Еўрасаюз прыняў 17-ы пакет санкцыі супраць Расіі. У спісе і Мінскі завод колавых цягачоў
20 мая Еўрапейскі саюз прыняў новы пакет санкцый супраць Расіі за яе агрэсію супраць Украіны. Гэты пакет ужо 17-ы, і ў спіс падсанкцыйных устаноў гэтым разам трапіў і Мінскі завод колавых цягачоў (МЗКЦ).
Як адзначана ў афіцыйным дакуменце ЕС, Мінскі завод колавых цягачоў распрацоўвае вайсковую тэхніку для расійскай арміі і актыўна супрацоўнічае з расійскім абаронным сектарам. У 2024 годзе МЗКЦ экспартаваў у Расію 306 вагонаў з вайсковай тэхнікай, і пастаўкі працягваліся ў 2025 годзе. Такім чынам, завод аказвае матэрыяльную падтрымку расійскаму ўраду і яго вайскова-прамысловаму комплексу.
У прадстаўніцтве ЕС паведамілі, што новы пакет санкцый скіраваны на абмежаванне доступу Расіі да ключавых вайсковых тэхналогій і зніжэнне даходаў ад продажу энергарэсурсаў, якія фінансуюць вайну.
Акрамя гэтага, Еўрасаюз увёў меры супраць так званага «ценявога флоту» Расіі — суднаў, што перавозяць нафту ў абыход санкцый. У санкцыйны спіс дадалі 189 новых суднаў, агульная колькасць цяпер складае 342. Таксама санкцыі закранулі суднаходныя кампаніі і страхавальнікаў з ААЭ, Турцыі і Ганконга.
Дадаткова пад санкцыі трапілі буйныя расійскія энергетычныя кампаніі, як «Сургутнафтагаз», а таксама больш за 45 іншых кампаній і асоб, што падтрымліваюць расійскі ВПК. ЕС абмежаваў экспарт тэхналогій і дэталяў падвойнага прызначэння, якія выкарыстоўваліся для абыходу санкцый — у тым ліку дронаў і станкоў, нават праз кампаніі з Кітая, Ізраіля, Сербіі і іншых краін.
Новыя меры таксама закранаюць незаконнае выкарыстанне культурных і сельскагаспадарчых рэсурсаў Украіны на акупаваных тэрыторыях. У агульным ліку пад санкцыі трапілі 75 новых суб’ектаў, і цяпер іх колькасць перавышае 2400.
Цяпер чытаюць
Памёр палітвязень Валянцін Штэрмер. «Ледзь хадзіў пасля інсульту — а яго кінулі ў ШІЗА»3
Каментары
Теперь, Россия фрахтует суда белые, на том же Западе, и страхует по-белому у Западных, страховых компании, нет смысла по-чёрному, т.к. цена нефти ниже потолка и так.