Łukašenkaŭcy addajuć «Biełaruśkalij» u zastavu, kab atrymać 2 miljardy rasijska-niamieckaha kredytu
Pieršymi infarmacyju pra heta raspaŭsiudzili Pucin i Href.
Śbierbank Rasii i Deutsche Bank daduć kredyt «Biełaruśkaliju» na $ 2 młrd, paviedamiŭ kiraŭnik Śbierbanka Hierman Href na sustrečy z Uładzimiram Pucinym.Pucin padkreśliŭ, što kredyt byŭ vydadzieny na jahonuju prośbu. «Dla Biełarusi heta, viadoma, niaprosty pieryjad času, ale dla nas heta dastatkova nadziejny, dobry kredyt», — skazaŭ Href.
Jon raskazaŭ, što ŭ jakaści zabieśpiačeńnia pa kredycie buduć pradastaŭleny ekspartnyja kantrakty (kampanija 90% pradukcyi ekspartuje), a taksama 35% akcyj pradpryjemstva. Ich aformiać u zastavu (załoh).
«Usio heta robicca pa ŭsich mižnarodnych standartach razam z našymi zachodnimi partniorami», — zajaviŭ Href.
Kali Biełaruś nie zdoleje vypłacić kredyt, akcyi «Biełaruśkalija» piarojduć va ŭłasnaść kredytoraŭ.«Biełaruśkalij» — hałoŭnaja krynica valutnych prybytkaŭ Biełarusi.
Źviartaje ŭvahu, što «biełaruskaje pytańnie» supolna vyrašajuć najbujniejšy niamiecki i rasijski banki. Heta jašče adna prajava supracy Rasii i Zachadu ŭ biełaruskim pytańni. Pry razhladzie biełaruskaj zajaŭki na kredyt JeŭrAzES ministr finansaŭ Rasii Kudryn taksama prapanoŭvaŭ biełaruskim uładam zvažać na patrabavańni MVF.
Jak stała paźniej viadoma ahienctvu «Interfaks», biełaruskija ŭłady mieli nakiravać srodki ad kredytu ŭ zołatavalutnyja reziervy. Heta dazvalaje mierkavać, što stanie mahčymym adnaŭleńnie interviencyj Nacbanka na valutnym rynku. Mahčyma, paśla prychodu hetaha kredytu ŭ abmieńnikach iznoŭ źjavicca valuta. Pytańnie tolki, pa jakim kursie.
Kamientary