Жыццё Заходняй Беларусі «за польскім часам» пакажуць на выставе ў Заслаўі
Напрыканцы тыдня ў музеі-запаведніку «Заслаўе» адкрыецца выстава «Заходнебеларуская Атлантыда». Арганізатары абяцаюць гледачам паказаць гісторыю Заходняй Беларусі праз дакументы, фотаздымкі і артэфакты.
Галоўная ідэя выставы паказаць Вераснёўскую кампанію 1939 года, ў якой удзельнічалі злучэнні Войска Польскага (у іх складзе была значная колькасць ураджэнцаў заходнебеларускіх ваяводстваў міжваеннай Польшчы). На выставе таксама пакажуць мірнае жыццё Заходняй Беларусі ў 1921—1939 гады.
Як паведамляюць супрацоўнікі музея, важнае месца ў экспазіцыі надаецца тэме мабілізацыі беларусаў у Войска Польскае. У сакавіку 1939 года ў Другой Рэчы Паспалітай пачаліся скрытыя мабілізацыйныя мерапрыемствы, у выніку якіх у польскую армію прызвалі значную колькасць заходніх беларусаў. Пасля ўсеагульнай мабілізацыі ў канцы жніўня 1939 года у шэрагі Войска Польскага залічылі каля 70 тысяч мужчын беларускай нацыянальнасці.
На выставе можна будзе ўбачыць формы афіцера Войска Польскага, жаўнера пяхотнага палка і марака пінскай рачной флатыліі ды шмат іншага — усяго каля 300 прадметаў, большая частка з якіх — арыгіналы.
Экспанаты для выставы - з прыватнай калекцыі Ігара Мельнікава, пазначана ў прэс-рэлізе музея. Выстава будзе працаваць з 12 верасня да 10 лістапада 2014 года, з 9.00 да 17.00 кожны дзень, акрамя панядзелка.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч13
Каментары