Jeŭrasajuz uchvaliŭ admovu ad rasijskaha hazu. Na čarzie — naftavaje embarha
Jeŭraparłamient uchvaliŭ pastanovu krain ES całkam admovicca ad zakupak rasijskaha hazu z 1 listapada 2027 hoda. Hety krok staŭ adkazam na tak zvanuju hazavuju vajnu Kramla, jakaja pryviała da najbujniejšaha enierhietyčnaha kryzisu ŭ Jeŭropie paśla ŭvarvańnia Rasii va Ukrainu. Nastupnym etapam pavinna stać poŭnaje embarha na rasijskuju naftu, piša Bi-bi-si.
Za novy zakon prahałasavali 500 deputataŭ, suprać vystupili 120. Dakumient dazvalaje ŭvodzić hazavaje embarha rašeńniem kvalifikavanaj bolšaści, a nie adnahałosna, jak raniej. Heta daje mahčymaść abyści vieta takich krain, jak Vienhryja i Słavakija, jakija nie žadajuć admaŭlacca ad tannych pastavak hazu z Rasii.
Sa słoŭ deputata ź Finlandyi Vile Niiniste, heta histaryčny momant, bo Jeŭrasajuz robić vialiki krok da enierhietyčnaj niezaležnaści i pazbaŭlaje Rasiju mahčymaści vykarystoŭvać enierhanośbity jak srodak cisku.
Da pačatku vajny Rasija zabiaśpiečvała kala 40% patreb ES u hazie. Ciapier hetaja dola źniziłasia da 13%. Častka trubapravodnaha hazu ŭsio jašče pastupaje praz Turcyju ŭ Vienhryju i Słavakiju, a zvadkavany haz — u inšyja krainy ES. Adnak ad zvadkavanaha hazu ES płanuje admovicca jašče raniej — z 1 studzienia 2027 hoda.
Pavodle acenak Jeŭrakamisii, embarha pazbavić Rasiju kala 10 miljardaŭ jeŭra dachodaŭ štohod. Siońnia ES płacić Rasii kala 1,5 miljadraŭ jeŭra na miesiac za enierharesursy, u toj čas jak da vajny hetaja suma dasiahała 12 miljardaŭ. Meta Brusiela — źvieści jaje da nula.
Dla hetaha nieabchodna taksama admovicca ad impartu rasijskich naftapraduktaŭ. Choć syruju naftu ES amal nie kuplaje, ad praduktaŭ jaje pierapracoŭki jon pakul całkam nie admoviŭsia. Ciapier pad sankcyjami znachodzicca kala 90% davajennych pastavak rasijskaj nafty i naftapraduktaŭ.
Jeŭraparłamient namahaje, kab Jeŭrakamisija ŭžo na pačatku 2026 hoda padała kankretnyja prapanovy dla ŭviadzieńnia naftavaha embarha. Ekśpierty adznačajuć, što ES moh by dziejničać bolš chutka i žorstka, ale navat u ciapierašnim vyhladzie novy zakon razhladajuć jak značnaje dasiahnieńnie, bo jon uzmacniaje ahulnajeŭrapiejski kantrol nad sankcyjnaj palitykaj i abmiažoŭvaje mahčymaści dla jaje błakavańnia asobnymi krainami.
Adna z najbahaciejšych siemjaŭ Saudaŭskaj Aravii choča nabyć zamiežnyja aktyvy «Łukojła»
Ukraina treci raz za tydzień naniesła ŭdary pa rasijskich naftahazavych abjektach u Kaśpijskim mory
ZŠA pradstavili jeŭrapiejskim krainam prapanovy nakont viartańnia Rasii ŭ suśvietnuju ekanomiku
Rasija stračvaje kantrol nad Uschodniaj Jeŭropaj — ale razmova nie pra Biełaruś
U Rasii zajavili pra niemahčymaść skłaści dziaržaŭny biudžet biez novaha pavyšeńnia padatkaŭ
ZŠA nie buduć błakavać pastaŭki rasijskaj nafty i hazu ŭ Vienhryju, zajaviŭ Orban paśla sustrečy z Trampam
Ciapier čytajuć
«Kali pasadziać znoŭ, to pasiadžu». Pačobut pra svajo vyzvaleńnie, kamiery śmiarotnikaŭ, bitvu za honar u sudzie i žadańnie viarnucca4
Kamientary
100500-ja ilustracyja, što spadziavacca treba ŭ pieršuju čarhu na siabie, na takuju Jeŭropu nadziei mała.