Flo ŭznačaliła top-100 najlepšych spažyvieckich techkampanij Jeŭropy
Flo zaniała pieršaje miesca ŭ debiutnym rejtynhu Sifted Consumer 100. Heta pieršy štohadovy śpis praryŭnych jeŭrapiejskich spažyvieckich startapaŭ, jaki aceńvaje tempy pryciahnieńnia inviestycyj, rost kamandy, załučanaść aŭdytoryi i jaje davier da brenda, piša Devby.
Pieramožcu abviaścili na cyrymonii SXSW u Łondanie. Žury aceńvała naminantaŭ pa troch klučavych kryteryjach: achop (nakolki masava pradukt pryniaty rynkam), zvyčka (nakolki hłyboka jon ubudavany ŭ paŭsiadzionnaje žyćcio karystalnikaŭ) i chajp (kulturny impuls vakoł brenda). Na dumku ekśpiertaŭ Sifted, dadatku ź biełaruskimi karaniami ŭdałosia zrabić hałoŭny pierachod — ź nišavaha praduktu pieratvarycca ŭ zvykłuju normu žyćcia dla miljonaŭ.
«Asabliva značnym hetaje pryznańnie robić toje, što jano havoryć pra budučyniu žanočaha zdaroŭja. Zanadta doŭha industryja technałohij ihnaravała hetuju śfieru. Siońnia bolš za 81 młn čałaviek štomiesiac daviarajuć Flo, … davodziačy, što žanočaje zdaroŭje — heta nie nišavaja katehoryja, a važnaja častka paŭsiadzionnaha žyćcia», — adznačyła findyrektar Flo Health Tamara Arłova.
Akramia ŭražvajučaj bazy MAU, klučavym faktaram pieramohi Flo na jeŭrapiejskim rynku stała biesprecedentnaja biaśpieka dadzienych, adznačajecca ŭ pres-relizie, pryśviečanym hetamu dasiahnieńniu. Płatforma zastajecca adzinym femtech-dadatkam, jaki štohod paćviardžaje dvajnuju niezaležnuju siertyfikacyju biaśpieki (ISO 27001) i kiravańnia kanfidencyjalnaściu (ISO 27701, niepasredna źviazanuju z patrabavańniami GDPR). A raspracavany kampanijaj «ananimny režym», abaronieny postkvantavym šyfravańniem, dazvalaje adsočvać mienstrualnyja cykły i ciažarnaść biez pryviazki da asabistych identyfikataraŭ karystalnika.
Trapleńnie ŭ rejtynh asabliva kaštoŭnaje z ulikam statusu vydańnia. Sifted byŭ stvorany pry padtrymcy Financial Times i źjaŭlajecca viadučym jeŭrapiejskim miedyja pra technałohii i startapy, pa jakim inviestary i zasnavalniki sočać za inavacyjami ŭ rehijonie. Ich analitycy daviarajuć top-mieniedžary i najbujniejšyja fondy, tamu pryznańnie ad takoj redakcyi — znak jakaści dla luboha startapa na mižnarodnaj arenie.
***
Flo — heta IT-kampanija, jakuju stvaryli biełarusy. Jana dabiłasia pośpiechu, raspracavaŭšy papularny dadatak dla žanočaha zdaroŭja.
Hałoŭny ofis kampanii ciapier mieścicca ŭ Vilni, štab-kvatera — u Łondanie, pradstaŭnictvy — u Niderłandach i ZŠA. Minski ofis ciapier zakryty.
Flo — druhaja kampanija-adnaroh ź biełaruskimi karaniami. Pieršaj u 2021 hodzie stała PandaDoc.
Kamientary