Паглядзелі, колькі просяць за арэнду лецішча недалёка ад Мінска. Ёсць варыянты ад 250 рублёў за месяц
Колькі каштуе арандаваць лецішча побач са сталіцай? Паглядзелі на варыянты ў розных цанавых дыяпазонах.
Да 150 даляраў
Аграгарадок Кастрычнік
Самы танны летні домік адносна недалёка ад сталіцы знаходзіцца ў аграгарадку Кастрычнік (гэта Лагойскі раён). Арандаваць на сезон яго можна за 250 рублёў (ці каля 80 даляраў) штомесяц. Як можна здагадацца па кошце, выглядае прапанова вельмі сціпла.
Гэта невялікая драўляная хатка. Унутры акуратна, але час быццам спыніўся мінімум гадоў трыццаць таму: старая мэбля, пацёрты дыван ды жырандолі, якія перажылі СССР. Ацяпленне, вядома, пячное. Вада на вуліцы, туалет, па старажытнай традыцыі, за межамі дома.
Плошча ўчастка 25 сотак.
Садовае таварыства «Ведрыца»
За 70 кіламетраў ад МКАД здаюць домік у садовым таварыстве «Ведрыца» (Чэрвеньскі раён). Адразу пазначым: гэта лецішча для тых, хто не пакатуе на клаўстрафобію, бо плошча будынка ўсяго 18 квадратаў. Пры гэтым пазначана, што жыць там могуць тры чалавекі.
Мэблі тут не адзін дзясятак гадоў.
Затое ўчастак 20 сотак, а побач лес і возера. У прапанове пазначана, што ёсць і лазня, але на фота яе не відаць.
Патэнцыйных арандатараў спрабуюць прывабіць тым, што да крамы ўсяго паўтара кіламетра, а аўталаўка прыязджае два разы на тыдзень.
Просяць за такое лецішча адносна няшмат — 272 рублі (ці каля 90 даляраў) штомесяц.
Вёска Крыжоўка
Дом за 450 рублёў (ці каля 150 даляраў) штомесяц выглядае ўжо надзейнейшым. Знаходзіцца ён у маляўнічай вёсцы Крыжоўка, да МКАД усяго 12 кіламетраў.
Плошча дома 43 квадраты, там тры пакоі. Вада сезонная, санвузел (калі драўляную будачку можна так назваць) на вуліцы. Затое ёсць бойлер.
Участак чатыры соткі, па фота бачна, што на ім ёсць дрэвы і вельмі шмат дзьмухаўцоў. Вось такі ландшафтны дызайн.
400-600 даляраў
Вёска Жукаў Луг
Да гэтай вёскі з мінскага Уручча ехаць усяго 5 кіламетраў. Тут прапануюць двухпавярховы дом з бярвення. Плошча 100 квадратаў. Ёсць каналізацыя, электрычнае ацяпленне і гарачая вада.
Тут тры спальні, гасцёўня і сталовая. А яшчэ ў самім доме знаходзіцца лазня.
Участак 5 сотак, на ім стаяць альтанка і мангал. Шмат пладовых дрэў і кустоў.
Арандаваць усё гэта можна за 1211 рублёў (ці 400 даляраў) штомесяц.
Садаводчае таварыства Зара-Плюс
Тут здаюць лецішча, якое пабудавалі ў 1991 годзе. Адчуваецца, што рабілі для сябе і ад душы. Двухпавярховы дом цагляны, яго плошча каля 100 квадратаў.
У пакоях чыста і акуратна. Мэбля не вельмі новая, але, пабачыўшы яе, плакаць не хочацца.
Прыбіральня знаходзіцца ўнутры дома, там адносна сучасны рамонт. Усталявана пральная машына.
Плошча ўчастку 5 сотак, ёсць гараж.
Здаюць такое лецішча ў арэнду за 1514 рублёў (ці 500 даляраў штомесяц).
Садаводчае таварыства Энергетык-1
Ехаць сюды са сталіцы на машыне ўсяго 10 хвілін, бо фактычна гэта прыгарад Мінска.
Арандаваць можна двухпавярховы цагляны дом, пабудаваны ў 2015 годзе. Плошча — 120 квадратаў.
У пакоях дыхтоўная мэбля эпохі нулявых і пузаты тэлевізар. Ацяпленне электрычнае (але можна і распальваць камін), газ з балону, каналізацыя ёсць.
У ванным пакоі ўсталявана даволі вялікая душавая кабіна (бойлер таксама ў наяўнасці).
Плошча ўчастку 5 сотак. Ёсць арэлі і зона барбекю, а таксама гараж.
Цана пытання — 1817 рублёў (ці 600 даляраў штомесяц).
«300 баксаў — за кватэру даваеннага часу?» Беларуска абурылася цэнамі на арэнду кватэр у Мінску
У Беларусі можна ўзяць у арэнду самую сапраўдную партызанскую зямлянку. Цана пытання?
Дзяўчына арандавала на дзень народзінаў замак пад Мінскам — і ўзарвала тыкток
Вядомая беларуская бізнэсвумэн — і жонка праўладнага блогера-мільённіка — шукае арандатараў для свайго катэджу. Кошт ваў!
Цяпер чытаюць
Шэсць фактаў пра Андрэя Шведа — былога генпракурора, які цяпер стаў старшынёй Вярхоўнага суда4
Каментары
па старажытнай традыцыі ))
"У пакоях дыхтоўная мэбля эпохі нулявых і пузаты тэлевізар."
)))