Pamiatajecie niemaładoha aktyvista, jaki pa duraści źniaŭsia ŭ prapahandysckim kino BT? U Polščy jon ulapaŭsia jašče i ŭ špijanaž
Adnym z troch zatrymanych u Polščy biełaruskich špijonaŭ akazaŭsia Uładzimir Usier (Łazaraŭ) — aktyvist z Babrujska, jaki apošnim časam žyŭ u Biełastoku i nie tak daŭno ŭžo sieŭ u łužynu, dvojčy źniaŭšy kadry dla prapahandysckaha filma «Čužoje nieba» ad BT.
Susied Uładzimira Usiera, ź jakim jany dzialili arendnuju kvateru, raskazaŭ «Našaj Nivie» detali zatrymańnia aktyvista.
Pavodle źviestak polskaj prakuratury, troje biełarusaŭ i dvoje ŭkraincaŭ z sakavika 2024 hoda da lutaha 2025‑ha supracoŭničali z zamiežnaj raźviedkaj i vykonvali roznyja zadańni, jakija atrymlivali z paviedamleńniaŭ u telehramie. U ich zadačy ŭvachodziła fatahrafavańnie abjektaŭ krytyčnaj infrastruktury i miescaŭ, važnych dla biaśpieki dziaržavy. Akramia taho, jany pavinny byli raźviešvać płakaty i malavać hrafici.
«Dva dni tamu ja siadzieŭ za kampom, była niedzie pałova na dziasiatuju ranicy, jak pačuŭsia hrukat u dźviery — za imi byli dvoje, što pradstavilisia supracoŭnikami hazavaj słužby. Paśla niedzie vosiem čałaviek sa zbrojaj i ŭ broniekamizelkach zabiehli ŭ kvateru — spačatku mianie schapili, spytali, ci jość u mianie zbroja, narkotyki. I adrazu pacikavilisia, dzie Uładzimir Usier. Susied zusim nie razumieje pa-polsku, tamu spačatku ja jamu niešta pierakładaŭ, a potym jamu pierakładčyka dali, i toj užo začytvaŭ abvinavačvańnie».
Pa słovach surazmoŭcy, u ich kvatery praviali pieratrus — uvažliva prahladzieli ŭ tym liku jaho techniku. Telefon i kampjutar Usiera-Łazarava zabrali razam ź im.
«Jak ja zrazumieŭ, jaho pavieźli da Varšavy, a ciapier jon u špitali. U jaho sa zdaroŭjem biada — cukrovy dyjabiet, nohi raspuchłyja, limfa ciakła z noh, a jašče ŭ jaho niešta z dychańniem».
U suviazi z takim stanam zdaroŭja ŭ dačynieńni da Usiera sud na hety momant abraŭ mieru strymańnia, nie źviazanuju z pazbaŭleńniem voli. Adnak jamu zabaroniena pakidać Polšču.
Susied Uładzimira pryznaŭsia, što mužčyna žyŭ u antysanitarnych normach: pakoj nie prybiraŭ, amal nikoli nie myŭsia. A kali prymušali — prosta ablivaŭsia vadoj i naciahvaŭ na siabie takoje ž brudnaje adzieńnie.
Apošnim časam, praciahvaje surazmoŭca, Uładzimir pastajanna słuchaŭ ruskaje radyjo.
«Ja svaryŭsia, sprabavaŭ jamu pakazvać «Radyjo Svabodu», «Radyjo Racyja», ale nie dapamahała. U niejki momant ja prosta jamu adrubaŭ internet, ale jon prasiŭ viarnuć nazad. Asabliva złym ja zrabiŭsia paśla taho, jak jon źniaŭ za hanarar kadry pra ciažkaści emihracyi dla prapahandystaŭ z BT».
Susied raskazvaje što były aktyvist cełymi dniami ničym nie zajmaŭsia, akramia taho, što siadzieŭ u internecie, paliŭ i spaŭ.
«Nie viedaju, na jakija hrošy jon žyŭ. Časam kazaŭ, što jamu siabra z Amieryki dapamahaje. Nu, i jamu dapamahali biełarusy, ale toje ž byli razavyja vypłaty. Piensiju ž jon daŭno nie moh atrymlivać, bo skončyłasia kartka. Ja jamu ŭvieś čas kazaŭ uziacca za hałavu, bo ŭ jaho ž ničoha nie było za dušoj, a jon mnie ŭ adkaz: «Hrošy — nie prablema».
Ciapier susied asensoŭvaje, što srodki na isnavańnie Uładzimiru mahli pastupać za supracoŭnictva z raźviedkaj.
«Ale žyŭ jon biedna. Jak jaho zabrali, pahladzieŭ, što ź ježy ŭ jaho była niejkaje prosa, słoik z haroškam, chleb, alej na dnie, krychu cukru, soli — i ŭsio. Jon charčavaŭsia za košt susiedziaŭ. Moh u mianie małaka adlić ci jašče što.
Pry hetym dačka ž u jaho ŭ Izraili daŭno, i paśla jaho emihracyi dapamohu prapanoŭvała. Ale jon pracavać nie chacieŭ, chacieŭ na šyi siadzieć, tamu, jak ja viedaju, siamja ad jaho admoviłasia. Dumaju, u jaho ahułam niešta z hałavoj, bo kali jon nie zrabiŭ vysnovy paśla toj historyi z BT, a jašče dalej zalez, to što tut skažaš jašče».
Akramia Uładzimira Usiera, siarod zatrymanych 25 i 26 listapada akazalisia hramadzianie Biełarusi Viktoryja M. i Anton M., a taksama dvoje ŭkraincaŭ. Ich užo dapytali i vystavili abvinavačvańni. Pa inkryminavanych artykułach im moža pahražać ad 5 da 30 hadoŭ pazbaŭleńnia voli.
U Polščy zatrymali za špijanaž troch biełarusaŭ i dvuch ukraincaŭ
«Mnie soramna, ale ja navat nie pamiataju». Stali viadomyja novyja padrabiaznaści z pracesu zdymak emihrantaŭ dla kino na BT
Na BT zrabili film pra toje, jak biełarusy ledź vyžyvajuć u Jeŭropie. Kab zapisać videa, hierojaŭ žorstka padmanuli
U zatrymanaha ŭ Polščy taksista-špijona znajšli śpis biełarusaŭ, za jakimi jon mieŭ zadańnie sačyć
Na poŭnačy Biełarusi isnavała vielizarnaje voziera — u 150 razoŭ bolšaje za Narač. Jano źnikła ŭ vyniku pryrodnaj katastrofy, ale ślady zaŭvažnyja i siońnia77
Kamientary
A što žyŭ aby-jak dyk tut pytańnie hustu, zanadta uvajšoŭ ŭ rolu žabraka.
I pracavać nie chaču. Siłaŭ niama psichičnych. Zajzdrošču tym, chto maje pracu i siły.
Ale ja b nikoli nie zhadziŭsia padpiavać łukie i jaho chieŭry.
Biedny čałaviek. Vidavočna maje niešta padobnaje da majho stanu.