Бліжэйшы выступ TonqiXod адбудзецца 28 лістапада ў клубе TNT. Уваход вольны.
Мінска-рэчыцкі гурт TonqiXod (ТонкіХод) прэзентуе сваю дэбютную студыйную працу — кампазіцыю на верш «Насыпаць горы»
«Рэч у тым, што я выйграў конкурс у межах кампаніі «Грамадзянскасць. BY» са сваім вершам пра горы, а прызам была магчымасць запісаць аўдыё для гэтага верша і зняць кліп. З кліпам не зраслося, а вось адмысловую кампазіцыю мы запісалі», — расказвае гітарыст, вакаліст і аўтар тэксту Уладзь Лянкевіч.
Максім Субач, які адказвае ў гурце за клавішы і другі вакал, дадае, што галоўнай праблемай пры напісанні музыкі было абмежаванне часу.
«Верш быў даўно гатовы і існаваў сам па сабе, а музыка павінна была з’явіцца хутка і гарманічна яго дапоўніць. Першая частка кампазіцыі атрымалася злёгку дэпрэсіўнай, але тэкст утрымлівае ў сабе нямала іроніі і нейтралізуе змрочнасць.
Другая ж частка, у процівагу першай, атрымалася энергічнай і нават трохі папсовай. Аднак, каб канчаткова заблытаць слухача ў тым, што гэта наогул за «песня», мы вырашылі пачаць і скончыць трэк мройнымі напевамі і воплескамі ў духу псіхадэлічных 1960-х», — тлумачыць Максім.
Запісвалася кампазіцыя «Насыпаць горы» часткова дома, часткова на Studio 33 і на хатняй студыі Паўла Някрасава. Звядзенне і майстарынг рабіў Яўген Сухавей, вядомы па працах з рознымі беларускімі інды-гуртамі.
Трыа TonqiXod узнікла ў 2011. У яго склад уваходзяць Максім Субач (клавішы, вакал), Уладзімір Лянкевіч (гітара, вакал) і Андрэй Аляксеенка (бубны).
Доўгі час музыкі рэпетавалі і пісалі матэрыял, а на пачатку 2013 пачалі стала выступаць разам. TonqiXod даў шэраг канцэртаў у розных клубах Мінска, на адкрыццях выставаў у музеях і на літаратурных фестывалях.
Па выніках працы ў 2013 гурт намінаваны на прэмію «Дэбют году» па версіі музычнага сайту Tuzin.fm.
Каментары