«Душа скакала ад шчасця». Славуты трэнер фрыстайлістаў Мікалай Казека аб срэбры Ганны Гуськовай
На Алімпіядзе ў Пекіне фрыстайлістка Ганна Гуськова выйграла срэбра. Упершыню за шмат гадоў славуты трэнер нацыянальнай каманды лыжных акрабатаў Мікалай Казека сачыў за спаборніцтвамі не са снежнага схілу, а ля тэлевізара. Нягледзячы на гэта, Мікалай Іванавіч не хавае эмоцый: ён вельмі рады за Ганну і адразу ж адправіў ёй СМС з віншаваннем. Эмоцыямі ад перамогі Мікалай Казека падзяліўся з блогам «Отражение».
— Ганна рэалізавала свой патэнцыял. Вядома, умовы для спаборніцтваў былі досыць цяжкія. Я разумею і бачу, што многае было зроблена дзякуючы валявым намаганням Ані, — пракаментаваў выступ спартсменкі Мікалай Казека. — Яна была зараджаная на барацьбу падчас кожнага скачка. Было відаць, што яна цалкам аддавалася.
— Што рабілася ў вас на душы, калі зразумелі: у Ганны медаль?
— Я вельмі радаваўся. Аня перыядычна мне тэлефанавала. Мы ўвесь час былі ў кантакце, [я] падтрымліваў яе. Часам пасля трэніровачных працэсаў яна задавала складаныя пытанні, — расказвае трэнер і кажа, што апошні раз яны размаўлялі тры дні таму. Пра што менавіта — не агучвае, але жартуе: «Парады пайшлі на карысць». — Яна заваявала срэбраны медаль тым жа скачком, што і золата ў карэйскім Пхенчхане.
— Скакалі ад шчасця, калі зразумелі — медаль?
— Я не скакаў, — усміхаецца Мікалай Казека, — але душа скакала.
— А быў невялікі сум ад таго, што ад першага месца Ганну аддзяліла зусім няшмат?
— Спаборніцтвы для Ані складваліся не зусім гладка. Я думаю, варта задавольвацца тым, што ёсць. Як напісана ў Бібліі, будзь задаволены малым. А тут не малы, гэта ўсё-такі срэбраны медаль. Гэта плён нялёгкай працы.
— Упершыню за столькі гадоў вы — не на Алімпіядзе, не побач са спартоўцамі. Як яно?
— Там — усе мае вучні: і трэнеры, і спартсмены. Гэта ўсе тыя, з кім я працаваў. У кожным з іх часцінка маёй працы. Я вельмі задаволены тым, што справа працягваецца. Гэта перш за ўсё. Што тое, што пачыналася з нуля, яно не заглухла з-за адной, скажам так, дурноты. Значыць, яно было моцным. Значыць, закладзены моцны падмурак. І я задаволены, што гэты падмурак закладваў я.
— Ужо звязваліся з Ганнай?
— З ёй цяпер не звяжашся. У яе допінг-кантроль, але я адправіў ёй СМС. Напісаў: «Аня, віншую».
— А з роднымі Ганны ўжо паспелі пагаварыць? Як яны?
— Размаўляў з хроснай маці. Яна сказала, плача ад шчасця. А мама Ані тэлефон адключыла.
— А вы самі як будзеце святкаваць?
— Заўтра пачынаюцца мужчынскія спаборніцтвы, яшчэ ранавата святкаваць, — жартуе Мікалай Іванавіч. — Яшчэ ідзе барацьба, але, вядома, гэты момант мы адзначым.
Нагадаем, пасля выбараў-2020 Мікалай Казека выступіў супраць гвалту, за што і пацярпеў. Цяпер Мікалая Іванавіча фактычна не дапускаюць да трэніровак, ён займаецца толькі метадычнай працай. Спартсмены пісалі ў падтрымку трэнера калектыўны зварот, але гэта не змяніла сітуацыю. Са зборнай працуюць Дзмітрый Дашчынскі і Міхаіл Курловіч.
Каментары