Hladzieć chakiej Alaksandr Łukašenka pa daŭniaj tradycyi pajšoŭ u kampanii špica Umki i pryhožych dziaŭčat. U ich šerahach, darečy, adbyłasia čarhovaja rakiroŭka.
Luboŭ (ci chacia b navyk imitavać cikavaść) da chakieju — heta toje, što abaviazkova dla štatnych pryhažuń Łukašenki. Jany rehularna publikujuć u svaich instahramach fota i videa z chakiejnych matčaŭ. I, kaniešnie, padtrymlivajuć palityka z trybun, kali toj sam vychodzić na lod.
Na matčy «Dynama-Minsk» suprać maskoŭskaha «Dynama» razam z Łukašenkam možna pabačyć asabistuju doktarku Śviatłanu Kanašenku, jakoj znoŭ davieryli špica Umku.
U adnym radzie z palitykam siadzić taksama sienatar Dźmitryj Baskaŭ. Pobač ź im — Alina Roskač sa Śvietłahorska. Jana ŭdzielničała ŭ «Mis Biełaruś» u 2016 hodzie i z taho momantu čas ad času źjaŭlajecca ŭ kampanii Łukašenki.
Byłuju favarytku Uładlenu Zajcavu, jakaja davoli doŭha zajmała hałoŭnaje miesca pobač z Łukašenkam na takich mierapryjemstvach, pasadzili ŭ inšy rad — jana siadzić nižej, pobač z Natallaj Ejsmant.
Na tym ža radzie, dzie Zajcava, znachodzicca jašče adna daŭniaja spadarožnica Łukašenki — Nastaśsia Kazyryckaja, udzielnica konkursu «Mis Biełaruś — 2021».
Chto ž taja dziaŭčyna, jakuju možna pabačyć pa levuju ruku ad Łukašenki? Heta Valeryja Marozava. U 2024 hodzie jana pieramahła ŭ konkursie pryhažości ŭ Barysavie, a ŭ nastupnym hodzie pasprabavała prabicca na «Mis Biełaruś».
Tady jana pracavała doktarkaj u paliklinicy №2 Barysava. Žury płanavała ździŭlać svaim chobi. Valeryja kazała:
«Majo zachapleńnie — stvareńnie dohladavaj kaśmietyki. Maru ab ułasnaj liniejcy kaśmietyčnych srodkaŭ, jakaja budzie sumiaščać u sabie navuku, estetyku i kłopat ab skury».
Valeryja ličyć svajoj asnoŭnaj rysaj charaktaru ŭraŭnavažanaść. Dziaržaŭnaj presie dziaŭčyna kazała, što jaje natchniajuć słovy Styva Džobsa: «My znachodzimsia tut, kab zrabić svoj uniosak u hety śviet. A inakš navošta my tut?».
Letaś Valeryja ŭdzielničała ŭ finalnym etapie abłasnoha konkursu «Małady lidar Minščyny — 2025» i atrymała dypłom.
Zaśviaciłasia Valeryja i na sustrečy Barysaŭskaha rajkama BRSM z maładymi śpiecyjalistami, jakija niadaŭna pačali pracavać va ŭstanovach achovy zdaroŭja Barysaŭščyny.
«Mianie jak maładoha śpiecyjalista ŭsio zadavalniaje. Zarpłataj taksama zadavolenaja. Ź niedachopaŭ — deficyt kadraŭ, i heta nie sakret. Praz heta pavialičany abjom pracy», — cytavali słovy Marozavaj na sajcie miascovaha vykankama.
Ale ciapier, vyhladaje, Valeryja ŭžo nie pracuje doktarkaj — na sajcie barysaŭskaj palikliniki №2 uziać tałon da jaje niemahčyma.
Zatoje ŭ internecie možna znajści fota Valeryi na III Minskaj mižnarodnaj kanfierencyi pa jeŭrazijskaj biaśpiecy. Vyhladaje jana jak dziaŭčyna sa słužby pratakoła: na kaleniach trymaje błaknot z aficyjnym biełaruskim arnamientam, na im bačnaja papierka z nadpisam «Słužbovaje».
Chto tyja dziaŭčaty, jakija «vypadkova» apynulisia ŭ Mak.by padčas vizitu Łukašenki?
Chto taja dziaŭčyna, što siadzieła pobač z Łukašenkam na konkursie «Mis Biełaruś»? Raniej ich nie bačyli razam
Što za studentka Ullana, ź jakoj na bali valsiravaŭ Łukašenka?
Dziaŭčyna z «kavunovaha bataljona» Łukašenki atrymała ŭ Rymie prapanovu ruki i serca. Chto ž žanich?
Ciapier čytajuć
Zališniaje budaŭnictva: ci moža luboŭ biełarusaŭ inviestavać hrošy ŭ kvatery pryvieści da kryzisu na rynku nieruchomaści?10
Kamientary
Vielmi durnavaty i sastareły hety štamp, a paśla 2020-ha ŭvohule niedarečny.