Kramy admovilisia pradavać pradukty, aśviečanyja pravasłaŭnaj carkvoj

Dziaržaŭnaje pradpryjemstva vyrašyła aśviacić svaju pradukcyju, ale z-za hetaha jana nie trapiła ŭ prodaž. U kramach paličyli, što «pravasłaŭnaje» charčavańnie budzie adpužvać pakupnikoŭ-katalikoŭ i musulmanaŭ.

Na pačatku žniŭnia ijerej Andrej Smolski z błasłavieńnia archijepiskapa Viciebskaha i Aršanskaha Dźmitryja aśviaciŭ abstalavańnie i pradukcyju Viciebskaha sadavina-aharodninnaha kambinata. Na im vyrablajuć charčavańnie dla dziaciej, kormiačych i ciažarnych žančyn. Jak patłumačyŭ načalnik siektara źniešnieekanamičnaj dziejnaści Siarhiej Ryžoŭ, zaprasili śviatara na kambinat paśla praviedzienych markietynhavych daśledavańniaŭ.

Siarhiej Ryžoŭ: «Byli praviedzienyja peŭnyja markietynhavyja daśledavańni, byli apytanyja respandenty, jakija vykazali šerah prapanoŭ pa palapšeńni pradukcyi, jakuju my vypuskajem. U tym liku, kala 80% apytanych vykazali žadańnie bačyć na palicach kram pradukcyju, aśviečanuju pravasłaŭnaj carkvoj. Takoje pažadańnie vykazali pierš za ŭsio ciažarnyja i tyja žančyny, jakija kormiać małych dziaciej».

Śviatar byŭ na kambinacie 6 žniŭnia. A ŭžo 9 žniŭnia, kaža Siarhiej Ryžoŭ, pradpryjemstva płanavała adhruzić pieršyja partyi svajoj pradukcyi ŭ kramy. Ale raptam sutyknułasia ź niežadańniem apošnich handlavać aśviečanym dziciačym charčavańniem.

Siarhiej Ryžoŭ: «Jość pradpryjemstvy navat u našym abłasnym centry, jakija kateharyčna admovilisia brać pradukcyju, jakuju aśviaciła pravasłaŭnaja carkva. Aficyjnaj admovy my ad ich nie atrymali, ale jość vusnaje rasparadžeńnie ich kiraŭnikoŭ, sens jakoha ŭ tym, što kali jany pabačać na palicach svaich kram hetuju pradukcyju, to tavaraznaŭcy, jakija jaje pryniali, buduć zvolnienyja».

A pierad hetym, kaža jon, ad pradpryjemstva patrabavali piśmovaha paćviardžeńnia ź jeparchii, što takoje błasłavieńnie było atrymanaje. Ale i paśla hetaha dziciačaje charčavańnie, aśviečanaje pravasłaŭnym śviatarom, kramy brać nie pačali.

Kab pravieryć atrymanuju infarmacyju, Jeŭraradyjo patelefanavała ŭ charčovuju kramu Viciebska i zapytała pra najaŭnaść aśviečanych dziciačych sokaŭ i kansiervaŭ.

Pradaŭščyca kramy № 137: «Pakul u nas jašče nie było takoj — aśviečanaj».

Ledź nie pałova charčovych kram Viciebska naležyć akcyjaniernamu tavarystvu «Viesta». Jak patłumačyła Jeŭraradyjo supracoŭnica handlovaha adździeła arhanizacyi, pakul jany dziciačaje charčavańnie miascovaha kambinata nie brali, tamu što patreby niama. Ale chutka jana źjavicca. Ale brać aśviečanyja pravasłaŭnym śviatarom piure i soki jany pieraścierahajucca biez adpaviednaha dazvołu čynoŭnikaŭ vykankama.

Supracoŭnica AAT «Viesta»: «My ŭ kursie inicyjatyvy kambinata, ale my nie pryniali nijakaha rašeńnia na hety kont (Brać pradukcyju na realizacyju. — Jeŭraradyjo). Jak vy ličycie, kali ja katalik i pryjšła ŭ kramy za dziciačym charčavańniem, to ja pavinna pajści ź jaho? Šmat relihijnych kanfiesij u krainie. I ŭ Viciebsku ŭ tym liku. Što ja pavinna adkazvać na takija voś słovy pakupnikoŭ? Mnie b chaciełasia, kab heta prakamientavali orhany kiravańnia».

A jašče, kaža, niadrenna było b atrymać kamientar ad śviataroŭ. Naprykład, nakont taho, što aśviečany słoičak z-pad dziciačaha charčavańnia paśla vykarystańnia pojdzie ŭ śmietnik.

Supracoŭnica AAT «Viesta»: «Chaj jany adkažuć na hetyja pytańni i handlu daduć mahčymaść pastupać pravilna. Bo siońnia my staim tvaram da spažyŭcoŭ. Mnie nie chaciełasia b pakryŭdzić ni musulmanina, ni katolika, ni pravasłaŭnaha. Kali heta pravilna z punktu hledžańnia carkvy-to ŭsio dobra».

Fakt taho, što dziciačaje charčavańnie nie biaruć na realizacyju miascovyja kramy tolki z-za taho, što jano aśviečanaje pravasłaŭnym śviatarom, vyklikaŭ u načalnika ŭpraŭleńnia handlu i pasłuh Viciebskaha harvykankama Iryny Suprun niedavier.

Iryna Suprun: «Takoha nie moža być! U nas va ŭsich kramach jość śpiecyjalizavanyja kutki dziciačaha charčavańnia i ŭsio astatniaje. Tut niejak nie tak sfarmulavana było pytańnie albo adkaz na jaho».

I paabiacała adrazu zaniacca hetaj prablemaj. Pavodle jaje słovaŭ, kali niekamu patrebny šturšok z vykankama dla taho, kab pačać handlavać aśviečanym dziciačym charčavańniem, to jany jaho atrymajuć.

Ździŭlajecca tamu, što aśviečanaja pradukcyja kambinata nie patrapiła ŭ prodaž, i ijerej Andrej Smolski.

Andrej Smolski: «Moža, u kahości pieraściarohi ŭźnikli, žadańnie razabracca ź situacyjaj, „kab čaho nie vyjšła“. Ale ž heta dobra — aśviačałasia pradukcyja nie tolki dla dziaciej, ale i dla ciažarnych, i dla tych žančyn, jakija kormiać niemaŭlat».

I, kaža, fakt taho, što aśviečanaj pradukcyi da hetaha času niama na palicach, vyklikaje ŭ śviataroŭ jeparchii nierazumieńnie.

• 0
• 0
• 0
• 0
• 0
• 0
• 0
• 0