Чалы: Хочацца сказаць словамі Марыі-Антуанэты — няма бульбы, няхай ядуць грэйпфруты і бананы
Аналітык Сяргей Чалы ў новым выпуску сваёй праграмы звярнуў увагу на абсурдную сітуацыю з гароднінай у Беларусі.
«Што тычыцца гародніны — мне здаецца, гэта ўжо нават не смешна, бо гэта нейкі зусім позні Савецкі Саюз.
Па тэлебачанні паказваюць бульбу. Калі МАРГ сапраўды, без жарту, у сваім тэлеграм-канале выкладае відэа пра тое, як яны наведалі «закрамы», то бок стабілізацыйныя фонды, знайшлі там добрую бульбу, нават паказалі яе людзям, але ў крамы яна чамусьці так і не трапіла».
Чалы адзначае, што сёння адзінай формай грамадзянскай актыўнасці становіцца магчымасць здымаць тыктокі пра якасць і кошт гародніны.
Прычым гавораць ужо не толькі пра бульбу, але і пра капусту і цыбулю. Ён звяртае ўвагу на дзіўны парадокс з цэнамі:
«Вось капуста: цэннік ёсць — рубель трыццаць, а капусты няма. А ў суседняй краме знайшлася капуста ўжо па чатыры рублі за кілаграм. То бок па рубель трыццаць няма, а па чатыры — ёсць. Як так атрымліваецца? Загадка».
Праз тое, што ў беларускіх крамах трэба яшчэ пашукаць звычайную бульбу і капусту, але лёгка знайсці экзатычныя фрукты, Сяргей Чалы іранізуе:
«Хочацца сказаць словамі Марыі-Антуанэты: як, у падданых няма хлеба? Няхай ядуць пірожныя — гэта ж значна смачней! Ежце грэйпфруты і бананы».
Чалы заўважае, што паводле пастановы, падпісанай прэм'ер-міністрам Аляксандрам Турчыным, дазволена павялічыць адпускныя цэны. З 17 красавіка па 15 мая будуць дзейнічаць павышаныя адпускныя і рознічныя цэны на гародніну. Максімальна дапушчальная адпускная цана на свежую бульбу (акрамя мытай) павялічана з 76 капеек да 1 рубля.
«Гэта, на хвілінку, на траціну, — заўважае Чалы. — У нас жа няма інфляцыі, праўда? Мы ж яе стрымліваем, стрымліваем, а потым — оп! — 30 працэнтаў.
І прычым, мяркуючы па цэнах, калі па 1,30 няма, а па 4 рублі ёсць, яе не на траціну, а прыкладна ў тры разы трэба павялічыць, каб бульба, нарэшце, з'явілася».
«Наша Нiва» — бастыён беларушчыны
ПАДТРЫМАЦЬЧыноўнікі МАРГ праверылі сховішчы з агароднінай і кажуць, што ўсё нармальна
Дэфіцыт гародніны: следам за капустай з крамаў прапала цыбуля
МАРГ: Бульба ў крамах ёсць, перажываць няма чаго
Ні бульбы, ні капусты. У многіх крамах знікла гародніна, на базарах цэны зашкальваюць
Каб набраць добрай, трэба пакорпацца. Новая рэвізія бульбяной прапановы ў крамах Мінска засведчыла сумны стан
Што адбываецца з бульбай у Беларусі і чаму яе стала менш у крамах. Рэч не толькі ў змяншэнні аб'ёмаў пасадак
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск77
Каментары