Eks-kamandzir Pałka Kalinoŭskaha Pavieł Šurmiej pakinuŭ pasadu i zajaviŭ, što padraździaleńnie ŭžo nie źjaŭlajecca pałkom pa kolkaści
U intervju «Lusterku» jon taksama pryznaŭ, što pa kolkaści bajcoŭ padraździaleńnie ŭžo nie adpaviadaje statusu pałka. Ciapier kiraŭnictva farmiravańniem pierajšło da kalehijalnaha orhana — Rady kamandziraŭ, a sam Šurmiej budzie zajmacca jaho palityčnym pradstaŭnictvam.
Na pytańnie, ci źjaŭlajecca PKK pałkom pa kolkaści vajskoŭcaŭ, jakoje moža składać ad niekalkich sotniaŭ da niekalkich tysiač čałaviek, Pavieł Šurmiej adkazaŭ admoŭna.
— Ja adkažu: nie. I, kali ŭžo viartacca ŭ historyju, heta (toje, što padraździaleńnie nazvali pałkom) była praca na pierśpiektyvu. Nu, jak jość, tak jość, — zajaviŭ jon.
Pavieł Šurmiej rastłumačyŭ, što pakinuŭ pasadu kamandzira ŭ ramkach strukturnych źmien. Ciapier kiravańnie pałkom ažyćciaŭlaje Rada kamandziraŭ, jakaja, pavodle jaho słoŭ, isnavała i raniej, ale zaraz jaje rola stała publičnaj.
— Rada — heta ŭsie kamandziry bajavych padraździaleńniaŭ. Niekatoryja ź ich — vieterany, jakija vajujuć z samaha pačatku [ŭvarvańnia RF], z 2022 hoda, — raskazaŭ Šurmiej.
Eks-kamandzir taksama ŭdakładniŭ, što sam u Radu nie ŭvachodzić, ale vykonvaje ŭsie jaje rašeńni.
Pa słovach Šurmieja, u kampietencyju Rady ŭvachodziać hramadskija, administracyjnyja i łahistyčnyja pytańni, naprykład, raźmierkavańnie atrymanych resursaŭ pamiž padraździaleńniami. Pry hetym Rada kamandziraŭ nie addaje bajavyja zahady — heta zastajecca ŭ viadzieńni ŭkrainskaha vajennaha kamandavańnia.
— Usie bajcy PKK — heta bajcy Sił abarony Ukrainy. Zrazumieła, što my ŭsie słužym u Internacyjanalnym lehijonie Hałoŭnaha ŭpraŭleńnia raźviedki. I zrazumieła, što zahad addajecca kamandziram voinskaj čaści, u jakoj my słužym, — rastłumačyŭ Šurmiej.
Jon patłumačyŭ, što ciapier budzie zajmacca palityčnym pradstaŭnictvam pałka.
— Ja nie syšoŭ u nikudy. Staŭ zajmacca inšym napramkam pracy, jakoje navat Rada kamandziraŭ ličyć, mahčyma, nie mienš važnym, čym taja bajavaja praca, jakuju jany robiać. Heta pradstaŭlać uvieś ruch kalinoŭcaŭ. I ŭ tym vypadku, kali heta nieabchodna, — palityčna, — raskazaŭ Šurmiej.
Nahadajem, 12 kastryčnika 2025 hoda połk Kalinoŭskaha abviaściŭ ab pierachodzie da kalehijalnaj madeli kiravańnia. U śpiecyjalnym zvarocie, jaki tady začytvaŭ jašče ŭ statusie kamandzira Pavieł Šurmiej, paviedamlałasia, što ŭsie klučavyja rašeńni ŭ padraździaleńni ciapier budzie prymać saviet kamandziraŭ.
Tady ž było abvieščana ab stvareńni vieteranskaha ruchu «Kalinoŭcy» ŭ farmacie hramadskaj arhanizacyi, jakuju pradstaviŭ Jan Mielnikaŭ, i ab aktyvizacyi palityčnaj dziejnaści. Časovym pradstaŭnikom hetaha napramku staŭ sam Pavieł Šurmiej.
Kamientary