Машына ўехала ў людзей падчас параду «Ліверпуля». Пацярпелі 47 чалавек, у тым ліку дзеці
У Ліверпулі аўтамабіль урэзаўся ў пешаходаў падчас святкавання перамогі футбольнага клуба «Ліверпуль» у англійскай Прэм’ер-лізе.
У бальніцы горада дастаўлены 47 чалавек, у тым ліку чацвёра дзяцей, паведаміў на брыфінгу позна ўвечары ў панядзелак прадстаўнік службы «хуткай дапамогі» Дэвід Кітчэн, піша Бі-бі-сі.
Паводле яго слоў, двое параненых (дарослы і дзіця) атрымалі сур’ёзныя траўмы.
Інцыдэнт адбыўся ў цэнтры Ліверпуля, дзе праходзіў традыцыйны парад: гульцы клуба, які перамог у чэмпіянаце Англіі па футболе, ехалі на адкрытым аўтобусе з кубкам у руках. Пасля заканчэння параду, калі людзі пачалі разыходзіцца, у натоўп урэзаўся аўтамабіль Ford.
Паводле слоў кіраўніка пажарна-выратавальнай службы графства Мерсісайд Ніка Сэрла, у выніку наезду чацвёра чалавек (трое дарослых і адно дзіця) апынуліся заціснутымі пад коламі аўтамабіля. Памочніца галоўнага канстэбля Джэні Сімс сказала на прэс-канферэнцыі, што некаторым пацярпелым (паводле звестак, іх было 20) дапамогу аказалі на месцы.
«Гэта адбылося прыкладна за тры метры ад нас, — распавёў брытанскаму агенцтву PA 48-гадовы Гары Рашыд, які прыйшоў на парад разам з жонкай і дзвюма маленькімі дачушкамі. — Машына выехала справа ад нас. Яна выскачыла проста з-за «хуткай дапамогі», якая там была прыпаркавана».
«Усё адбылося вельмі хутка, — дадаў мужчына. — Мая дачка пачала крычаць, на зямлі ляжалі людзі. Я бачыў людзей, што ляжалі без прытомнасці. Проста жах».
Карэспандэнт Бі-бі-сі, які апынуўся на месцы інцыдэнту, паведаміў, што сам ледзь не пацярпеў у выніку здарэння, а чалавек, што знаходзіўся за рулём аўтамабіля, падобна, не спрабаваў спыніцца.
«За машынай пагналася група мужчын, якія спрабавалі біць яе і кідалі ў яе розныя прадметы. Задняе шкло было цалкам разбіта, але яна не збіралася спыняцца», — кажа ён.
Аднак некаторыя сведкі кажуць, што чулі, як кіроўца аўтамабіля сігналіў, і частка людзей «змагла ўхіліцца».
«Але калі ён праязджаў, людзі, вядома, вельмі раззлаваліся, і яны пачалі бегчы за машынай. Задняе шкло ў яе ўжо было разбіта», — сказаў агенцтву РА 28-гадовы Мэцью О’Кэрал.
«Мы заклікаем людзей не займацца здагадкамі адносна абставін сённяшняга інцыдэнту, — гаварылася ў заяве паліцыі пасля інцыдэнту. — Працягваецца маштабнае расследаванне, падчас якога будуць устаноўлены ўсе абставіны, што прывялі да сутыкнення».
Прэм’ер-міністр Вялікабрытаніі Кір Стармер падзякаваў экстраным службам за хуткую рэакцыю і выказаў спачуванне пацярпелым. Ён назваў інцыдэнт жахлівым.
Цяпер чытаюць
Фатограф-агент з двума пашпартамі здымае беларусаў і іх мерапрыемствы ў Варшаве22
Каментары