Jak časta treba sustrakacca ź siabrami, kab dobra siabie adčuvać? I pry čym tut pachi?

U niadaŭnim daśledavańni navukoŭcy praanalizavali danyja amal 13 tysiač dobraachvotnikaŭ, vyvučyŭšy nie tolki kolkaść ich siabroŭ, ale i toje, ci bačylisia jany ź imi. Atrymanyja vyniki havorać pra toje, što prynamsi adzin asabisty kantakt ź siabrami ŭ tydzień byŭ mocnym faktaram palapšeńnia fizičnaha i psichičnaha zdaroŭja, piša The Washington Post.

Jak adznačaje adzin z aŭtaraŭ daśledavańnia prafiesar psichałohii Univiersiteta Brytanskaj Kałumbii Eryk Kim, zvanki ci tekstavyja paviedamleńni nie mieli anałahičnaha ŭpłyvu.

Ludzi — sacyjalnyja žyvioły, i znachodžańnie ŭ pryjaznym asiarodździ inšych ludziej źnižaje ryzyku išemičnaj chvaroby serca, insultu, dyjabietu 2 typu, chvaroby Alchiejmiera i navat raku.

Adna z pryčyn, pa jakoj siabroŭstva tak važna dla zdaroŭja, davoli prostaja. Siabry, pa słovach navukoŭca, zaachvočvajuć zajmacca sportam ci jeści zdarovuju ježu, a taksama mohuć dać važnuju infarmacyju, naprykład pra toje, dzie zrabić pryščepku ad hrypu.

Šerah daśledavańniaŭ acanili niespryjalnyja nastupstvy adzinoty i sacyjalnaj izalacyi dla zdaroŭja i dabrabytu. Naprykład, było vyjaŭlena, što adzinota źviazanaja z pavyšanaj ryzykaj raźvićcia išemičnaj chvaroby serca na 29%.

Inšyja daśledavańni pakazali, što ŭ ludziej, jakija sacyjalna izalavanyja, vypracoŭvajecca bolš kartyzołu (harmonu, jaki rehuluje stres u arhaniźmie) na praciahu dnia, jaki źviazany z sardečna-sasudzistymi zachvorvańniami i pavyšanaj ryzykaj śmiarotnaści ŭ cełym.

Navukoŭcy źviartajuć uvahu na toje, što pieravaha niepasrednych znosin moža być źviazanaja z pacham.

Navukovyja ekśpierymienty demanstrujuć, što, ułoŭlivajučy pachi cieła inšych ludziej, my možam pieraniać ich emocyi ad tryvohi i strachu da ščaścia.

Jak śćviardžaje śpiecyjalist pa sacyjalnaj i kulturnaj psichałohii Instytuta vyvučeńnia pavodzin Univiersiteta imia Radboda ŭ Niderłandach Džaśpier de Hrot, znosiny praz pach cieła adbyvajucca ŭ asnoŭnym na padśviadomym uzroŭni i tamu jany mohuć być u peŭnych vypadkach bolš ščyrymi, čym słovy.

Pavialičyć

Pavodle jaho słoŭ, hetaja rola pachaŭ u adčuvańni emocyj inšych ludziej moža dapamahčy rastłumačyć, čamu ludzi z bolš adčuvalnymi nasami, jak pakazała daśledavańnie, schilnyja mieć značnuju kolkaść siabroŭ i mienš pakutavać ad adzinoty.

Navukoŭcy śćviardžajuć, što kali my pravodzim čas ź siabrami i svajakami tvaram da tvaru, niejronnaja aktyŭnaść u našym mozhu moža sinchranizavacca, što pryvodzić da prajavy bolšaj dabryni ŭ adnosinach da inšych, lepšaha ŭzajemadziejańnia i razumieńnia. A voś kali my pierapisvajemsia abo majem znosiny ŭ videačacie, takoj sinchranizacyi amal nie adbyvajecca.

Siabroŭski dotyk taksama moža być mahutnym abiazbolvajučym. Tak zvanyja C-taktylnyja vałokny — typ niervovych vałoknaŭ u skury čałavieka — reahujuć na pavolnyja pahładžvańni, pasyłajučy sihnały ŭ mozh, jakija pamianšajuć pačućcio bolu.

Taki efiekt byŭ vyjaŭleny jak pry praviadzieńni balučych miedycynskich pracedur, tak i pry chraničnych zachvorvańniach, takich jak chvaroba Parkinsana.

Jašče adno daśledavańnie pakazała, što asabistaja sustreča ź siabrami palapšaje funkcyjanavańnie hienaŭ, źviazanych ź imunnaj sistemaj. Takija pieravahi, adnak, nie naziralisia ŭ tych, chto mieŭ znosiny tolki sa svaimi siabrami ŭ internecie.

Takim čynam, dla hłybokaj suviazi i karyści dla zdaroŭja nieabchodny asabisty kantakt chacia b raz na tydzień.

• 10
• 0
• 0
• 2
• 1
• 2
• 1
• 0