20 hadoŭ tamu ŭ Biełarusi pačali źbirać iranskija «Samandy». Jak ciapier jany vyhladajuć i kolki kaštujuć?
Z 2006 da 2013 hoda na zavodzie «Junison» pad Minskam źbirali aŭtamabili Iran Khodro Samand. Hetyja francuzska-iranska-biełaruskija mašyny źbiralisia zrabić takimi ž papularnymi, jak ciapierašnija Geely.
Sproba zaličanaja
Siedan Iran Khodro Samand stvorany na bazie Peugeot 405, jaki vyjšaŭ u śviet u dalokim 1987 hodzie. Tamu pierśpiektyŭnaść zadumy naładzić zborku takoha aŭto ŭ 2006 hodzie adrazu vyklikała sumnievy. Ale nieviadomaść brenda i sam fakt adstałaści madeli — nie adzinaje, što paŭpłyvała na los hetaha prajekta.
Treba razumieć, što da siaredziny 2011 hoda ŭ Biełarusi isnavali davoli nizkija myty na ŭvoz aŭto ź inšych krain. Naprykład, za 3 — 10‑hadovaje aŭto z ruchavikom abjomam 1,6 litra treba było zapłacić usiaho 640 jeŭra myta, a z 2‑litrovym — 800.
Praz heta Samand u nasielnictva ad samaha pačatku karystaŭsia vielmi nizkim popytam, a asnoŭnymi pakupnikami francuzska-iranska-biełaruskaha aŭtamabila vystupali dziaržaŭnyja arhanizacyi.
Pry hetym płany napačatku ahučvalisia davoli ambitnyja. Da kanca 2006 hoda płanavali vypuścić 820 aŭto, a ŭ 2007‑m — užo nie mienš za 4 tysiačy. Razam z hetym płanavałasia dasiahnuć davoli vysokaha ŭzroŭniu łakalizacyi — da 35—50%.
U vyniku za ŭvieś čas isnavańnia prajekta było zroblena ŭsiaho kala 2000 aŭto. Novy iranska-biełaruski siedan kaštavaŭ kala 12 500 dalaraŭ.
Kolki kaštujuć ciapier?
Zaraz u prodažy 12 aŭto biełaruskaj zborki 2006—2013 hadoŭ vypusku. Za samaje tannaje ź ich prosiać usiaho 850 dalaraŭ. Heta mašyna 2006 hoda vypusku z zajaŭlenym prabieham 300 tysiač kiłamietraŭ.
Mašyna na chadu, ale patrabuje kapitalnaha ramontu kuzava i zamieny padšypnika ŭ zadniaj bałcy.
Dalej iduć aŭto za 1300‑2000 dalaraŭ.
Za 6000 rubloŭ ($2067) pradajecca mašyna, jakaja vyhladaje davoli prystojna. Zhodna z apisańniem, u joj užo pieravaranyja łanžerony i zamienieny ruchavik.
Ruchavik, jak i inšyja detali pa techničnaj častcy, pasujuć ad Peugeot.
Pakolki technična heta Peugeot, to prablem z zapčastkami niama. A voś z kuzaŭnymi detalami ŭsio składana. Jany ŭsie svaje, iranskija, a mašyny hetyja, jak pakazaŭ čas, karozii supraciŭlajucca nie vielmi.
Jość u prodažy i niekalki restajlinhavych mašyn apošnich hadoŭ vypusku.
Za varyjant z kuzaŭnymi defiektami ŭ vyhladzie iržy prosiać 3300 dalaraŭ, a za nibyta biesprablemnyja varyjanty 2011—2012 hadoŭ vypusku — pa 4300—4400 dalaraŭ.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2323
Kamientary