«Niekatoryja zmohuć adkazać hadoŭ praź piać». Biełaruska spytała tych, chto emihravaŭ u Polšču, a potym viarnuŭsia, ci nie škadujuć jany
Karystalnica Threads pad nikam prtymd paprasiła biełarusaŭ, jakija viarnulisia na radzimu praź niekalki hadoŭ žyćcia ŭ Polščy, padzialicca vopytam i raskazać, jak źmianiłasia ich žyćcio. «Škadujecie, što tak zrabili, ci, naadvarot, radyja i ličycie, što zrabili pravilna?» — spytałasia jana. I sabrała šmat adkazaŭ za i suprać viartańnia. Vydańnie Most vyvučyła kamientaryi i vybrała samyja cikavyja.
«Akazałasia, heta prosta nie majo»
Bolšaść kamientataraŭ, jakija vyrašyli viarnucca ŭ Biełaruś, jak praviła, źviartajuć uvahu na lepšyja pierśpiektyvy karjernaha rostu, mahčymaść bačycca z rodnymi i siabrami, vyrašanaje žyllovaje pytańnie i adsutnaść prablem z dakumientami.
«Viarnuŭsia praz dva hady. Skažu tak: kali pierajazdžać ź Minska, dzie ŭ vas svajo žyllo i praca z zarobkam ad 3000 rubloŭ, niama sensu ŭ bolšaści vypadkaŭ. Inflacyja apošnich hadoŭ, rost cen na nieruchomaść i dempinh rynku pracy z boku hramadzian Ukrainy ŭsie vyhady pierajezdu pamnožyli na nul. Taksama ŭ absalutna lubym polskim kalektyvie vam nikoli nie śviecić surjozny karjerny rost, asabliva da kiraŭnika, što ŭ Biełarusi dasiahalna časam za adzin-dva hady. Nu i pastajanny stres z-za dakumientaŭ: pracu straciŭ — trasiešsia», — napisaŭ karystalnik optimus_x_x_x.
Nastaśsia (nass.aistudio) i jaje muž viarnulisia ŭ Minsk dziesiać miesiacaŭ tamu paśla šaści hadoŭ žyćcia ŭ Varšavie:
«Ni pra što nie škadujem, u nas usio dobra było i tam, i tut. Varšavu i Polšču vielmi lubim, mienavita tam my pastaleli i nabyli kaštoŭnyja dla nas navyki i resursy. Ale z naradžeńniem syna pryjšło ŭśviedamleńnie, što chočam hadavać jaho pobač ź siamjoj. Usiudy jość mahčymaści, usiudy treba pracavać, kab žyć dobra, za prosta tak nidzie hrošy nie razdajuć».
«Viarnułasia praz šeść hadoŭ z adukacyjaj i dobraj addalenaj pracaj, ni pra što nie škaduju. Heta byŭ vydatny dośvied, ale akazałasia, heta prosta nie majo», — patłumačyła svoj vybar yarco.ceramic.
Kirył (meblova) pražyŭ u Polščy dzieviać hadoŭ i viarnuŭsia:
«U mianie było šyrokaje koła znosin, ja saliravaŭ u chory, ź jakim abjeździŭ usiu krainu, z movaj prablem nie było. Ale zaŭsiody jość «ale». Baćki starejuć bieź mianie, plamieńniki rastuć biez suviazi sa mnoj… «Svaim» stać nie atrymajecca nikoli. <…> Kantekst nielha vyvučyć, jak movu, u im možna tolki sfarmiravacca, tamu zaŭsiody budzie adčuvańnie čužaści».
Alaksiej (aliakseipankin) ź siamjoj viarnuŭsia ŭ Biełaruś paśla čatyroch hadoŭ žyćcia ŭ Polščy:
«Bolš pryčyna była ŭva mnie: ja spyniŭsia ŭ karjernym i prafiesijnym roście, patrebien byŭ pierachod na inšy ŭzrovień. Taksama žonka pieražyvała [praz] składanaść nastryfikacyi (u 2016 hodzie heta było našmat składaniej) — jana doktar. Nu i finałam stała nieabchodnaść padtrymki baćkoŭ i znosiny ź siabrami».
«Nie škaduju. U Polščy vyšejšyja zarobki, ale bolš kaštuje arenda. Ceny na mnohaje takija ž ci vyšejšyja. A rost staŭki padachodnaha padatku (u Polščy prahresiŭnaja škała. — Zaŭv. Most) pryhniataje: pa zakonie ty ŭžo bahaty paśla 120 tysiač złotych u hod — płaci 32%. Treba vučyć movu, treba vyrašać prablemy z dakumientami, kab adnojčy, mahčyma, stać hramadzianinam. A pakul žyvi na ptušynych pravach. Časta ludzi pišuć, maŭlaŭ, nie spravilisia, dali słabinu i viarnulisia. Napeŭna. A navošta stvarać sabie ciažkaści?» — ździŭlajecca alexey.mars.radziuk.
«Jak možna sumavać pa chamstvie, pa ipatecy pad 18%?»
Ale mnohija ŭdzielniki hutarki nie razumieli tych, chto viarnuŭsia ŭ Biełaruś. Čaściej za ŭsio jany źviartali ŭvahu na jeŭrapiejskuju svabodu, vysokija dachody i dobry ŭzrovień adaptacyi ŭ novym asiarodździ.
«Čatyry hady ŭ Krakavie — i ja nie viarnułasia b, navat kali b mahła! Heta adčuvańnie svabody i pavahi da čałavieka, kali nie treba šarachacca ad palicyi, kali ŭ ciabie jość pravy i ich vykonvajuć — biescenna dla mianie. Abažaju rassłablenych, uśmiešlivych jeŭrapiejcaŭ, polskija hory i mahčymaść pierasoŭvacca pa śviecie za nievialikija hrošy bieź źnievažalnych stajańniaŭ na miažy pa 10—20 hadzin», — napisała olga_welness.
«Žyvu ŭ Minsku kala dvuch miesiacaŭ. I zrazumieła, što heta nie majo — užo rychtuju dakumienty, kab viarnucca nazad u Polšču. Tak, u Polščy jość adčuvańnie, što časam addaješ bolš, čym atrymlivaješ. Ale ŭ paraŭnańni dla mianie tut [u Minsku] akazałasia bolš minusaŭ. Składana ź ludźmi — ciažka kahości kudyści vyciahnuć, usio ŭpirajecca ŭ bytavyja spravy. Nie chapaje vizuału i raznastajnaści: u Varšavie ty možaš za dzień źmianić niekalki «karcinak» — ad spakojnych rajonaŭ da hmachaŭ i staroha horada», — padzialiłasia.yes_im_so.
«Žyvu ŭ Polščy čatyry hady i kajfuju ad žyćcia tut. Nazad nie chaču. Tolki kali ŭ hości na paru tydniaŭ — i nazad. U mianie tut tancy, siabry-palaki, novaje zachapleńnie, i mienavita tut ja zajmajusia spravaj žyćcia, pra jakuju maryła šmat hadoŭ. Nie viedaju čamu, ale mienavita tut atrymała hłytok śviežaha pavietra i pačała raźvivacca», — napisała bondviktoria.
«Usie, chto piša pra viartańnie z Varšavy, prosta nie spravilisia z arendaj, nie znajšoŭšy narmalnaj pracy ci nie majučy narmalnych kampietencyj. Ale Polšča vialikaja, a na spodačku nichto ničoha nie pryniasie», — ličyć aleksei_vik.
«Jak možna sumavać pa chamstvie, pa adsutnaści mahčymaściaŭ katacca pa Jeŭropie, pa ipatecy ŭ 18%, pa poŭnaj praktyčna adsutnaści mahčymaściaŭ dla vašych dziaciej, pa kulcie asoby, pa abmiežavanym vybary praduktaŭ słabaj jakaści, nizkaj jakaści žylla, adsutnaści harantyj asabistaj biaśpieki, drennym charčavańni ŭ škołach, vielmi słabaj miedycynie, asabliva ŭ rajonnych i abłasnych centrach?» — nie razumieje serafim_ch99.
«Kožnamu svajo. Ja paśla čatyroch hadoŭ žyćcia naohuł nie ŭjaŭlaju sabie viartańnie. Ale ŭpeŭnienaja, što sprava ŭsia ŭ aklimatyzacyi, tak by mović, na novym miescy. U mianie kłasnaja praca, ja viedaju movu na ŭzroŭni C1, siabry-palaki. Kali siadzieć doma i viedać movu na ŭzroŭni pracaŭnika [kramy] «Biedronka», to ja b taksama dadomu chacieła», — adznačaje masza9049.
Karystalnik pad nikam logovaz iranična źviarnuŭ uvahu, što dla mnohich viartańnie ŭ Biełaruś prosta niebiaśpiečnaje.
«Vy ŭličvajcie, što niekatoryja z tych, chto viarnuŭsia ŭ Biełaruś, adrazu nie zmohuć vam adkazać, hadoŭ praź piać zapytajcie», — napisaŭ jon aŭtaru pytańnia pra viartańnie.
Fiodar Paŭlučenka nastojvaje: Mielnikava vyhladaje jak čałaviek paśla ciažarnaści
«Polšča stała nie taja, što raniej». Emihranty, jakija viarnulisia ŭ Biełaruś, patłumačyli čamu i padzialilisia ŭražańniami
«U hetaha pavinna być niejkaje druhoje dno». Čempijon Polščy pa boksie raptoŭna źjechaŭ u Biełaruś, kinuŭšy navat svaje ŭznaharody
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»
Kamientary