«Tania mužna pieraadoleła ŭsio i z usim spraviłasia». Dyrektar EPAM padziakavaŭ usim, chto dapamoh hrašyma dla zmahańnia žonki z rakam
U žonki adnaho z dyrektaraŭ EPAM — remisija. Jon udziačny ŭsim, chto dapamahaŭ, raspavioŭ Devby.io sam Andrej Šubadzioraŭ.
U studzieni 2024 hoda ŭ žonki Andreja, Taćciany, vyjavili rak kišečnika. Jana prajšła niaprostaje lačeńnie — i chvaroba adstupiła, ale, na žal, ček-ap u červieni pakazaŭ recydyŭ.
Andrej źviarnuŭsia da čytačoŭ — i jany adhuknulisia. Paśla Šubadzioraŭ adznačaŭ, što dla jaho i jaho žonki «heta byŭ novy vopyt — voś tak adkryta zajavić u prastoru, što patrebna dapamoha». Ale marudzić było nielha: lekary patrabavali pačać lačeńnie nie paźniej čym praź dziesiać dzion paśla taho, jak pryjšli vyniki abśledavańnia. Andrej nie byŭ upeŭnieny, što zmoža sam chutka znajści nieabchodnuju sumu: papiaredniaje lačeńnie było darahim, i Šubadzioraŭ «nie paśpieŭ finansava adnavicca».
Ciapier Taćciana ŭžo skončyła piacimiesiačny kurs lačeńnia ŭ klinicy Bogenhausen.
— Heta byŭ niaprosty pieryjad u jaje žyćci — znoŭ chimijaterapija z antyciełami, a jašče pramianiovaja terapija. Ale Tania mužna pieraadoleła jaho i spraviłasia sa ŭsim, — kaža Andrej. — I ŭsio dziakujučy vialikaj padtrymcy ŭsich vakoł, u tym liku čytačoŭ dev.by.
Kali padvieści vyniki, to tolki na płatformie zrzutka.pl my sabrali kala 25 tysiač jeŭra. Viadoma, dapamahali i maje byłyja kalehi z Wargaming, i ciapierašnija z EPAM — jany pieraličvali hrošy i naŭprost, i z hetych srodkaŭ my zmahli apłacić chimijaterapiju. Ja biaźmierna ŭdziačny ŭsim hetym ludziam.
Pa słovach Andreja, ahulnaja suma dapamohi, jakuju jany z Taćcianaj atrymali, skłała amal 70 tysiač jeŭra, jakija pajšli na lačeńnie i žyćcio ŭ Hiermanii. I «ŭsio heta dapamahło nam pryjści da vyniku — remisii», dadaje surazmoŭca.
Andrej kaža, što ciapier Taćciana ŭžo doma. Lačeńnie skončyłasia ŭ śniežni. Ale jašče try doŭhija miesiacy ŭsia siamja žyła ŭ režymie čakańnia: vyniki lekary ahučyli niadaŭna.
— Tania adčuvaje siabie vielmi dobra. My biaźmierna ščaślivyja, što hety ciažki pieryjad skončyŭsia. Spadziajusia, što nadoŭha, a moža, i nazaŭždy.
Andrej kaža, što Taćciana była dla jaho prykładam stojkaści ŭsio hety čas, i jon udziačny žoncy za toje, što jana, niahledziačy na situacyju, prajaviła niečuvanuju siłu — heta nadavała siły i jamu samomu. «Biez hetaha my b nie vytrymali — nijakija hrošy nie dapamahli b».
Taćcianu jašče čakaje adnaŭleńnie paśla chimii i pramianiovaj terapii, jana nastrojena aptymistyčna.
Ciapier čytajuć
Pobač z Łukašenkam na chakiei źjaviłasia novaja pryhažunia1
Kamientary