Kolki času treba, kab znajomy staŭ sapraŭdnym siabram? Navukoŭcy dajuć adkaz

Sapraŭdnaje siabroŭstva ličać adnoj z samych składanych form čałaviečych adnosin. Jano zaležyć ad davieru, ahulnych pieražyvańniaŭ, uzajemnaj padtrymki i mnostva inšych faktaraŭ, jakija ciažka vymierać. Ale ci možna chacia b prykładna acanić, kolki času patrabujecca, kab pamiž dźviuma asobami ŭźnikła blizkaja suviaź?

Mienavita na hetaje pytańnie, jak piša Focus.de, pasprabavaŭ adkazać prafiesar kamunikacyi Džefry Choł (Jeffrey Hall) z Univiersiteta Kanzasa (ZŠA). U svaim daśledavańni jon vykarystaŭ dva roznyja padychody, jakija dazvolili prasačyć, jak novyja znajomstvy pastupova pieratvarajucca ŭ siabroŭstva.

Jak prachodziła daśledavańnie

U pieršaj častcy daśledavańnia ŭdzielničali 355 darosłych, jakija niadaŭna źmianili miesca žycharstva i paznajomilisia z novymi ludźmi. Ich paprasili vybrać adnaho čałavieka, ź jakim jany niadaŭna paznajomilisia, acanić, kolki hadzin užo praviali razam, a taksama vyznačyć, na jakoj stadyi znachodziacca hetyja adnosiny — ci heta prosta znajomy, pryjaciel, siabar abo blizki siabar.

Kab kampiensavać mahčymyja niedakładnaści, źviazanyja z uspaminami ŭdzielnikaŭ, daśledčyk pravioŭ i druhuju častku daśledavańnia. Na praciahu pieršych dzieviaci tydniaŭ navučańnia va ŭniviersitecie jaho kamanda nazirała za 112 studentami-pieršakurśnikami.

Apytańni pravodzilisia na trecim, šostym i dziaviatym tydniach. Studenty paviedamlali, z kim z novych znajomych bavili čas, kolki času heta zajmała, pra što jany razmaŭlali i aceńvali, nakolki blizkimi stali hetyja adnosiny.

Jakija vyniki?

Na padstavie atrymanych danych daśledčyk vyznačyŭ prykładnuju kolkaść času, jakaja patrebnaja dla pierachodu na kožny nastupny etap adnosin.

U siarednim ad znajomstva da pryjacielskich stasunkaŭ patrabujecca kala 40—60 hadzin.

Kab čałavieka ŭžo možna było nazvać siabram, nieabchodna pravieści razam prykładna 80—100 hadzin.

A blizkaje abo najlepšaje siabroŭstva, jak praviła, farmujecca paśla 200 i bolš hadzin sumiesnaha času.

Adnak daśledavańnie pakazała, što značeńnie maje nie tolki kolkaść, ale i toje, jak ludzi baviać hety čas.

Džefry Choł źviartaje ŭvahu na roźnicu pamiž tak zvanymi «zakrytymi sistemami» — pracaj, škołaj abo ŭniviersitetam, dzie ludzi časta apynajucca pobač nie z ułasnaha vybaru, — i sustrečami ŭ volny čas. Prostaha supolnaha znachodžańnia ŭ ofisie abo aŭdytoryi niedastatkova, kab uźnikła sapraŭdnaje siabroŭstva.

Sapraŭdnamu zbližeńniu, pavodle daśledavańnia, spryjajuć niefarmalnyja kantakty: fizičnaja praca razam, supolnyja zachapleńni, udzieł u kulturnych inicyjatyvach, sumiesnyja zaniatki sportam, prahlad filmaŭ ci inšyja zaniatki, jakija ludzi vybirajuć dobraachvotna.

Akramia ahulnaj kolkaści hadzin, vialikaje značeńnie maje i napaŭnieńnie razmoŭ. Najmacniej raźvićciu siabroŭstva spryjajuć ščyryja hutarki, padčas jakich ludzi dzielacca padziejami svajho žyćcia, dumkami i pieražyvańniami.

U toj ža čas praciahły pieryjad paviarchoŭnych razmoŭ, viadomych jak «small talk», moža navat zatarmazić raźvićcio stasunkaŭ. Kali kamunikacyja doŭha zastajecca na ŭzroŭni farmalnaściej, imaviernaść uźniknieńnia hłybokaj prychilnaści istotna źnižajecca.

Niahledziačy na atrymanyja ličbavyja pakazčyki, aŭtar daśledavańnia padkreślivaje, što siabroŭstva zastajecca składanaj i šmathrannaj źjavaj. Časavyja miežy źjaŭlajucca, chutčej, aryjencirami, bo ŭ kožnaha čałavieka svoj temp zbližeńnia. Adnak asnoŭny vynik navukovaj pracy zastajecca niaźmiennym: dla stvareńnia mocnaj suviazi niedastatkova prosta sustreć «svajho» čałavieka — nieabchodna znajści čas, kab napoŭnić hetyja adnosiny sumiesnym dośviedam i ščyrymi razmovami.

• 1
• 0
• 1
• 1
• 0
• 0
• 0
• 1