Apakalipsis u hlamury
Novaja stužka Meła Hibsana “Apakalipsis” – heta etnahrafičnaje škumatańnie, vylizanaja karcinka, pahanskija rytuały ŭ kapiščach – i dubovaja ideja dla spažyŭca.
Novaja stužka Meła Hibsana “Apakalipsis” – heta etnahrafičnaje škumatańnie, vylizanaja karcinka, pahanskija rytuały ŭ kapiščach – i dubovaja ideja dla spažyŭca.
Imperyja majia nakonadni zavajovy hišpancami. Mirna pravodzić svaje dni trapičnaje plemia. Ale vajary majia napadajuć na viosku – i zabirajuć ludziej u pałon. Hieroj stužki – Łapa Jahuara – projdzie pakutlivy šlach da stalicy imperyi, budzie kinuty na pahanski ałtar – i ŭciače ŭ džunhli, kab vyratavać siabie j siamju.
Historyja hibsanaŭskaha “apakalipsisu” razhortvajecca nadziva pradkazalna: tut vyskačyć pantera, zaraz zabjuć niahodnika – a ciapier u landšafcie musić być vodaspad.
Ale scenarnaja banalnaść maskujecca sensacyjnaściu temy, etnahrafičnymi scenkami – i hłybokadumnymi naminkami na ideju.
Usia karcina zdymałasia na zabytaj movie indziejcaŭ – i samich hierojaŭ hrajuć indziejcy. U stužcy staranna adnaŭlajecca pieršabytny j dakalumbavy pobyt: šnary, farby, adzieńnie, absydyjan.
Tatuiroŭki vajaroŭ, absypanyja biełym raby, vypeckanyja ŭ błakitnaje achviary. (Hrym stužki zasłuhoŭvaje najvyšejšaje pachvały).
Vidoviščnaja masoŭka la kapišča, pahanskija žracy... Ale heta ŭsio prostaliniejna. Kali brakuje etnahrafičnych prykmietaŭ, Hibsan vypluchvaje na ekran miasa j kroŭ. Źjedzienyja syrymi jajki tapira (samaje biaźvinnaje), vydranaje čałaviečaje serca, abhryzieny jahuaram tvar, hałava, što kocicca pa prystupkach.
Naturalizm zaškalvaje. Nielha skazać, što ŭ kino nie było takoha. Italjanskija filmy pra zombi i kanibałaŭ – najbližejšyja svajaki, ale heta nizavy žachaŭski žanr, dzie nie pasujuć paproki ŭ naturaliźmie.
Stužka Hibsana – ź idejaj. Heta epas. Aŭtarskaje pasłańnie. Praŭda, nadzvyčaj prościenkaje: vialikija cyvilizacyi strupianieli znutry – i ciapier čas padobny. Dla taho, kab pasłańnie dajšło, Hibsan karystajecca łabavymi metadami cukierna-kryvavaha hlamuru. Padrabiaznaść u detalach, vylizana-pryjemnyja kadry, zabojna-korstkija pikantnaści...
A kaliści Hibsan pačynaŭ, jak Šalony Maks – u adnaimiennaj postapakaliptyčnaj (!) stužcy. Talenavity aktor pasprabavaŭ siabie režyseram... Filmy stanavilisia ŭsio bolej miasnymi, usio bolej patasnymi... Sproščanymi.
Sproščanaść razam z sensacyjnym etnahrafizmam i kryvioju harantuje kasu.
Ale lepiej nia stacca achviaraj hlamuru.
Apakalipsis (Apocalipto)
ZŠA, 2006, kalarovy, 139 chv, z subtytrami.
Režyser: Meł Hibsan
Roli vykonvajuć: Rudzi Janhłbład, Dalija Ernandez, Džonatan Bruer.
Žanr: Pryhody, ekspluatacyjny film hvałtu
Adznaka: 4 (z 10)
Uzrostavyja abmiežavańni: z 18 hadoŭ.
"Apakalipsis" naminavany na "Oskara" 2006 h. za hrym, huk i mantaž huku.
Čytajcie taksama vyniki kinahodu.
Kamientary