«Majo serca raźbita». Ed Šyran vybačyŭsia paśla skandału z adchileńniem repiera Makłmora praz prapaleścinskija łozunhi

Brytanski śpiavak Ed Šyran daŭ svoj pieršy kancert paśla skandału z repieram Makłmoram, jakoha vyklučyli sa składu muzykaŭ, što vystupali na razahrevie, praz łozunhi ŭ padtrymku paleścincaŭ. Šyran zajaviŭ, što dapuściŭ pamyłki, i prakamientavaŭ kanflikt na Blizkim Uschodzie, piša Bi-bi-si.

«Ja nikoli nie chacieŭ być muzykam-aktyvistam, ale praz hetuju situacyju apynuŭsia ŭ samym centry važnaj i vostraj sprečki pra svabodu słova i pra samuju składanuju palityčnuju prablemu na płaniecie», — skazaŭ Šyran u pačatku svajho kancerta ŭ Fiładelfii.

Na pieršym kancercie tura Loop Tour, jaki adbyŭsia ŭ Ńju-Džersi 4 vieraśnia, amierykanski repier Makłmor, jaki vystupaŭ na razahrevie, vykryknuŭ: «Svabodu Paleścinie!»

Jon zrabiŭ heta, pradstaŭlajučy svaju pieśniu 2024 hoda Hind's Hall, pryśviečanuju pamiaci piacihadovaj dziaŭčynki, jakaja zahinuła padčas nastupleńnia izrailskich vajskoŭcaŭ u siektary Haza.

U hetaj pieśni muzykant taksama padtrymlivaje studentaŭ, jakija pratestavali suprać dziejańniaŭ Izraila ŭ Kałumbijskim univiersitecie.

Na druhim kancercie, na nastupny dzień, Makłmor źviarnuŭsia da «jaŭrejskich bratoŭ i siaścior». «Krytyka Izraila, krytyka aparteidu, niazhoda z hienacydam — heta ni ŭ jakim razie nie krytyka vas asabista», — skazaŭ jon.

Ułady Izraila nieadnarazova adchilali abvinavačańni ŭ aparteidzie i arhanizacyi hienacydu ŭ Hazie.

Pavodziny repiera vyklikali krytyku z boku praizrailskich hrup, u tym liku pietycyju z patrabavańniem adchilić Makłmora ad dalejšych kancertaŭ tura.

Pavialičyć

Zatym vystupy Makłmora ŭ miežach tura admianili, a miljarder Robiert Kraft zapatrabavaŭ nie dapuścić vystupleńnia repiera na stadyjonie, jaki jamu naležyć. Kraft, jaki naležyć da amierykanskaj jaŭrejskaj supolnaści i padtrymlivaje Izrail, abvinavaciŭ repiera ŭ raspalvańni nianaviści. Jon zajaviŭ, što toj «tolki raspaŭsiudžvaje vybaračnuju infarmacyju i ihnaruje dziejańni CHAMAS».

Praciah skandału: što jašče skazaŭ Šyran

Paśla hetaha ŭsie artysty, jakija pavinny byli vystupać na razahrevie na kancertach Šyrana, admovilisia ad dalejšaha ŭdziełu ŭ tury, vykazaŭšy salidarnaść z repieram.

U vyniku hetaha skandału ceny na kvitki byli źnižanyja, a prodažy na astatniuju častku tura Šyrana pa ZŠA ŭpali. Šyran, jaki raniej addavaŭ pieravahu nie vykazvacca na temu paleścinska-izrailskaha kanfliktu, patłumačyŭ, što sprabavaŭ znajści kampramis u situacyi z repieram. Jon dadaŭ, što Makłmor zaklučaŭ kantrakt na vystupleńni z kampanijaj — pramoŭtaram tura, i rašeńnie ab jaho adchileńni pryniała mienavita jana.

Adnak na subotnim kancercie ŭ Fiładelfii Šyran bolš padrabiazna patłumačyŭ svaju pazicyju adnosna vajny na Blizkim Uschodzie.

Jon skazaŭ publicy, što pryvyk da krytyčnych kamientaryjaŭ u adras svajoj muzyki, ale «na hetym tydni krytyka tyčyłasia čahości značna bolš važnaha».

«Mnie daviałosia prymać składanyja rašeńni — ja dapuskaju pamyłki — i mnie vielmi, vielmi škada», — zajaviŭ śpiavak.

Jon taksama skazaŭ, što choča rastłumačyć, «jakaja maja pazicyja ŭ situacyi ź Izrailem i Paleścinaj i ci aznačaje moj siońniašni kancert, što ja prytrymlivajusia takoj pazicyi».

«Na praciahu ŭsioj svajoj karjery ja staraŭsia nie vystupać u roli palityčnaha kamientatara, tamu što chaču, kab maja muzyka i vystupleńni spryjali adzinstvu, a nie raskołu, — praciahnuŭ jon. — Ale heta humanitarnaje pytańnie, i ja bolš nie mahu chavać svaje pačućci z hetaj nahody».

Šyran nazvaŭ napady CHAMAS na Izrail 7 kastryčnika 2023 hoda «žachlivymi i takimi, što pahoršyli šmatviakovyja pakuty jaŭrejskaha naroda». Ale pry hetym jon apisaŭ situacyju ŭ siektary Haza jak «katastrafičnuju, nieapraŭdanuju i niesuvymiernuju».

«Majo serca raźbita praz maštaby razbureńniaŭ i hibieli mirnych žycharoŭ, u tym liku dziaciej. I tuju sistemnuju niespraviadlivaść, jakuju my nazirajem na Zachodnim bierazie, nielha ihnaravać», — skazaŭ śpiavak.

Jon dadaŭ, što ciapier sprabuje zrazumieć, jakim čynam moža dapamahčy «achviaram hetaha žachlivaha času», i pryznaŭsia, što niedastatkova viedaje pra situacyju, tamu «słuchaje i vučycca».

Jaho kancert «pa-raniejšamu zastajecca miescam, dzie rady ŭsim i dzie kožny moža stajać plačom da plača ź ludźmi, jakija majuć supraćlehłyja pohlady», — skazaŭ śpiavak.

Šyran pryznaŭsia, što nie razumieŭ, ci praciahniecca jaho tur i ci zachoča jon naohuł praciahvać karjeru, adnak vyrašyŭ viarnucca na scenu dziela svaich prychilnikaŭ.

Śpiavak taksama zajaviŭ, što jaho «hłyboka niepakoić» situacyja, pry jakoj kancertnyja placoŭki mohuć atrymać prava «zahadzia ŭchvalać» kantent abo skład vykanaŭcaŭ. Heta vyklikała apładysmienty publiki. Vidavočna, heta była adsyłka da pazicyi Robierta Krafta.

Astatnija kancerty jaho tura zapłanavanyja ŭ Paŭnočnaj i Paŭdniovaj Amierycy.

Choć papiaredni tur śpievaka staŭ adnym z samych kasavych za ŭsiu historyju, ceny na niekatoryja kvitki na hety kancert źnizilisia da 32 dalaraŭ.

Častka fanataŭ paviedamiła, što im udałosia viarnuć hrošy za kvitki, choć kampanija Ticketmaster i pramoŭtar kancerta Messina Touring Group hetaha nie paćvierdzili.

Kala ŭvachodu ŭ zału ŭ Fiładelfii adbyłasia akcyja pratestu prychilnikaŭ Paleściny, adnak kancert prajšoŭ spakojna.

• 0
• 1
• 0
• 4
• 1
• 1
• 0
• 0