Novaje pakaleńnie hiendyrektaraŭ: moładź i daloka nie «krepkija chaziajśćvieńniki» masava ŭznačalvajuć tryljonnyja biznesy
U ZŠA nazirajecca najbujniejšaja za apošnija jak minimum 15 hadoŭ chvala źmienaŭ u kiraŭnictvie bujnych publičnych kampanij. Kolkaść novych hienieralnych dyrektaraŭ rekordnaja, i pry hetym jany maładziejšyja i majuć mienš dośviedu, čym ich papiaredniki.
Pavodle analizu, jaki achoplivaje 1500 najbujniejšych kampanij, što handlujucca na biržy, letaś byŭ zamienieny prykładna adzin hienieralny dyrektar ź dzieviaci. Heta samy vysoki ŭzrovień ratacyi z 2010 hoda — času, kali ZŠA tolki vychodzili ź finansavaha kryzisu, piša The Wall Street Journal.
I tendencyja nie zapavolvajecca: užo ŭ studzieni i pačatku lutaha dziasiatki kampanij abviaścili pra novyja pryznačeńni. Siarod ich — Walmart, Procter & Gamble i Lululemon Athletica. U adzin dzień na pačatku lutaha novych kiraŭnikoŭ nazvali Disney, PayPal i HP. Na minułym tydni sietka supiermarkietaŭ Kroger pryznačyła kiraŭnikom byłoha top-mieniedžara Walmart.
Maštab źmienaŭ vyhladaje jak vialiki ekśpierymient u halinie karparatyŭnaha lidarstva. Kampanii vymušanyja reahavać na imklivy rost štučnaha intelektu, razbureńnie starych i dobra vybudavanych handlovych praktyk, a taksama na niestabilnuju ekanamičnuju i hieapalityčnuju situacyju.
Pa słovach kiraŭnika hłabalnaj praktyki pa padbory CEO mižnarodnaj kansałtynhavaj kampanii Spencer Stuart Džejmsa Cytryna, ciapier kampanii znachodziacca ŭ novym asiarodździ, tamu staryja schiemy kiravańnia ŭžo nie harantujuć pośpiechu. Kali kiraŭnik nie demanstruje chutkaha prahresu jak u apieracyjnaj dziejnaści, tak i ŭ pracy ź inviestarami, rady dyrektaraŭ stanoviacca jašče mienš ciarplivymi, čym raniej.
Pavodle analizu Spencer Stuart, novyja kiraŭniki ŭ siarednim maładziejšyja — ich siaredni ŭzrost składaje 54 hady, što na dva hady mienš u paraŭnańni z pryznačeńniami hodam raniej. Pry hetym bolš za 80% sa 168 novych CEO, pryznačanych u 2025 hodzie, stali kiraŭnikami ŭpieršyniu i nie mieli papiaredniaha dośviedu kiravańnia publičnymi kampanijami albo inšymi bujnymi samastojnymi pradpryjemstvami. Dźvie traciny ź ich nikoli raniej nie ŭvachodzili ŭ rady dyrektaraŭ karparacyj.
Pry hetym, jak adznačaje vydańnie, adsutnaść dośviedu kiravańnia samastojnaj publičnaj kampanijaj nie zaŭsiody aznačaje niedastatkovuju padrychtavanaść. Pa słovach Sindzi Džejmisan, jakaja ŭvachodzić u rady dyrektaraŭ bujnoj amierykanskaj restarannaj sietki Darden Restaurants i mižnarodnaj chimika-charčovaj kampanii International Flavors & Fragrances, maładziejšyja kiraŭniki bolš adpaviadajuć novaj realnaści. Situacyja mianiajecca vielmi kardynalna i niezvarotna, tamu patrebnyja ludzi, jakija pracavali «na pieradavoj», u samym centry padziej, i prymali składanyja rašeńni na praktycy.
U tych vypadkach, kali kampanii ŭsio ž pryznačali starejšych i bolš daśviedčanych kiraŭnikoŭ, heta časta było źviazana z kryzisnymi abstavinami. Pavodle ekśpiertaŭ Spencer Stuart, usio bolš kampanij letaś vybirali členaŭ rady dyrektaraŭ dla apieracyjnaha kiravańnia — zvyčajna jak časovaje rašeńnie, što śviedčyć pra zboi ŭ płanavańni pierajemnaści. U technałahičnym, miedyjnym i telekamunikacyjnym siektarach takija pryznačeńni skłali 15% ad usich novych CEO.
Adnačasova, jak piša WSJ, źmienšyłasia dola žančyn na pasadach hienieralnych dyrektaraŭ. Tolki 9% novych pryznačeńniaŭ letaś dastalisia žančynam — suprać 15% hodam raniej. U cełym žančyny zajmajuć kala 9% pasad hienieralnych dyrektaraŭ u 1500 najbujniejšych amierykanskich publičnych kampanijach, jakija ŭvachodziać u indeks S&P 1500. U hałoŭnym biržavym indeksie ZŠA — S&P 500 — žančyn-CEO ciapier 46.
Takim čynam, jak padsumoŭvaje WSJ, amierykanski karparatyŭny siektar uvajšoŭ u pieryjad maštabnaha abnaŭleńnia kiraŭnictva, kali na čale tryljonnych kampanij usio čaściej stanoviacca maładziejšyja kiraŭniki, mnohija ź jakich upieršyniu ŭznačalvajuć publičnyja karparacyi i jakim davodzicca prymać rašeńni ŭ biesprecedentna składanych umovach.
Kamientary
============================
Jak ŭ tym anekdotie - dyskateka kamu za 70 była sarvanaja pjanymi 50-hadovymi padletkami. Kali dla ich 54 moładź, to zrazumieła čamu jany abirajuć 80-hadovych prezidentaŭ.