Экс-палітвязень расказаў у сваім фэйсбуку, як улетку 2020 года рэжым рыхтаваўся ня проста да масавых, а да магутных масавых пратэстаў.
«У карцарах і камерах, куды мяне закідвалі да стукачоў ужо ў чэрвені-ліпені, я даведаўся пра надзвычайныя меры, якія прымала адміністрацыя турмаў напярэдадні прэзідэнцкай кампаніі 2020 года.
Найперш, міліцыянты за месяц да падзеяў, на пачатку ліпеня, метадычна абыходзілі ўсе камеры Цэнтра ізаляцыі і следчага ізалятару, правяраючы вентыляцыю і абсталяванне, а таксама вымяраючы «карысны аб'ём» кожнай камеры.
Дзеля чаго? Каб ведаць, колькі людзей можна максімум «утрамбаваць» у хаты, каб пры гэтым людзі не задыхнуліся насмерць. Пры мне супрацоўнікі выпрабоўвалі, ці добра прымацаваныя столікі ды ложкі, і лічылі на паперцы кубаметры паветра, якія застануцца, калі ў стандартную чатырохмясцовую хату (разлічаную на чатырох вязняў) ўпіхнуць як мага болей народу.
Такая сабе школьная задачка: колькі максімум людзей выжыве ў зачыненай камеры памерам з хрушчоўскую кухню цягам 10‑15 сутак.
Стаяць двоешнікі ў форме, перамнажаюць слупком, шушукаюцца:
— Ну, шестнадцать получается. По норматіву.
— Да влезет двадцатнік, я те говорю.
Памятаю, у мяне пайшлі мурашкі па скуры. Бо згадаў, як аднойчы, яшчэ у 2001-ым, атрымаў суткі на Дзень дэкларацыі незалежнасці, якраз у ліпені – і ў аўтазаку, калі перавозілі з райаддзела на тое ж Акрэсціна, ледзь не задыхнуўся ў жалезным, разлічаным на аднаго вязня, катушку-«пенале»: нас туды ўвапхнулі трох.
Правяралі і ўмяшчальнасць дворыкаў для прагулак: у жніўні іх будуць запаўняць пад завязку і люта збіваць людзей там дручкамі ды ботамі.
А яшчэ раней ва ўсёй турмы пазабіралі матрасы — так званую «вату».
Па-першае, лішні аб'ём, а па-другое, пры бунтах у турмах менавіта «вата» выкарыстоўваецца вязнямі для абароны і гарыць, калі робяць «дымавухі». Усё Акрэсціна, пачынаючы з чэрвеня 2020 года, спала на голых дошках.
І, само сабой, вучэнні спецназа ды асабовага складу. Пад бокам у Акрэсціна — «Белполк», адмысловая частка ўнутраных войскаў. У чэрвені-ліпені раз на два тыдні ў суседніх з Акрэсціна дварах грукалі шчыты і раўлі машыны.
Мы яшчэ не ведалі, што за дзіч будзе тварыцца ў жніўні 2020 года на Акрэсціна. А таварышы начальнікі не проста ведалі — яны гэтую дзіч мэтанакіравана рыхтавалі.
Таму жнівеньскія шэпты ад супрацоўнікаў у кармушкі — «Ребята, потерпіте чуток, нікто ж не знал, что так всё будет» — поўная лухта.
І можна толькі здагадвацца, да чаго яны рыхтуюцца цяпер.
-
«Я стаў знакамітым пісьменнікам, ён таксама знайшоў нармальную працу». Філіпенка раскрыў, што пісаў жарты для Зяленскага
-
У грамадскім транспарце Мінска ўзніклі праблемы з электроннымі праязнымі
-
Беларускаму байцу ММА, які будаваў кар’еру ў Маскве, ФСБ нечакана забараніла ўезд у Расію пасля адпачынку ў Тайландзе
Цяпер чытаюць
«Калі шандарахне па цягніку, хто будзе лідарам дэмсіл?» Два дні з дэлегацыяй Ціханоўскай у Кіеве — што засталося за кадрам23
Каментары