Italija zabaraniła musulmanskija burki ŭ škołach

Urad Italii ŭchvaliŭ zabaronu na našeńnie ŭ škołach musulmanskaj burki i nikaba, a taksama abmiežavaŭ dolu vučniaŭ, jakija niedastatkova dobra vałodajuć italjanskaj movaj, u kłasach — jana nie pavinna pieravyšać 30%, piša Bi-bi-si.

Premjer-ministr Džordža Miełoni nazvała hetyja miery «razumnymi krokami, jakija nie raźjadnoŭvajuć, a sapraŭdy dapamahajuć intehracyi».

«U škołu treba prychodzić z adkrytym tvaram», — zajaviła Miełoni, abviaščajučy pra płany ŭrada ŭ niadzielu.

Jana dadała, što nichto nie maje prava vyrašać za dziaŭčynu, što jana pavinna chavać tvar, spasyłajučysia na tradycyi.

Ministr adukacyi Džuzepe Valdzitara zajaviŭ, što ŭstanoŭleny limit maje «vyklučna moŭny», a nie hramadzianski charaktar. Zabaronu na nikab i burku jon pradstaviŭ jak mieru, nakiravanuju na zabieśpiačeńnie hiendarnaj roŭnaści.

Zabarona datyčycca burki i nikaba, jakija zakryvajuć tvar, ale nie chidžaba, jaki pakidaje tvar adkrytym. Nikab zakryvaje tvar, za vyklučeńniem absiahu vakoł vačej, i zvyčajna nosicca razam z chustkaj. Burka — sucelnaje adzieńnie, jakoje zakryvaje tvar i cieła; u absiahu vačej zvyčajna znachodzicca sietkavataja ŭstaŭka.

Pavialičyć

Pavodle dadzienych daśledčaha centra Fondazione ISMU, vučni bieź italjanskaha hramadzianstva składajuć 11,6% usich školnikaŭ krainy. Praviła ab 30%-m limicie budzie prymianiacca pa-roznamu ŭ zaležnaści ad stupieni navučańnia.

U pačatkovaj škole jano budzie tyčycca dziaciej bieź italjanskaha hramadzianstva, jakija naradzilisia za miežami krainy abo nie naviedvali dziciačy sad jak minimum dva hady. U siaredniaj i starejšaj škole — vučniaŭ bieź italjanskaha hramadzianstva, jakija nie skončyli paśpiachova navučańnie ŭ italjanskaj sistemie adukacyi jak minimum na praciahu troch hadoŭ.

Miascovyja orhany kiravańnia adukacyjaj pavinny buduć bolš raŭnamierna raźmiarkoŭvać vučniaŭ ź niedastatkovym viedańniem italjanskaj movy pamiž najbližejšymi škołami. Tam, dzie heta niemahčyma, praduhledžanyja vyklučeńni i dadatkovyja zaniatki pa italjanskaj movie. Jak vykazaŭsia Valdzitara, meta hetaj miery — paźbiehnuć źjaŭleńnia tak zvanych «kłasaŭ-hieta».

Zakonaprajekt taksama tyčycca baćkoŭ školnikaŭ.

Pavodle dadzienych infarmacyjnaha ahienctva Ansa, škoły buduć abaviazanyja paviedamlać u sacyjalnyja słužby pra vypadki, kali ŭstojlivy moŭny barjer u baćkoŭ abo inšych asob, jakija niasuć baćkoŭskuju adkaznaść, pieraškadžaje intehracyi dziciaci. Pry hetym baćkam prapanujuć biaspłatnyja kursy italjanskaj movy.

Apazicyja ličyć, što novyja miery pradyktavanyja chutčej palityčnymi mierkavańniami, čym intaresami škoł. Jaje pradstaŭniki abvinavačvajuć urad Miełoni ŭ sprobie zaihryvać z Rabierta Vanačy — hienierał u adstaŭcy, jaki ŭznačalvaje ultrapravuju partyju Futuro Nazionale («Nacyjanalnaja budučynia») i ŭsprymajecca jak pahroza dla pravaha fłanhu kiroŭnaj kaalicyi.

• 10
• 0
• 0
• 0
• 0
• 0
• 0
• 0