Легенда французскага кінематографу ўзлаваў на інтэрв'ю свайго сына, у якім ён расказаў пра стан здароўя бацькі і заявіў, што падаў скаргу на сваю зводную сястру. Канфлікты ў сямʼі Дэлонаў сталі звычайнасцю.
Як піша Le Monde, Энтані Дэлон, сын 88-гадовай зоркі французскага кінематографу Алена Дэлона, даў інтэрвʼю Paris Match, у якім расказаў, што ягоны бацька «нядобра сябе адчувае»,«аслабеў», і, магчыма, гэтыя Каляды для яго апошнія.
Энтані Дэлон таксама абвінаваціў сваю зводную сястру Анушку (Anouchka), у тым, што яна не расказала яму аб правале бацькам шэрагу кагнітыўных тэстаў у перыяд з 2019 па 2022 гады пасля інсульту.
Па словах адваката, Ален Дэлон папрасіў яго падаць скаргу на сына за паклёп.
Сам акцёр адзначыў, што надзвычай шакаваны тым усплёскам цікавасці з боку СМІ, які арганізаваў яго сын з мэтай нашкодзіць рэпутацыі ягонай дачкі і сапсаваць адносіны паміж імі. Па словах акцёра, у адрозненне ад Анушкі, ягоны сын ніколі па-сапраўднаму не клапаціўся пра яго. І нават цяпер бачыцца з ім вельмі рэдка.
Як патлумачыў Энтані Дэлон у інтэрвʼю CNEWS, ягоная скарга на сястру не мае ніякага дачынення да спадчыны. Па яго словах, гэта пытанне даўно вырашана. Пасля смерці бацькі Анушка атрымае 50% усёй маёмасці, а Энтані разам з сваім братам Аленам-Фабʼенам (Alain-Fabien) — па 25%.
Энтані таксама адзначыў, што яны з братам вельмі хочуць, каб паважалася воля іх бацькі правесці апошнія дні ў сваім доме ў Душы (Douchy). Сястру ж ён абвінавачвае ў тым, што яна хоча адвезці бацьку ў Швейцарыю, каб пазбегнуць выплаты падаткаў пасля яго смерці.
Судовыя разбіральніцтвы сталі звычайнай з'явай у сям'і Дэлонаў. На гэтым тыдні стала вядома, што сумесная скарга траіх дзяцей акцёра супраць яго 66-гадовай сяброўкі Ірамі Рален (Hiromi Rollin) была адхілена пракуратурай з-за недастатковасці доказаў. Жанчыну абвінавацілі ў маральным ціску на актора, хаванні ад яго карэспандэнцыі і жорсткім абыходжанні з яго сабакамі. Была адхілена і асобная скарга Энтані Дэлона на Рален.
У сваю чаргу, Ірамі Рален падала скаргу на дзяцей Дэлона за гвалт падчас яе высялення з дома актора ў Душы. Але пракуратура па тых жа прычынах адхіліла і яе.
Ален Дэлон — зорка французскага кіно. На яго рахунку звыш 90 фільмаў. Сусветная вядомасць прыйшла да яго ў 1960-я гады. У 2017 годзе акцёр абвясціў аб завяршэнні карʼеры. У 2019 годзе ён перанёс інсульт.
Чытайце яшчэ:
Ален Дэлон перадумаў паміраць і прачытае вершы Тараса Шаўчэнкі
Сын Алена Дэлона распавёў пра стан бацькі пасля інсульту
Цяпер чытаюць
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння77
Каментары