Chto taja adzinaja žančyna, što pryjšła na matč «Dynama-Minsk» u Varšavie z čyrvona-zialonym ściaham
Na futbolny matč minskaha «Dynama» i polskaj «Lehii», što adbyŭsia 7 listapada ŭ Varšavie, biełarusy pryjšli z nacyjanalnaj simvolikaj. Na trybunach byli bačnyja bieł-čyrvona-biełyja ściahi, a taksama płakaty z asudžeńniem režymu Łukašenki i siłavikoŭ.
Adnak adna z fanatak vyłučałasia — u čyrvona-zialonaj majcy, žančyna stajała z aficyjnym ściaham u rukach. Raskazvajem, što my pra jaje daviedalisia.
Zhodna ź siervisami pošuku pa sacsietkach, heta 33-hadovaja Taćciana. Rodam jana ź Biarozy, z prostaj siamji.
Pa źviestkach prajekta Digital intelligence team, Taćciana ŭsio žyćcio pracavała na roznych zavodach i pradpryjemstvach na rabočych śpiecyjalnaściach, vartaŭničkaj va ŭstanovie adukacyi. Pa sacsietkach vyhladaje, što ŭ 2022 hodzie jana pajechała žyć u Polšču da chłopca.
U jaje padpiskach pieravažajuć supołki ź miemami dy receptami. Siarod fota — adpačynak dy sustrečy ź siabrami dy svajakami.
Mužčyna, jaki byŭ ź joj pobač na matčy, — jaje palak-spadarožnik. Jaho fota jość na matčach UEFA ŭ 2018 hodzie, tam jon zaŭzieje za Polšču.
Błohier Alaksandr Ivulin padyšoŭ paznajomicca z žančynaj.
«Mianie paśla nabjuć hetyja čyrvona-biełyja», — uśmichajecca jana.
Raskazvaje, što biełaruska, vyjšła zamuž za palaka.
Ivulin spytaŭ žančynu, čamu jana pryjšła na stadyjon u takoj formie.
«Tamu što ja naradziłasia, kali byŭ taki ściah, i ja chaču pamierci z takim ściaham», — adkazała jana.
«Nu vy amal pryjšli pa adrasie», — žartuje Ivulin.
«Ja dumaju, heta mahčyma apošni dzień majho žyćcia», — śmiajecca ŭ adkaz žančyna.
Jana raskazała, što naradziłasia ŭ 1991-m.
«Vy nie pad hetym ściaham naradzilisia», — zaŭvažyŭ Ivulin. Aficyjny čyrvona-zialony ściah byŭ zaćvierdžany ŭ 1995-m, paśla raspadu SSSR z 1991-ha ściaham Biełarusi byŭ bieł-čyrvona-bieły.
Žančyna sprabavała paspračacca.
«Ale naohuł jakaja roźnica, — skazała ŭ vyniku. — U Biełarusi nie moža być inšaha ściaha».
Ivulin spytaŭ, za kaho z futbalistaŭ zaŭzieje novaja znajomaja.
«Chto najlepšy futbalist — biez paniaćcia. (…)Ja ahułam pracuju…» — zapnułasia žančyna.
«Vy pracujecie siońnia. Vy ŭsio pravilna skazali», — z uśmieškaj padłaviŭ jaje Ivulin.
Va ŭčorašnim matčy Lihi kanfierencyj biełaruski kłub razhromna sastupiŭ polskamu — 0:4.
«Naša Niva» — bastyjon biełaruščyny
PADTRYMAĆ
Kamientary