Ніводнага мінскага, гомельскага, італьянскага ці французскага. Затое ў Магілёве будуюць ужо чацвёрты расійскі дворык, гэтым разам — з мядзведзем
У цэнтры Магілёва будуецца «Яраслаўскі дворык» — ужо чацвёртая па ліку пляцоўка ў горадзе, прысвечаная расійскім гарадам і аформленая адпаведным чынам.
Магілёўскі гарвыканкам паведаміў, што ў двары на вуліцы Ленінскай, 34 ужо ўзведзеная бетонная альтанка на калонах, а неўзабаве з’явіцца і галоўная разынка новай зоны адпачынку — скаладром у выглядзе мядзведзя, сімвала расійскага Яраслаўля.
У Магілёве гэта ўжо чацвёрты такі аб'ект. Пачалося ўсё 20 гадоў таму, калі ў 2006 годзе на вуліцы Ленінскай побач з дамамі 59 і 61 адкрыўся Маскоўскі дворык з гарадком у выглядзе Крамля, а ў 2007‑м на вуліцы Ленінградскай, 45 з’явіўся Тульскі дворык з вялікім самаварам. Зусім нядаўна, летам 2025 года, з помпай і пераразаннем чырвоных стужак чыноўнікамі на Ленінскай вуліцы адкрылі Хабараўскі дворык.
Лакацыю для Яраслаўскага дворыка таксама выбралі ўздоўж галоўнай пешаходнай вуліцы Ленінскай, у двары дарэвалюцыйнага дома Атліваннікава (№34) у стылі мадэрн. Яшчэ да вайны паміж ім і домам №32 утварыўся разрыў у забудове, дзе стаялі мураваныя гаспадарчыя пабудовы і хлебазавод. Некалькі гадоў таму ўсе гістарычныя пабудовы тут знеслі, каб узвесці яўрэйскі асветніцкі цэнтр, які аказаўся абсалютна не звязаны з забудовай Ленінскай. Менавіта насупраць яго галоўнага фасада цяпер і ствараецца новы дворык.
У выніку такога хаатычнага будаўніцтва ўтварылася выпадковая плошча, а двары дарэвалюцыйных дамоў аказаліся адкрытымі наўпрост на ажыўленую пешаходную вуліцу.
Рэакцыя жыхароў горада ў сацыяльных сетках на чарговае «добраўпарадкаванне» аказалася далёкай ад аднагалоснага адабрэння.
Некаторыя жыхары абурыліся такім пусканнем пылу ў вочы. Яны абураюцца тым, што ў гістарычным цэнтры, дзе аб’ектыўна жыве значна менш людзей, чым у спальных раёнах, узводзіцца ўжо чарговая добраўпарадкаваная дзіцячая пляцоўка.
«Чым горшыя дзеці са спальных раёнаў? Калі мы ўжо пачуем, што добраўпарадкоўваецца дзіцячая пляцоўка ў двары па вуліцы Арлоўскага? Штосьці зрабілі ў 2000-м, цяпер адны каркасы і гніллё».
Яшчэ адным слушным аказалася пытанне пра саму канцэпцыю.
«Чаму не Брэсцкі ці Гомельскі [дворык]? Што гэта за горад такі Яраслаўль, дзе ён знаходзіцца — хз», — шчыра здзіўляецца адзін з каментатараў.
Яго падтрымаў другі магілёвец, прапаноўваючы значна больш лагічную альтэрнатыву:
«Ёсць ідэя зрабіць беларускія дворыкі і на беларускай мове: напрыклад, Мінскі дворык. Мініяцюра з пазнавальнага помніка і стылізаваны стэнд з гісторыяй горада. Было б крута».
«Наша Нiва» — бастыён беларушчыны
ПАДТРЫМАЦЬЦяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі68
Каментары
Які ён на... ІНШЫ?! Калі ІХ ДВА?
Як у той прымаўцы ... - ".....рзбівайце лоб"!