Deficyt srodkaŭ SPA ci abchadnyja maršruty: čamu abjekty ŭ Rasii pastajanna ciarpiać ad udaraŭ USU

Na hety momant jość paćvierdžanyja paviedamleńni pra mocnyja pažary i razbureńni jak minimum u dzieviaci łakacyjach — u Prymorsku, Uść-Łuzie i Kiryšach Leninhradskaj vobłaści, Jarasłaŭli i Ufie, u Kstovie Nižaharodskaj vobłaści, Taljaci i Čapajeŭsku Samarskaj vobłaści, Novarasijsku.

Bolšaść paciarpiełych abjektaŭ źviazanaja z naftavaj infrastrukturaj, niekatoryja ź ich byli atakavanyja pa niekalki razoŭ — tak, pa marskim porcie i naftavym terminale va Uść-Łuzie było naniesiena piać udaraŭ.

Akramia taho, u noč na 8 krasavika ŭkrainskija bieśpiłotniki atakavali naftabazu ŭ Fieadosii ŭ anieksavanym Krymie.

Čutki pra alternatyŭnyja maršruty

U paniadziełak, 6 krasavika, pradstaŭnica MZS RF Maryja Zacharava pryhraziła pryniać miery suprać krain Bałtyi, faktyčna abvinavaciŭšy ich u rašeńni adkryć pavietranuju prastoru dla pralotu ŭkrainskich bieśpiłotnikaŭ, jakija atakujuć rasijskija abjekty.

«Hetym krainam było zroblena adpaviednaje papiaredžańnie. Kali ŭ hetych režymaŭ, hetych krain rozumu chopić, jany prysłuchajucca. Kali nie, buduć mieć spravu z adkazam», — cytavaŭ Zacharavu «Interfaks».

Ale adkul uzialisia hetyja zajavy pra nibyta adkryćcio nieba dla ŭkrainskich dronaŭ krainami Bałtyi?

Minabarony Rasii, čyje srodki sačeńnia mohuć kantralavać pavietranuju prastoru sumiežnych krain — členaŭ NATA, padobnych zajaŭ nie rabiła.

Adnym ź pieršych z takim śćviardžeńniem vystupiła rasijskaje praŭładnaje vydańnie Mash. U paviedamleńni ad 26 sakavika jano zajaviła, što drony USU stali lotać da rasijskich partoŭ na Bałtycy nie zvykłym karotkim šlacham — z poŭnačy Čarnihaŭskaj abo Sumskaj vobłaści, uzdoŭž miažy ź Biełaruśsiu, Łatvijaj i Estonijaj, a nibyta pa alternatyŭnym maršrucie — praz Polšču, Łatviju, Litvu, Estoniju i akvatoryju Bałtyjskaha mora.

Nijakich paćviardžeńniaŭ skazanamu abo spasyłak na krynicu Mash nie pryvioŭ. Tym nie mienš, mnohija Z-błohiery padchapili hetu viersiju i stali raspaŭsiudžvać jaje nibyta jak dakazany fakt. A 31 sakavika čutki prakamientavaŭ pres-sakratar Kramla Dźmitryj Piaskoŭ. Nie aceńvajučy dakładnaść infarmacyi, jon skazaŭ, što, kali krainy ES daduć svaju pavietranuju prastoru dla naniasieńnia ŭdaraŭ pa terytoryi Rasii, heta vymusić Maskvu pryniać miery ŭ adkaz.

Ułady Łatvii i Estonii zajavili, što infarmacyja rasijskich ŚMI pra dazvoł na vykarystańnie pavietranaj prastory ŭkrainskimi BPŁA nie adpaviadaje rečaisnaści.

«Takimi zajavami Rasija demanstruje svaju słabaść i sprabuje adciahnuć uvahu ad taho fakta, što jana nie ŭ stanie zaścierahčy siabie ad paśpiachovych ukrainskich kontratak, nakiravanych na rasijskuju infrastrukturu ŭzdoŭž uźbiarežža Bałtyjskaha mora», — adreahavała MZS Łatvii.

Bałtyjskija krainy i nie mahli ŭ adnabakovym paradku vydać dazvoł na pralot ukrainskich dronaŭ, piša telehram-kanał «Možiem objaśniť»: ich nieba achoŭvaje śpiecyjalnaja misija NATA — Baltic Air Policing, u joj udzielničaje bajavaja avijacyja roznych krain — členaŭ Aljansu.

«Heta značyć, dazvoł na pralot ukrainskich BPŁA patrabavaŭ by ŭzhadnieńniaŭ na ŭzroŭni ŭsiaho NATA: takoje rašeńnie nielha pryniać tajna i jano nie zastałosia b niezaŭvažanym zachodnimi ŚMI», — adznačaje vydańnie.

Vyklikaje vialikija sumnievy i mahčymaść niezaŭvažnaha dla žycharoŭ adrazu čatyroch krain Uschodniaj Jeŭropy pralotu takoj vialikaj kolkaści dronaŭ — u atakach na rasijskija party i naftazavody ŭ Leninhradskaj vobłaści ŭdzielničali sotni bajavych adzinak.

Razam z tym padčas ukrainskich atak niekalki bieśpiłotnikaŭ upali na terytoryi krain Bałtyi. Ułady Łatvii i Estonii zajavili, što jany zalacieli z rasijskaha boku, heta značyć, ruchalisia pa svaim zvyčajnym maršrucie. Jašče dva ŭkrainskija drony ŭpali ŭ Finlandyi, prykładna za 100 km ad atakavanaha Prymorska.

Ukraincy prynieśli prabačeńni, ale vykazali svaju viersiju taho, što adbyłosia: nibyta Rasija naŭmysna pieranakiroŭvaje drony ŭ krainy Bałtyi z dapamohaj srodkaŭ radyjoelektronnaj baraćby. Maskva hetaje śćviardžeńnie nie kamientavała.

Dalokija drony mohuć adchilacca ad celi nie tolki pad uździejańniem REB, ale i pa inšych techničnych pryčynach. Pry masiravanych nalotach heta adbyvajecca davoli časta.

Padčas udaraŭ pa zachodniaj Ukrainie rasijskija BPŁA nie raz zalatali ŭ Polšču, Małdovu i Rumyniju. U vieraśni 2025 hoda kamandavańnie NATA padymała ŭ pavietra źniščalniki i viertaloty dla adbićcia nalotu amal dvuch dziasiatkaŭ dronaŭ, jakija ŭvarvalisia ŭ pavietranuju prastoru Polščy.

Paśla incydentaŭ z padzieńniami ŭkrainskich dronaŭ Estonija rekamiendavała Ukrainie źmianić maršruty palotaŭ dla atak na rasijskija party — vybirać kalidory dalej ad estonskich miežaŭ.

Pavialičyć

«Adnymi tolki «Pancyrami» nie abyścisia»

Viersijaj pra vykarystańnie USU abchadnoha maršrutu dronavych atak pa rasijskich partach i NPZ ŭ Leninhradskaj vobłaści patłumačyć rost ich vynikovaści nie atrymlivajecca: adčuvalnyja ŭdary iduć i pa inšych stratehičnych abjektach na roznych kirunkach.

Jak vidać pa karcie, pierakłaści adkaznaść na trecija krainy za niaŭdačy rasijskaj SPA ŭ centralnych rehijonach, na Kubani i ŭ Pavołžy budzie prablematyčna. I heta tolki bujnyja pradpryjemstvy, atakavanyja z 22 sakavika. Paviedamleńni pra vybuchi i pažary ŭ Rasii i na akupavanych ukrainskich terytoryjach stali rehularnymi.

Pavialičyć

«Praciŭnik, vybivajučy srodki SPA/SRA ŭ Krymie, pierachodzić na našy rakietnyja kompleksy i RSZA. Aktyŭnaść jaho BPŁA i BEKaŭ (biezekipažnych kataraŭ — Bi-bi-si) u Čarnamorskaj akvatoryi nie słabieje — pad udarami i Sievastopal, i Novarasijsk. I taksama idzie palavańnie na adzinočnyja — cyvilnyja (!) karabli ŭ Čornym i Azoŭskim marach. Čarnamorski fłot rehularna atakujuć u havaniach, i zychodziačy z hetaha možna kanstatavać, što inicyjatyva ŭ akvatoryi, na žal, nam nie naležyć», — piša rasijski vajenkar, hałoŭred vydańnia «Siehodnia.ru» Juryj Kacianok.

Udary z vykarystańniem dalnabojnych BPŁA naroščvajuć i rasijskaja, i ŭkrainskaja armii. Pry hetym u sakaviku, pavodle aficyjnych danych bakoŭ, Ukraina ŭpieršyniu za hady vajny pieraŭzyšła Rasiju pa kolkaści zapuščanych dalokich bieśpiłotnikaŭ.

Pavietranyja siły Ukrainy zajavili, što na praciahu sakavika byli źbityja 5833 rasijskija bieśpiłotniki z 6462 zapuščanych. A Minabarony Rasii adspravazdačyłasia pra 7347 źbitych ukrainskich dronaŭ, kolkaść zapuščanych/prapuščanych rasijskaje abaronnaje viedamstva, jak zvyčajna, nie paznačaje.

Na fonie rostu kolkaści atak ukrainskich dronaŭ deep-strike rasijskija vajskovyja błohiery ŭsio čaściej stali skardzicca na niedachop rakiet suprać ich.

«Nahruzka na SPA budzie tolki raści, i adnymi tolki «Pancyrami» va ŭmovach deficytu ZKR (zienitnych kiravanych rakiet — Bi-bi-si) nie abyścisia. Kanflikt na Blizkim Uschodzie pakazaŭ, da čaho moža pryvieści spadziavańnie tolki na ZRK (zienitna-rakietnyja kompleksy — Bi-bi-si)», — žalacca aŭtary kanała «Śvidietieli Bajraktara», karespandenty «RIA Novosti» Siarhiej Šyłaŭ i RT Alaksandr Charčanka.

«Praciŭnik damohsia ŭ lutym—sakaviku niemałych pośpiechaŭ u źniščeńni našaj SPA», — pryznaje kiraŭnik Kaardynacyjnaha centra dapamohi Navarosii Alaksandr Lubimaŭ.

«Jak nastustva papiaredniaha faktara (ale nie tolki jaho) jamu ŭdałosia nanieści šerah vielmi surjoznych udaraŭ (Votkinski zavod, Prymorsk, Uść-Łuha, Kiryšy, Vybarh i hetak dalej). Udarami pa Uść-Łuzie i Prymorsku jon u značnaj stupieni abnuliŭ našy vyhady ad pavyšeńnia suśvietnych cen na naftu. Prahrama vytvorčaści rakiet i dronaŭ dalokaha radyusa dziejańnia ŭ voraha imkliva raźvivajecca, i praź niekalki miesiacaŭ rakietnyja ŭdary, padobnyja da Prymorska, stanuć kudy bolš častymi», — prahnazuje Lubimaŭ.

Pavialičyć

«Apošniaja miaža abarony — jana ž i adzinaja»

Zaraz Rasija sutyknułasia z tymi ž ciažkaściami, što i Ukraina dva-try hady tamu, kali naloty rasijskich «šachiedaŭ» stali masavymi. Užo tady było zrazumieła, što adnymi zienitnymi rakietami prablemu nie vyrašyć — jany zanadta darahija, nivodnaja kraina śvietu nie vyrablaje ich u kolkaści, dastatkovaj dla adbićcia atak tysiač paraŭnalna tannych bieśpiłotnikaŭ.

Da taho ž z-za imklivaha raźvićcia vytvorčaści ŭkrainskich dronaŭ, asabliva siaredniaj dalokaści dziejańnia — da 200 km, rasijskaja armija niasie vialikija straty frantavoj i pryfrantavoj SPA, jana vymušanaja pastajanna pierakidać radary i puskavyja ŭstanoŭki bližej da zony kanfliktu dla prykryćcia vojskaŭ, ahalajučy abaronu nieba na inšych učastkach.

U Rasii vielizarnaja terytoryja i vielmi šmat bujnych uraźlivych abjektaŭ. Miarkujučy pa tym, što pišuć Z-błohiery, Rasii krytyčna nie chapaje sił i srodkaŭ u hłybini jaje terytoryi, sucelnaja zanalnaja SPA faktyčna adsutničaje, adnosna nadziejna prykryvajucca tolki najbolš bujnyja administracyjnyja centry i važnyja vajskovyja i pramysłovyja abjekty.

Ale i ščylnaja abjektavaja SPA nie zaŭsiody zdolnaja adbić masiravany nalot.

«Asnoŭnaja ciažkaść, ź jakoj sutyknulisia našy tam (va Uść-Łuzie — Bi-bi-si) — heta adbićcio atak z boku zaliva. Pakolki abjekty znachodziacca prosta na bierazie, pry takoj trajektoryi apošniaja miaža abarony (prosta na terytoryi abjekta) — jana ž i adzinaja, — piša rasijski vajskovy palittechnołah Alaksiej Čadajeŭ. — Tak nie pavinna być. Prostaje praviła: abarona pavinna być ešałanavanaj, miežaŭ pavinna być bolš za adnu. Patrebnaja chacia b plus jašče adna vyniesienaja napierad, chaj na niekalki kiłamietraŭ, miaža abarony».

Z anałahičnymi prablemami sutykajucca čarnamorskija partovyja harady — ukrainskaja Adesa, rasijski Novarasijsk — pry atakach BPŁA z boku mora.

«Dalnaloty — štuki vialikija, ciažkija i niedarahija. I pry hetym navat zaraz dastatkova ŭpeŭniena źbivajucca dronami-pierachopnikami — kudy bolš kampaktnymi, šustrymi i tannymi. I ŭsio, što treba dla taho, kab škodu ad nalotaŭ źvieści da minimumu — rabić šmat pierachopnikaŭ, treniravać MAHi (mabilnyja ahniavyja hrupy — Bi-bi-si) i naładzić narešcie svoječasovaje vyjaŭleńnie, jak heta daŭno ŭžo zrabiŭ praciŭnik sa svajoj sietkaj akustyčnych datčykaŭ», — raić rasijski ekśpiert.

Nie idealny, ale najlepšy

Jak i Ukraina, Rasija raspracoŭvaje i ŭkaraniaje drony-pierachopniki. Samy raspaŭsiudžany z tych, što stajać na ŭzbrajeńni rasijskaj armii — partatyŭny dron «Jołka» — maje nieadnaznačnuju reputacyju.

Z adnaho boku, pra jaho možna znajści šmat chvalebnych vodhukaŭ:

«Jołku» nielha nazvać idealnaj, ale na hety momant heta najlepšaje antydronavaje prystasavańnie, jakoje ŭžyvajecca na frantach SVA», — piša rasijski prapahandyst Dźmitryj Ściešyn.

Ź inšaha boku, na dumku ekśpiertaŭ, rasijskaja raspracoŭka značna adstaje pa charaktarystykach i jakaści ad ukrainskich madelaŭ.

Pavialičyć

«Na spravie dron adčuvalny da umoŭ nadvorja, pierapadaŭ tempieratury, zachoplivaje cel, jakaja ruchajecca z chutkaściu da 80 km/h, u advarotnym vypadku jaho prymianieńnie naŭzdahon maje nizkuju paśpiachovaść. Akramia taho, dron nie lubić doždž, mocny viecier, pryciemak i jarkaje soniečnaje śviatło. Pra vykarystańnie drona nočču i zusim havorki nie idzie», — havoryć ukrainski vajskovy ekśpiert Alaksandr Kavalenka.

Siarod niedachopaŭ «Jołki» adznačajuć taksama abmiežavany siektar strełu, nievysoki resurs batarei, nievialikuju vyšyniu i dalokaść palotu, doŭhi čas padrychtoŭki da pusku.

Dapracoŭki rasijskich supraćdronavych uzbrajeńniaŭ iduć, ale hetaha mała. Dla paśpiachovaha supraćdziejańnia ŭkrainskim udarnym bieśpiłotnikam patrabujucca nie tolki pierachopniki, ale i spadarožnaje abstalavańnie — nadziejnaja suviaź, sistemy vyjaŭleńnia i sačeńnia, akustyčnyja datčyki, jakija vyjaŭlajuć BPŁA i rakiety (va Ukrainy ich užo dziasiatki tysiač), punkty kiravańnia FPV-dronami.

Na stvareńnie takoj vajskovaj infrastruktury patrabujucca značnyja resursy i, hałoŭnaje, čas.

• 10
• 0
• 1
• 0
• 0
• 0
• 0
• 0