«Я згодны з ацэнкай прэзідэнта»: што ў эфіры АНТ гаварыў калісьці незалежны эксперт Дзяніс Мельянцоў
Госцем перадачы «Нічога асабістага» кіраўніка АНТ Марата Маркава стаў палітолаг Дзяніс Мельянцоў.
Раней Дзяніс займаў незалежную пазіцыю, супрацоўнічаў з недзяржаўным BISS, выкладаў у ЕГУ. Потым Дзяніс стаў адным з каардынатараў «Мінскага дыялога». Цяпер Мельянцоў пастаянны госць дзяржаўных тэлеканалаў.
Эксперта запрасілі ў студыю, каб абмеркаваць апошнія падзеі ў ЗША. Маркаў усяляк спрабаваў правесці паралелі між падзеямі ў Вашынгтоне і Мінску. Маўляў, там страляюць на паражэнне, называюць людзей, што штурмуюць Капітолій, «тэрарыстамі», а не «палітвязнямі», і г. д. Мельянцоў у спрэчкі з Маркавым не ўступаў.
Што ж ён нагаварыў?
***
Можна і трэба ставіць пад пытанне, як кваліфікаваць масавыя мітынгі і дэманстрацыі ў Беларусі, паколькі яны не адпавядалі заканадаўству аб масавых мерапрыемствах. Але захопу адміністрацыйных будынкаў усё ж не было, таму гэта зусім іншы артыкул, чым у ЗША.
***
Натуральна, што ЗША, як глабальны гулец, які робіць стаўку на прасоўванне дэмакратыі ў свеце для нейкіх сваіх мэтаў, будуць трактаваць і выкарыстоўваць тое, што адбываецца ў Беларусі, у сваіх палітычных мэтах. Калі Беларусь гэта «крывавая дыктатура», то, адпаведна, каго трэба крытыкаваць? Урад. Каго трэба падтрымліваць? Дэманстрантаў. Адпаведна, трактуюцца падзеі ў дзяржавах, якія ЗША супрацьдзейнічаюць, — Расіі, Беларусі.
***
Возьмем «Паўночны паток» — відавочна, што ЗША хочуць прадаваць свой газ на еўрапейскім кантыненце, таму ім звязка Берлін — Масква абсалютна непатрэбная па эканамічных і палітычных прычынах. Заўсёды і Вялікабрытанія, і ЗША заміналі звязцы Берлін — Масква, калі яе дапусціць, то мяняецца ўся геапалітычная сітуацыя ў Еўропе. Таму тут выкарыстоўваюцца і Навальны, і супрацьдзеянне «расійскаму ўплыву», нібыта прыгожыя рэчы, за якімі стаяць эканамічныя інтарэсы.
***
У ЗША норма адкрыць агонь на паражэнне. У нас да мінулага года ніколі не прымяняліся такія спецсродкі, як вадамёты, святлошумавыя гранаты, гумавыя кулі. У нас норма, што такія сродкі не прымяняюцца, у Штатах — зусім іншая норма. Гэтая норма ў нас ёсць, але грамадства да гэтага не звыкла.
***
Гэта нават не для нас, а для Расіі больш актуальна, як адвязацца ад лічбавай залежнасці. Хутчэй за ўсё, [ёсць] нейкія тэхналогіі, метады ўздзеяння. Я тут згодны з ацэнкамі нашых прэзідэнта і дзяржслужачых, што ў Расіі спроба такога ўплыву будзе. Гэта негатыўна ўплывае на інтарэсы нашай краіны. Але як мы можам на гэта паўплываць, калі інтэрнэт вынайдзены ў ЗША, фэйсбук знаходзіцца там жа, беларусы гэтым масава карыстаюцца? Сваіх аналагаў у нас няма.
***
Пагрозай падчас усіх нашых падзей быў названы адзін канал, але дзяржава з ім нічога не змагла зрабіць, хаця ёсць цэлыя службы, якія пад гэта заточаны. Гэта пытанне эфектыўнасці гэтых службаў.
Дзяніс Мельянцоў нарадзіўся ў 1980 годзе ў Магілёве, скончыў гістфак мясцовага ўніверсітэта, потым навучаўся ў ЕГУ. Быў адным з лідараў Маладога фронту ў Магілёве.
У Мінску памёр адзін з самых вядомых забойцаў Расіі. Ён жыў пад чужым іменем і стаў пісьменнікам-фантастам5
Каментары