Балаклавы з’явіліся ў апошняй калекцыі лініі спартыўнага адзення Ivy Park, якая належыць Беёнсэ, а таксама на подыуме французскага дома моды Céline. Ці маюць балаклавы нейкі падтэкст, або гэта проста галаўны ўбор, які выдатна сагравае ў халады?
Учора вядомы спявак The Weeknd (ён жа Эйбэл Тэсфае) прыцягнуў увагу сваім выступам на Супербоўле (фінальная гульня за званне чэмпіёна Нацыянальнай футбольнай лігі ЗША). Спявак выканаў сваю песню «Blinding Lights» у суправаджэнні танцораў у белых балаклавах на тварах. Гэта была метафара выканаўцы да таго, якія людзі сталі сёння: скрытныя, ананімныя і насцярожаныя.
А некалькі дзён таму спявачка Беёнсэ паказала сваю новую калекцыю з лініі Ivy Park. У цэнтры ўвагі калекцыі — вулічнае адзенне, дзе важнае месца займае якраз балаклава, піша The Guardian.
Беёнсэ і раней выкарыстоўвала балаклавы ў сваіх кліпах. Папулярызацыя гэтага элемента адзення добра ўпісваецца ў стыль warcore, які ўзнік пару гадоў таму. Тэндэнцыя заключаецца ў выкарыстанні адзення, падобнага да таго, якое насілі падчас вайны.
Зіма — ідэальны час для моды на балаклавы. Мароз і снег робяць гэты элемент адзення ўсё больш папулярным. Так, як і пандэмія: анлайн-запыты на балаклавы выраслі на 59% за 2020 год. Акрамя гэтага, такія вядомыя брэнды, як Céline, Raf Simons, Greater Goods і Stone Island x Supreme ствараюць практычныя і прывабныя балаклавы.
Балаклава заўсёды асацыявалася з барацьбой. Першапачаткова іх насілі брытанскія салдаты падчас Крымскай вайны, каля Балаклавы, што пад Севастопалем, каб абараніцца ад непагадзі. У ХХ стагоддзі балаклавы пачалі асацыявацца з элітнымі ўзброенымі сіламі, напрыклад, з Special Air Service, што ў Вялікабрытаніі. На сённяшні дзень мода на балаклавы сімвалізуе рознае: ахову, таямніцу або пагрозу.
Балаклава таксама стала элементам адзення, які сімвалізуе анархію. Яшчэ ў 2018 годзе Nike раскрытыкавалі за ўвядзенне балаклаваў у свае калекцыі, якія асацыяваліся з бандыцкай культурай. У выніку кампанія была вымушаная выключыць балаклавы з калекцыі.
Ну а чырвоны колер проста стаў у 2020-м модным.
Цяпер чытаюць
Венесуэлка, якая працуе на БТ, распавяла, чаму яе сям'я думае, што яна ў Беларусі вельмі багатая. Прычыны вас здзівяць7
Каментары