«Jak acaleć u niaštatnaj situacyi». 24 vieraśnia ŭ Biełarusi projdzie ahulnanacyjanalny dzień infarmavańnia pra biaśpieku
24 vieraśnia ŭ Biełarusi projdzie Adziny dzień biaśpieki. Jaho hałoŭnaja meta — navučyć ludziej pravilna dziejničać u vypadku pažaraŭ i inšych nadzvyčajnych situacyj.
Najpierš uvaha budzie nadadziena abjektam z masavym znachodžańniem ludziej: bujnym handlovym i handlova-zabaŭlalnym centram, kulturnym i spartyŭnym ustanovam, a taksama abjektam, dzie znachodziacca dzieci. Rabotniki takich arhanizacyj buduć nie tolki słuchać tearetyčnyja zaniatki, ale i adpracoŭvać praktyčnyja navyki. U niekatorych ustanovach, asabliva adukacyjnych, u navučańni buduć udzielničać supracoŭniki MNS.
Va ŭsich rehijonach krainy ŭ miescach masavaha znachodžańnia ludziej 24 vieraśnia buduć pracavać 139 tematyčnych placovak. Tam možna budzie atrymać infarmacyju pra biaśpiečnyja pavodziny i praviadzieńnie Adzinaha dnia biaśpieki.
MNS taksama rekamienduje kiraŭnikam arhanizacyj pravieryć stan supraćpažarnych sistem, spraŭnaść pažarnaj aŭtamatyki i toje, ci adpaviadajuć patrabavańniam šlachi evakuacyi.
Pradstaŭnik MNS adznačyŭ, što nieabchodnaść takich mierapryjemstvaŭ źviazanaja z rehularnymi nadzvyčajnymi situacyjami ŭ roznych krainach. Adnym z prykładaŭ staŭ pažar u 2018 hodzie ŭ handlova-zabaŭlalnym centry «Zimniaja višnia» ŭ rasijskim Kiemieravie, paśla jakoha ŭ Biełarusi pačali pravodzić Adziny dzień biaśpieki.
U Biełarusi z 2024 hoda da žniŭnia 2026 hoda na abjektach z masavym znachodžańniem ludziej adbyłosia 34 pažary. Bolšaść ź ich była źviazana z parušeńniami ŭ pracy elektryčnych sietak i abstalavańnia. Najčaściej pažary ŭźnikali na handlovych pradpryjemstvach.
U śniežni 2024 hoda pažar adbyŭsia ŭ handlovym centry «Biełaruś» u Viciebsku. Ahniom było paškodžana bolš za 2 tysiačy kvadratnych mietraŭ. Padčas likvidacyi pažaru ratavalniki vyratavali 10 čałaviek i evakujavali z budynka 215 čałaviek, u tym liku 40 dziaciej. Zahinułych nie było, ale paciarpieli 17 čałaviek, siarod ich dvoje dziaciej.
U MNS adznačajuć, što vialikaja kolkaść achviar padčas pažaraŭ časta źviazanaja z pamyłkami pry evakuacyi, panikaj i nieadpaviednaściu budynkaŭ patrabavańniam pažarnaj biaśpieki.
Kali spracoŭvaje pažarnaja sihnalizacyja abo čałaviek zaŭvažaje dym, ahoń ci inšyja prykmiety ŭzharańnia, nielha marnavać čas. Nieabchodna chutka acanić situacyju i pakinuć budynak, vyjšaŭšy ŭ biaśpiečnaje miesca.
Kali viadoma, što ŭ budynku zastalisia ludzi, pra heta treba paviedamić ratavalnikam, jakija pracujuć na miescy, abo patelefanavać pa numarach 101 ci 112 i paviedamić mierkavanaje miesca znachodžańnia ludziej.
Ciapier čytajuć
Minčuk źniaŭ rolik pra čarhu ŭ paliklinicy, dzie było bolš za 150 čałaviek. Za heta na jaho napisali zajavu ŭ milicyju9
Kamientary