Былы прэзідэнт Грузіі Міхаіл Саакашвілі рассакрэціў пол і абвясціў імя дзіцяці, якое нядаўна нарадзілася ў яго ва Украіне і мама якога, мяркуючы па ўсім, дэпутатка Ліза Ясько.
Зняволены Саакашвілі напісаў ліст галоўнаму рэдактару «Украінскай праўды» Сеўгіль Мусаевай, у якім пералічыў, чым для яго ёсць Украіна. У пераліку ён, у прыватнасці, адзначыў сваю дачку Жасмін, як піша выданне.
«…Што для мяне Украіна? Гэта важная частка майго жыцця і маёй барацьбы. Я правёў большую частку свайго свядомага жыцця ва Украіне. Цяпер я размаўляю на ўкраінскай [мове] ўжо лепш, чым на рускай.
Украіна — гэта мой дом у Кіеве, невялікая дзялянка зямлі ў Міргарадзе. Украіна — гэта мая асаблівая любоў горад Адэса. Украіна — гэта велізарная колькасць маіх сяброў, а з нядаўніх часоў Украіна — гэта мая маленькая дачка-ўкраінка Жасмін, якую я яшчэ не меў магчымасці ўбачыць і патрымаць на руках», — паведаміў экс-кіраўнік Грузіі і Адэскай вобласці.
Нагадаем, у пачатку чэрвеня Лізавета Ясько абвясціла, што стала мамай. Праўда, ні імя бацькі дзіцяці, ні імя самога дзіцяці дэпутат не паведаміла. Аднак пра яе раман з Саакашвілі было вядома з 2020 года.
Яшчэ год таму Саакашвілі абвясціў, што мае пазашлюбную дачку ад грузінскай спявачкі Соф'і Ніжарадзэ. Такім чынам, цяпер у экс-прэзідэнта Грузіі ёсць двое сыноў ад першай жонкі і дзве пазашлюбныя дачкі.
Цяпер Міхаіл Саакашвілі знаходзіцца ў грузінскай турме, куды ён трапіў 1 кастрычніка 2021 года, калі вярнуўся ў Грузію. Ён абвінавачваецца па некалькіх крымінальных справах. Па некаторых з іх Саакашвілі быў асуджаны да шасці гадоў зняволення яшчэ да вяртання ў Грузію. Па стане здароўя ён знаходзіцца ў тбіліскай клініцы і ў судзе ўдзельнічае анлайн.
У лютым паведамлялася, што палітык важыў 67 кілаграмаў — амаль на 50 меней, чым да зняволення.
Каментары