«Dzie byli orhany apieki?» Chatnim tyranam, jaki zabiŭ svaju žonku ŭ Mazyry, akazaŭsia apieratar NPZ
Vinavatym u hučnaj trahiedyi ŭ Mazyry, dzie mužčyna žorstka zarezaŭ svaju žonku na vačach dački, akazaŭsia staršy apieratar ustanoŭki na Mazyrskim NPZ Pavieł Mišota. 41‑hadovy mužčyna šmat hadoŭ pracavaŭ na naftapierapracoŭčym zavodzie, jaho zhadvała halinovaja presa, vyśvietliŭ «Fłahštok».
7 listapada, u vychodny dzień, pryśviečany Kastryčnickamu pieravarotu, mužčyna byŭ pjany i z nažom napaŭ na svaju žonku.
Milicyju vyklikała starejšaja dačka, a ŭsiaho ŭ muža i žonki było čaćviora dziaciej.
Adzin ź milicyjanieraŭ zalez u kvateru praz akno i ŭbačyŭ skryvaŭlenuju žančynu, a pobač ź joj — mužčynu z nažom.
Patrabavańnie kinuć nož jon praihnaravaŭ, daviałosia stralać.
33‑hadovaja Ksienija atrymała jak minimum siem udaraŭ nažom, u balnicu jana patrapiła ŭ vielmi ciažkim stanie i nieŭzabavie pamierła.
Jak adznačyli surazmoŭcy «Fłahštoka», na zavodzie šakavanyja tym, što adbyłosia, i nazyvali Paŭła «prystojnym» čałaviekam. Praŭda, niekatoryja adznačali, što jaho «prystojnaść» zakančvałasia paśla taho, jak jon vypivaŭ śpirtnoje.
U sacsietkach znajomyja mazyranina taksama adhukalisia pra jaho stanoŭča: byŭ adekvatnym, kłapaciŭsia pra dziaciej, kuplaŭ pradukty. Ale inšyja znajomyja siemji adznačyli, što prablema chatniaha hvałtu isnavała daŭno: Pavieł užo nie raz źbivaŭ žonku, adbyvaŭ administracyjny aryšt.
«Joj hod tamu supracoŭniki «chutkaj» kazali, što treba sychodzić razam ź dziećmi. Voś jak u vadu hladzieli, jany tak joj i skazali, što jon ciabie zabje. Voś i vynik», — napisaŭ adzin z karystalnikaŭ.
Šmat chto ŭ kamientarach aburyŭsia tym, «dzie byli orhany apieki», čamu nie zaŭvažali i nie kantralavali prablemnuju siamju, u jakoj, u vyniku, adbyłasia strašnaja trahiedyja.
Na milicejskim videa zatrymańnia chatniaha tyrana bačnaja abstanoŭka ŭ kvatery: abšarpanyja ścieny, nieŭparadkavanaść.
Staronki muža i žonki ŭ sacsietkach daŭno zakinutyja, ale Pavieł jašče niekalki hadoŭ tamu pisaŭ ahresiŭnyja pasty na adras žančyn, a taksama sadysckija paviedamleńni.
«Voś topiš čałavieka, i byccam sumna tak, ale potym źjaŭlajucca burbałki, takija dobryja, i serca radujecca», — pisaŭ jon jašče ŭ 2012 hodzie.
«Što za schilnaści ŭ tabie vyjaŭlajucca, Paš? Zdajecca, byŭ dobry i dobry, a ciapier…» — ździŭlalisia ŭ kamientarach.
Kamientary
[Zredahavana]
Da čaho harełka ludziej davodzić, škada i jaje, i dziaciej.