U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty
A ŭ 2021 hodzie Hanna Šachava, supracoŭnica AMAP, acaniła svaje maralnyja pakuty ad kamientara «Voś mrazi» ŭ 500 rubloŭ — i adsudziła ich.
Na konkursie «Mis minskaja milicyja — 2026», jaki prachodziŭ 3 krasavika, pieramahła kamandzir adździaleńnia staličnaha AMAPa Hanna Šachava.
Zhodna ź infarmacyjaj sajtaŭ luka.zone i «Dzikaje palavańnie», u 2020 hodzie Šachava prymała aktyŭny ŭdzieł u razhonach mirnych pratestaŭ.
U 2021 hodzie ŭ sudzie Frunzienskaha rajona Minska sudzili žančynu, jakoj staviłasia ŭ vinu abraza pradstaŭnikoŭ ułady — dzieviaci supracoŭnic AMAP, siarod ich była i Hanna Šachava, milicyjanier 22 uzvoda AMAP.
Minčanka pakinuła pad fatahrafijaj dzieviaci supracoŭnic AMAP, raźmieščanaj u telehram-kanale «Karniki Biełarusi», kamientar: «Voś mrazi». U vyniku joj prysudzili 3 hady chatniaj chimii i 6 tysiač rubloŭ kampiensacyi «paciarpiełym». Z hetaj sumy 500 rubloŭ dastalisia Hańnie Šachavaj, jakaja zajaviła, što kamientar jaje abraziŭ, pryniziŭ honar i hodnaść.
Konkurs, na jakim pieramahła Hanna, darečy, prachodziŭ pad słohanam «U imia zakona i pryhažości».
Była i svaja fiška: kali zvyčajna ŭdzielnicy takich konkursaŭ defilirujuć u kupalnikach, dyk tut zamiest hetaha było defile ŭ formie.
Raniej Šachava ŭdzielničała ŭ śpiecprajekcie dziaržaŭnaha infarmahienctva BiełTA. Tam vyrašyli, što budzie cikava, kali amapaŭku pastavić na abcasy i adpravić na podyum. A Hanna pahadziłasia, bo zachaplajecca vizažam, lubić stylnyja sukienki i fotasiesii. Majstar-kłas pa defile dla Hanny pravodziła «Mis Biełaruś 2021» Darja Hančarevič.
Pra siabie ŭ intervju amapaŭka raspaviadała, što jaje baćka — były vajskoviec, tamu žorstkaja dyscyplina ŭ jaje była ź dziacinstva. Zajmałasia lohkaj atletykaj i tajskim boksam.
Hanna, jakaja razhaniała pratesty suprać falsifikacyj i hvałtu, u dziacinstvie maryła słužyć u milicyi «nie dziela formy, a kab baranić ludziej i zabiaśpiečvać pravaparadak na vulicach».
Svaju pracu jana lubić: «Dla mianie być milicyjantam — heta nie prosta vykonvać zahady, a stać aporaj dla tych, chto ŭ ciažkuju chvilinu maje patrebu ŭ abaronie».
Ciapier čytajuć
Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami24
Kamientary