Na biełaruskaha pravaabaroncu ŭ Hruzii Ramana Kiślaka skłali pratakoł za nielehalnaje znachodžańnie ŭ krainie
Palicyja pryjšła da jaho ŭ kvateru ŭ Tbilisi.
Supracoŭniki Pamiežnaj palicyi MUS Hruzii 16 lipienia pryjšli dachaty da biełaruskaha pravaabaroncy Ramana Kiślaka, jaki žyvie ŭ Tbilisi, i skłali pratakoł za nielehalnaje znachodžańnie ŭ krainie, piša «Pozirk».
Jak paviedamiŭ «Pozirku» Kiślak, palicyja šukała ludziej, jakija nielehalna znachodziacca na terytoryi krainy: «Skazali: my zaraz pravierym. Kali zahadajuć vas dastavić, my nadzieniem na vas kajdanki i adviaziem u Departamient mihracyi [MUS]. Jany byli ŭzbrojenyja, ź pistaletami. Patelefanavali ŭ departamient i vyrašyli, kab ja sam źjaviŭsia 21 lipienia».
Termin dziejańnia biełaruskaha pašparta Kiślaka skončyŭsia ŭ lutym 2024 hoda, jaho niemahčyma pamianiać u ambasadzie Biełarusi. Časovaje paśviedčańnie asoby ad miascovych uładaŭ taksama sastareła, novaje pravaabaroncu nie dali, ale ŭ dačynieńni da jaho dziejničajuć časovyja miery biaśpieki pavodle rašeńnia Kamiteta AAN pa pravach čałavieka, jaki razhladaje jaho skarhu na admovu hruzinskich uładaŭ u prytułku.
Pavodle słoŭ pravaabaroncy, paśla vizitu Pamiežnaj palicyi jon nakiravaŭ skarhu na dziejańni Departamienta mihracyi, bo ličyć, što toj šmat miesiacaŭ, z kastryčnika 2025 hoda, ihnaruje jahonyja zvaroty nakont lehalizacyi.
21 lipienia jon płanuje naviedać departamient, ale nie vyklučaje svajho zatrymańnia tam: «Dumaju, ryzyka zaŭsiody jość, ale, spadziajusia, jana minimalnaja, bo ŭ mianie jość časovyja miery abarony Kamiteta AAN pa pravach čałavieka».
Sioleta ŭ sakaviku ułady Hruzii paŭtorna de-fakta admovili Kiślaku ŭ prytułku. Tady jon paviedamiŭ «Pozirku», što nie maje nijakaha statusu: ni prośbita prytułku, ni «ŭ pracedury departacyi».
«U mianie zabłakavanyja bankaŭskija karty. Ja nie mahu pajści ŭ turmu naviedać biełarusaŭ. Mnie pieraškadžali ŭžo, bo ja nie maju dziejnaha dakumienta», — apisvaŭ svaju situacyju pravaabaronca.
Ciapier čytajuć
«Abo my ciabie zhvałcim, abo ty paholiš baradu razam z hałavoj». Łachvič raskazaŭ, što ź im adbyłosia21
«Abo my ciabie zhvałcim, abo ty paholiš baradu razam z hałavoj». Łachvič raskazaŭ, što ź im adbyłosia
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski88
Kamientary