Адроджаную прэмію «За свабоду думкі» атрымаў вядомы музычны гурт

Адроджаная пасля перапынку прэмія дасталася гурту Naviband.

На імпрэзу, каб павіншаваць пераможцаў, завітала нацыянальная лідарка Святлана Ціханоўская. Яна прызналася, што Naviband — яе ўлюбёны гурт, які сярод іншага дапамог ёй прыйсці да беларушчыны.

Павялічыць

Быў на цырымоніі і Павел Латушка, хоць не выступаў. А дарадца Святланы Ціханоўскай Аляксандр Мілінкевіч выступіў і адзначыў:

«У Беларусі таксама вайна, не толькі ва Украіне. І што ж нам трэба зрабіць, каб перамагчы? Каб краіна адрадзілася, трэба не згубіць дух, не згубіць сілу волі. І таму адраджэнне прэміі з'яўляецца сімвалам».

Павялічыць

Мінскі інды-поп гурт Naviband быў створаны ў 2013 годзе, калі вакалісты Ксенія Жук і Арцём Лук’яненка выпадкова сустрэліся і вырашылі спяваць дуэтам.

У наступныя гады музыканты выступалі на буйных пляцоўках і фестывалях і станавіліся пераможцамі музычных нацыянальных конкурсаў у розных намінацыях. У 2017 годзе Naviband перамог у нацыянальным адборы на міжнародны конкурс «Еўрабачанне» з песняй «Гісторыя майго жыцця». Такім чынам песня на беларускай мове ўпершыню трапіла на «Еўрабачанне», дзе прайшла ў фінал.

Летам 2020 года гурт запісаў песню «Іншымі», прысвечаную тагачасным падзеям у Беларусі і асудзіў гвалт сілавікоў у дачыненні да мірных дэманстрантаў. Падчас пратэстаў музыкі выходзілі на маршы, запісвалі відэазвароты і выступалі на дваровых канцэртах. Восенню 2020 года музыкі эмігравалі ў Польшчу. 

Павялічыць

У гэтым годзе гурт выдаў вінілавую кружэлку «Песні пра дом», куды ўвайшлі сінглы 2020—2023 гадоў, а таксама стварыў шэраг новых сінглаў: «Прабач», «Сокал», «Арыён», «Мама».

Летам 2024 года кранальная песня «Мама», кавер на якую амаль адразу зрабіў Лявон Вольскі, стала адным з найбольш пазнавальных хітоў у беларускай музычнай прасторы. Цяпер гурт запісаў новы альбом і абяцае прэзентаваць яго восенню.

Павялічыць

Прэміяй «За свабоду думкі» імя Васіля Быкава ўзнагароджваюцца выбітныя творчыя асобы і грамадскія актывісты, якія адзначыліся сваёй дзейнасцю на карысць свабоднай Беларусі. Лаўрэатамі прэміі «За свабоду думкі» імя Васіля Быкава ў розныя гады станавіліся:

• Паэты і пісьменнікі: Рыгор Барадулін, Ніл Гілевіч, Уладзімер Арлоў, Уладзімер Някляеў.
• Літаратары і грамадскія дзеячы: Павал Севярынец.
• Мастакі: Алесь Пушкін, Алесь Марачкін.
• Краязнаўцы: Ада Райчонак, Алесь Белакоз.
• Музыкі і выканаўцы: Лявон Вольскі, Зміцер Вайцюшкевіч, бард і акцёр Віктар Шалкевіч.
• Рэжысёр: Валер Мазынскі.
• Прадпрымальнік і грамадскі дзеяч: Зміцер Дашкевіч.

• 22
• 2
• 0
• 0
• 0
• 0
• 0
• 6