Mnohija biełarusy straciać mahčymaść jechać na pracu ŭ Litvu. Voś što źmienicca ź listapada

Jak pracuje ciapier?

Da 1 listapada biełarusy mohuć pa-raniejšamu padavać dakumienty na atrymańnie litoŭskaha pracoŭnaha DNŽ naŭprost u adździaleńniach Departamienta mihracyi Litvy. Hałoŭnaje patrabavańnie — lehalnaje znachodžańnie na terytoryi Litvy na momant padačy.

I pakolki za niekatorymi redkimi vyklučeńniami Litva ŭžo šmat hadoŭ nie vydaje vizy hramadzianam Biełarusi, to ŭ asnoŭnym biełarusy padavalisia na atrymańnie litoŭskaha DNŽ, majučy ŭ pašparcie dziejnuju nacyjanalnuju abo šenhienskuju vizu inšaj krainy.

Što źmienicca?

Farmalna nijakaj zabarony ci novych abmiežavańniaŭ na pracaŭładkavańnie biełarusaŭ u Litvie i, adpaviedna, atrymańnie pracoŭnych DNŽ nie źjavicca, ale de-fakta rabić heta z 1 listapada stanie amal niemahčyma.

Usio praz toje, što pa novych praviłach, jakija pryniali jašče ŭ mai, padać chadajnictva ŭ Departamient mihracyi na atrymańnie časovaha DNŽ na padstavie pracy abo vučoby možna tolki pry najaŭnaści:

• dziejnaha DNŽ abo vydadzienaj Litvoj nacyjanalnaj vizy;
• dziejnaha DNŽ inšaj krainy ES abo krainy Šenhienskaj zony;
• abo zakonnych padstaŭ dla biaźvizavaha znachodžańnia.

Heta aznačaje, što zamiežniki, jakija pryjeduć u Litvu z šenhienskaj vizaj abo nacyjanalnaj vizaj inšaj dziaržavy paśla 1 listapada 2026 hoda, nie zmohuć padać chadajnictva ab vydačy dazvołu na pražyvańnie ŭ Litvie na padstavie pracy abo navučańnia praz Departamient mihracyi.

Pavialičyć

Ci jość alternatyva?

U takich vypadkach hramadzianie zamiežnych dziaržaŭ pavinny buduć źviarnucca nakont vydačy dazvołaŭ na pražyvańnie ŭ Litvie ŭ centry źniešniaha absłuhoŭvańnia VFS Global.

Ale ŭ Biełarusi atrymać litoŭski DNŽ praz VFS Global niemahčyma. Z 1 śniežnia 2024 hoda padavać dakumienty na atrymańnie litoŭskaha DNŽ za vyklučeńniem vysokakvalifikavanych śpiecyjalistaŭ (Blue Card) i niekatorych inšych vypadkaŭ, majuć prava tolki hramadzianie toj krainy, dzie znachodzicca taki centr.

To-bok umoŭny ajcišnik ci inšy vysokakvalifikavany śpiecyjalist ź Biełarusi, jaki adpaviadaje patrabavańniam dla atrymańnia litoŭskaha DNŽ typu Blue Card, moža bieź vizy prylacieć u Hruziju ci Kazachstan i tam padać dakumienty na atrymańnie DNŽ (Blue Card), a zvyčajny dalnabojščyk ci budaŭnik — nie.

Z ulikam usich hetych abstavin vynikaje, što šerahovaja pracoŭnaja mihracyja ź Biełarusi ŭ Litvu nieŭzabavie stanie faktyčna niemahčymaj, tamu možna mierkavać, što kolkaść biełarusaŭ ź dziejnymi litoŭskimi DNŽ pačnie skaračacca jašče chutčej.

Pa stanie na 1 vieraśnia 2026 hoda hramadzianie Biełarusi mieli 47 872 dziejnyja DNŽ usich typaŭ. Ź ich 33 203, ci amal 70%, prypadali mienavita na pracoŭnyja DNŽ, vydadzienyja na padstavie zvyčajnaj pracy.

Heta stavić hramadzian Biełarusi na pieršaje miesca ŭ Litvie pa kolkaści pracoŭnych DNŽ. Taksama biełarusy praciahvajuć zajmać pieršaje miesca ŭ śpisie vysokakvalifikavanych śpiecyjalistaŭ. Na 1 vieraśnia takich naličvałasia 2 677 čałaviek.

Pavialičyć

Kali brać ahułam, to na pieršym miescy pa kolkaści dziejnych DNŽ u Litvie iduć ukraincy — 80 312 čałaviek, biełarusy z 47 872 zajmajuć druhoje miesca, a na trecim iduć rasijanie z 13 272 DNŽ u Litvie.

Na piku litoŭski DNŽ (lubych typaŭ) mieli 62 844 hramadzianiny Biełarusi. Tak, pavodle aficyjnych danych ad litoŭskaha Departamienta mihracyi, było pa stanie na 1 krasavika 2024 hoda. Adnak užo bolš za dva hady hetaja ličba stabilna skaračajecca. 

• 4
• 1
• 1
• 14
• 1
• 2
• 4
• 0