Kolkaść turystaŭ ź Biełarusi, jakija naviedali Hruziju, praciahvaje raści. U 2025 hodzie ŭ hetaj krainie pabyvała bolš za 150 tysiač biełaruskich hramadzian. Pra heta paviedamili ŭ Respublikanskim sajuzie turystyčnych arhanizacyj sa spasyłkaj na Nacyjanalnuju administracyju turyzmu Hruzii. Pry hetym u hruzinskim viedamstvie adznačyli, što minuły hod staŭ rekordnym pa ahulnaj kolkaści turystyčnych vizitaŭ.
U paraŭnańni z 2024 hodam, kali Hruziju naviedali kala 140,5 tysiačy biełarusaŭ, u 2025‑m ich stała amal na 9,8 tysiačy bolš. Takim čynam, rost skłaŭ prykładna 7%.
Pa kolkaści turystaŭ Biełaruś zaniała miesca ŭ pieršaj siamiorcy krain, hramadzianie jakich najčaściej pryjazdžali ŭ Hruziju. Napieradzie apynulisia tolki Rasija, Turcyja, Armienija, Izrail, Azierbajdžan i Kazachstan. U dziasiatku lidaraŭ taksama ŭvajšli Indyja, Ukraina i Kitaj.
U cełym turystyčny patok u Hruziju ŭ 2025 hodzie vyras na 8,4% i dasiahnuŭ rekordnych 5,5 miljona zamiežnych haściej. Najbolšy rost byŭ zafiksavany siarod turystaŭ ź Ispanii, Italii, Vialikabrytanii, Hrecyi i Francyi.
Z 1 studzienia 2026 hoda ŭ Hruzii źmianilisia praviły ŭjezdu: ciapier usie inšaziemcy, u tym liku hramadzianie Biełarusi, pavinny mieć pry sabie dziejny miedycynski strachavy polis abo strachoŭku ad niaščasnych vypadkaŭ.
Kamientary