj dezarhanizacyjaj ŭkrainskaj abarony i jaje materyjalna-techničnaha zabieśpiačeńnia.

Na spravie heta składany praces, jaki patrabuje dbajnaj padrychtoŭki i piśmiennaha ŭzajemadziejańnia. Jak adznačaje ŭkrainski vajskovy ekśpiert Kanstancin Mašaviec, płanavańnie i arhanizacyja bajavych dziejańniaŭ u rasijskaj armii za čas vajny evalucyjanavali, i ŭjaŭleńnie pra toje, što rasijanie praciskajuć abaronu USU vyklučna za košt šmatrazovaj pieravahi ŭ žyvoj sile i «miasnych šturmaŭ», pamyłkovaje.

«Usie pamiatajuć šturmy rasijskimi vojskami Bachmuta i Aŭdziejeŭki, Tarecka i Časavaha Jara. Jak jany byli arhanizavanyja rasijskim kamandavańniem, jak adbyvalisia ŭ realnaści i čaho im kaštavali. Ale paraŭnajcie heta z tym, što ciapier adbyvajecca ŭ Kupiansku i Pakroŭsku. Paraŭnajcie mietady i pryjomy, jakija vykarystoŭvajucca rasijskim kamandavańniem na taktyčnym uzroŭni ciapier, z tymi, jakija jany vykarystoŭvali raniej», — piša jon.

Usiudy ŭsio pa-roznamu

Va ŭmovach kolkasnaj pieravahi rasijskaj armii ŭkrainskaje kamandavańnie zrabiła staŭku na masiravanaje prymianieńnie bieśpiłotnych sistem. Za košt nasyčeńnia pałasy abarony ŭdarnymi i raźviedvalnymi dronami na mnohich učastkach frontu ŭźnikli tak zvanyja kił-zony, dzie luboje pierasoŭvańnie piachoty i techniki praciŭnika chutka vyjaŭlajecca i pa ich nanosicca ŭdar. Anałahičnym čynam staŭ dziejničać i rasijski bok.

Uźnikła situacyja, kali padraździaleńni, jakija atrymali zahad ab pierachodzie ŭ ataku, pačynali nieści vialikija straty jašče na etapie vysoŭvańnia, heta značyć nie mahli navat zblizicca z pazicyjami praciŭnika. Braniatechniku i srodki ahniavoj padtrymki davodzicca trymać daloka ŭ tyle, efiektyŭnaść šturmavych dziejańniaŭ rezka źniziłasia.

U bolšaj stupieni heta ŭdaryła pa rasijskaj armii, pakolki jana vałodaje inicyjatyvaj, a palityčnaje kiraŭnictva patrabuje ad jaje praciahu aktyŭnych nastupalnych dziejańniaŭ. Rasijskaje kamandavańnie šukała sposaby ŭzłomu abarony USU i aktyŭna ekśpierymientavała.

Dla pieraadoleńnia kił-zony z najmienšymi stratami jano źmianiała taktyku dziejańniaŭ šturmavych hrup i srodki maskiroŭki, abstaloŭvała ich lohkamatornymi srodkami pieramiaščeńnia — matacykłami, kvadracykłami, bahi, mapiedami i navat samakatami, vykarystoŭvała srodki REB i ŭłasnyja bieśpiłotniki.

Paralelna vyvučalisia asablivaści ŭkrainskaj abarony — typy bieśpiłotnikaŭ, jakija vykarystoŭvajucca, pracoŭnyja častoty i kanały, čas reahavańnia, mietady ŭzajemadziejańnia i sistemy bajavoha kiravańnia, skład, kolkaść, łakacyja i bajazdolnaść padraździaleńniaŭ, sposaby ich zabieśpiačeńnia.

Pavialičyć

U vyniku rasijskaje vajskovaje kiraŭnictva pryjšło da razumieńnia, što dla efiektyŭnaha ŭzłomvańnia abarony USU nieabchodna, pa-pieršaje, dezarhanizavać abo vybić padraździaleńni, jakija prymianiajuć taktyčnyja BPŁA na abranym kirunku, a zaadno paralizavać sistemy kiravańnia i zabieśpiačeńnia «dronavodaŭ».

Pa-druhoje, rasijskaje kamandavańnie vyrašyła skarystacca niedachopam asabovaha składu ŭ pieradavych padraździaleńniach USU i najaŭnaściu istotnych pramiežkaŭ u bajavych paradkach na taktyčnym uzroŭni.

Ale prosta tak abyści ŭkrainskija apornyja punkty i pratačycca ŭ tył małymi piachotnymi hrupami niedastatkova, tym bolš kali treba budzie vieści bai ŭ ščylnaj haradskoj zabudovie.

Pavialičyć

Kanstancin Mašaviec padzialaje taktyčny pryjom pa infiltracyi, uziaty na ŭzbrajeńnie rasijskaj armijaj, na try asnoŭnyja elemienty: padrychtoŭčy, praktyčny i etap zamacavańnia dy raźvićcia pośpiechu.

Padrychtoŭčy etap

Na pieršym etapie, naroŭni z płanavańniem, arhanizacyjaj, navučańniem i abstalavańniem šturmavych padraździaleńniaŭ, viadziecca vyvučeńnie sistemy abarony USU. Z dapamohaj radyjotechničnaj, kaśmičnaj raźviedki, a taksama raźviedvalnych BPŁA vyjaŭlajucca najbolš uraźlivyja i krytyčnyja dla abarony ŭčastki miascovaści, asnoŭnyja šlachi i punkty zabieśpiačeńnia i evakuacyi ŭkrainskich padraździaleńniaŭ.

Hałoŭnaj cellu padčas padrychtoŭki masiravanaha praniknieńnia stanoviacca padraździaleńni i hrupy taktyčnych BPŁA ŭkrainskich vojskaŭ, jakija mohuć źniščyć lubuju hrupu, jakaja prarvałasia, i sarvać raptoŭnuju ataku na aporny punkt abo pazicyju.

Napiaredadni apieracyi na abranym kirunku zvyčajna pačynajuć intensiŭna pracavać artyleryja, avijacyja, sistemy BPŁA i REB, a časam aktyŭna dziejničajuć dyviersijna-raźviedvalnyja hrupy, jakija, jak kaža Mašaviec, «pavinny stvaryć, pahłybić i pašyryć […] svojeasablivy prałom u abaronie USU dla nastupnaj infiltracyi inšych małych piachotnych hrup».

Zvyčajna dla hetaha vybirajecca najbolš słaby aporny punkt abo pazicyja USU — naprykład, tam, dzie mała asabovaha składu, nizki maralny duch, daŭno nie było ratacyi, drennaje zabieśpiačeńnie, abmiežavany ahlad i h. d.

Taktyka dziejańniaŭ prostaja — prychavanaje zbližeńnie, vychad na pazicyju i raptoŭnaje praviadzieńnie nalotu na aporny punkt, pazicyju z metaj ich zachopu. Va ŭmovach ščylnaj haradskoj zabudovy rasijskija šturmaviki mohuć pranikać u bajavyja paradki, maskirujučysia pad mirnych žycharoŭ abo pad vajskoŭcaŭ USU.

Praktyčny etap

Na hetym etapie rasijski bok imkniecca stvaryć niekantralavany pieradavymi padraździaleńniami USU ŭčastak miascovaści, kab praź jaho zavieści ŭhłyb abarony małyja piachotnyja hrupy ŭ značnaj kolkaści. Zvyčajna hetyja hrupy dziejničajuć davoli sinchronna i ŭzhodniena.

«Pa maich asabistych uražańniach, hałoŭnaj pieršasnaj metaj takoha rodu dziejańniaŭ małych/šturmavych hrup praciŭnika praktyčna zaŭsiody jość tak zvanaja «chaatyzacyja» sistemy abarony USU na abranym kirunku, učastku, a nie miechaničnaje pratočvańnie dziela samoha pratočvańnia ŭ lubym mahčymym kirunku, dla taho kab niejki razumnik zafarbavaŭ na karcie paru lišnich piksielaŭ», —adznačaje Mašaviec.

Rasijskija šturmavyja hrupy, jakija prakralisia ŭ tył abo na fłanhi USU, dziejničajuć pa adpracavanaj schiemie — znachodziać chovanki, abstalujuć zamaskavanyja pazicyi, naładžvajuć zabieśpiačeńnie, časta z dapamohaj dronaŭ. A pa miery zamacavańnia i nazapašvańnia siłaŭ pačynajuć aktyŭna dziejničać, addajučy pieravahu prychavanamu prasoŭvańniu ŭ ciomny čas sutak.

U pieršuju čarhu jany imknucca atakavać punkty kiravańnia i pazicyi apierataraŭ BPŁA, a taksama padraździaleńniaŭ USU, jakija arhanizujuć zabieśpiačeńnie i ratacyju asabovaha składu na pieradavych pazicyjach. Čaściej za ŭsio vykarystoŭvajecca zasadny mietad z abstrełami z tyłu i fłanhaŭ, a taksama chutkija i raptoŭnyja naloty.

Etap zamacavańnia i raźvićcia pośpiechu

Jon zaklučajecca ŭ prasoŭvańni asnoŭnych rasijskich sił na złučeńnie z padraździaleńniami, jakija pratačylisia praz ukrainskija pazicyi, kali rasijskaje kamandavańnie paličyć, što sistema abarony USU na hetym kirunku dastatkova dezarhanizavanaja.

Zamacavać pośpiech atrymlivajecca nie zaŭsiody, i daloka nie ŭsim piechacincam, jakija prarvalisia, atrymlivajecca vyžyć, dačakaŭšysia padmacavańnia.

Naprykład, u Časavym Jary, dzie małyja šturmavyja atrady rasijskaj dyvizii PDV nie zdoleli hłyboka ŭklinicca va ŭkrainskija bajavyja paradki, jaje hałoŭnyja siły panieśli ciažkija straty. Na Dabrapolskim kirunku na poŭnač ad Pakroŭska, dzie rasijskija šturmaviki zdoleli chutka prasunucca amal na 15 kiłamietraŭ, im taksama nie ŭdałosia damahčysia pośpiechu — ukraincy padciahnuli reziervy, i ciapier ad taho płacdarma ničoha nie zastałosia.

A voś u samym Pakroŭsku, jak i ŭ Kupiansku, rasijskim vojskam udałosia skarystacca słabymi miescami va ŭkrainskaj abaronie. U vyniku ŭ hetych haradach USU znachodziacca ŭ ciažkim stanoviščy.

Tym nie mienš, Kanstancin Mašaviec ličyć užyvany rasijskim kamandavańniem taktyčny pryjom pa infiltracyi časovym rašeńniem, jaki daje efiekt tolki pry šturmie rajonaŭ abarony USU, jakija abapirajucca na bolš ci mienš bujnyja nasielenyja punkty. Heta značyć, va ŭmovach ščylnaj haradskoj zabudovy, dzie najaŭnaść šmatlikich chovanak i mahčymaść nieprykmietna pieramiaščacca ź miesca na miesca daje hrupam, jakija pratačylisia, šancy na vyžyvańnie.

«Va ŭmovach vialikich i małych adkrytych prastor jaho efiektyŭnaść vyhladaje, skažam tak, davoli sprečnaj. Choć, viadoma, byvali i vyklučeńni», — piša ŭkrainski ekśpiert.

• 0
• 1
• 0
• 0
• 1
• 3
• 2
• 0