Śpikier armianskaha parłamienta: Armienija moža vyjści z ADKB i JEAES, kali Maskva budzie iści na abvastreńnie
Śpikier parłamienta Armienii Alen Simanian adreahavaŭ na infarmacyju pra žorstkija patrabavańni z boku prezidenta Rasii Uładzimira Pucina padčas pieramoŭ z premjer-ministram Armienii Nikołam Pašynianam i nie vyklučyŭ, što heta tema moža mieć dla krainy dalokasiažnyja nastupstvy.
Alen Simanian padkreśliŭ, što kali Maskva sapraŭdy pojdzie na niejkija rezkija kroki ŭ ekanamičnaj abo palityčnaj śfiery, Armienija adkaža ŭłasnym rašeńniem. Siarod mahčymych scenaryjaŭ jon nazvaŭ navat vychad z Arhanizacyi Damovy ab kalektyŭnaj biaśpiecy (ADKB) i Jeŭrazijskaha ekanamičnaha sajuza (JEAES).
U toj ža čas palityk adznačyŭ, što nie ličyć nastolki kanfliktny scenaryj vierahodnym. Pavodle jaho słoŭ, paśla abmierkavańniaŭ pamiž Uładzimiram Pucinym i Nikołam Pašynianam adbyŭsia «kanstruktyŭny i praduktyŭny» dyjałoh, jaki dazvalaje spadziavacca na vyrašeńnie sprečnych pytańniaŭ biez rezkich krokaŭ.
Asobna jon zakranuŭ temu cen na haz. Pavodle jaho, takija pieramovy pamiž Armienijaj i Rasijaj iduć užo doŭhi čas, i pytańnie koštu enierhanośbitaŭ rehularna ŭzdymajecca. Jon adznačyŭ, što kali źjaviacca kankretnyja dziejańni (naprykład, pavyšeńnie cen), urad Armienii aficyjna heta prakamientuje.
Simanian taksama padkreśliŭ, što Armienija nie źbirajecca dziejničać suprać Rasii i nie viadzie varožaj palityki. Ale pry hetym kraina budzie adstojvać svaje nacyjanalnyja intaresy — heta značyć, što ŭ lubym supracoŭnictvie Armienija budzie staracca atrymać vyhadnyja dla siabie ŭmovy:
«Padobnyja razmovy ŭžo vialisia, i kali my dojdziem da taho, što ŭbačym jakija-niebudź dziejańni, źviazanyja z hetym, ja abo pradstaŭnik urada prakamientujem situacyju. My ničoha nie rabili suprać Rasii, ničoha nie robim i ničoha nie budziem rabić, ale ŭ toj ža čas budziem abaraniać intaresy Respubliki Armienii».
«My sami prymiem heta rašeńnie». Pucin u Kramli pastaviŭ pierad Nikołam Pašynianam pytańnie rubam, toj trymaŭsia hodna
Pašynian paprasiŭ zvolnicca dyrektarku Instytuta hienacydu armian, bo jana zrabiła palityčna niapravilny padarunak vice-prezidentu ZŠA
ZŠA nakirujuć u Armieniju bolš za 13 miljardaŭ dalaraŭ inviestycyj. Heta amal pałova jaje hadavoha VUP
Kamientary