У Бразіліі дактарам удалося раздзяліць сіямскіх блізнят, злучаных чарапамі — так званых краніапагаў. Падрыхтоўка да аперацыі ішла з шырокім ужываннем віртуальнай рэальнасці, паведамляе Бі-бі-сі.
Трохгадовыя Бернарда і Артур Ліма былі праапераваныя ў Рыа-дэ-Жанейра пад кіраўніцтвам дактароў з дзіцячай бальніцы Грэйт-Орманд-стрыт у Лондане.
Дактары патрацілі месяцы на тое, каб знайсці найбольш бяспечны спосаб падзелу, правяраючы гіпотэзы на віртуальных мадэлях анатоміі хлопчыкаў, створаных на аснове камп'ютарнай тамаграфіі і магнітна-рэзананснай тамаграфіі.
Хірург Нур уль Авасе Джылані назваў аперацыю «прадуктам касмічнай эры». Ён сказаў, што ўпершыню хірургі, якія знаходзіліся ў розных краінах, працавалі разам у адным і тым жа «пакоі віртуальнай рэальнасці».
Усяго двайняты Ліма перанеслі сем аперацый. Апошняя доўжылася больш за 27 гадзін, і ў ёй бралі ўдзел амаль 100 медыкаў.
Джылані таксама адзначыў, што віртуальная рэальнасць дазволіла хірургам некалькі разоў прайсці аперацыю, не падвяргаючы дзяцей рызыцы.
Сам хірург правёў у аперацыйнай 27 гадзін з усяго чатырма 15-хвіліннымі перапынкамі на ежу.
Пасля падзелу ў Бернарда і Артура рэзка падскочылі артэрыяльны ціск і пульс. Гэта адбываецца з усімі сіямскімі блізнятамі пасля паспяховага падзелу. Але праз чатыры дні яны зноў апынуліся ў адной палаце, ім далі магчымасць узяцца за рукі, і паказчыкі нармалізаваліся.
Двайняты добра папраўляюцца ў бальніцы. У далейшым ім трэба будзе шасцімесячная рэабілітацыя.
Доктар Джылані з'яўляецца заснавальнікам клінікі Gemini Untwined (прыкладны пераклад «падзеленыя блізняты»), у якой ён ужо аперыраваў сіямскіх двайнят з Пакістана, Судана, Ізраіля і Турцыі.
Разам з ім у аперацыі ўдзельнічаў доктар Габрыэль Муфарэж, загадчык аддзялення дзіцячай хірургіі ў Інстытуце нейрахірургіі імя Паўла Німеера ў Рыа-дэ-Жанейра.
Бацькі блізнят прывезлі іх у інстытут два з паловай гады таму, і там яны назіраліся ўвесь гэты час.
Па статыстыцы сіямскія двайняты нараджаюцца ў адным выпадку з 50-60 тысяч. Усяго 5% з іх з'яўляюцца краніапагамі.
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары