Святлана Ціханоўская паведаміла пра змены ў сваёй камандзе: дарадца па эканоміцы Алесь Аляхновіч завяршыў працу ў Офісе па асабістых абставінах.
«Алесь Аляхновіч далучыўся да нашай каманды ў 2020 годзе і забяспечыў нашу працу па эканамічных пытаннях на прафесійным узроўні. Ён аб’яднаў больш за 60 вядомых эканамістаў з розных краін, каардынаваў працу з аналітычнымі цэнтрамі, дапамагаў распрацоўваць праграмы рэформаў — ад фінансавай стабільнасці да зялёнай эканомікі, працаваў над Стратэгіяй пераходу да Новай Беларусі. Зараз Алесь cыходзіць па асабістых абставінах. Я вельмі ўдзячная яму за пяць год сумеснай працы. І шчыра ўпэўнена, што яго досвед, прафесіяналізм і энергія будуць абавязкова выкарыстаны для развіцця эканомікі ў Новай Беларусі», — прыводзіць словы Ціханоўскай яе прэс-служба.
Аляхновіч сказаў, што для яго быў вялікі гонар быць карысным свайму народу ў складаны гістарычны момант: «Пяць гадоў вялікай адказнасці і складаных выклікаў, але і час натхнення — знаёмства з вялікім колам таленавітых людзей, ад якіх я шмат чаму навучыўся».
Ён падзякававаў калегам з Офіса і эканамічнай каманды, а таксама партнёрам, СМІ, дыяспарам, урадам і міжнародным інстытутам, з кім супрацоўнічаў.
«Разам нам удалося зрабіць нямала. Я ні на хвіліну не сумняюся, што праўда і перамога будуць за намі. Мы абавязкова пабачымся ў Новай Беларусі!» — дадаў ён.
На Канферэнцыі «Новая Беларусь» была прадстаўлена новая кіраўніца па эканоміцы і фінансах у Аб'яднаным пераходным кабінеце — Аліса Рыжычэнка.
Каментары
Што ты зрабіў для Беларусі за гэтыя 5 гадоў, апроч адкрыцця сумна вядомай АББЫ з самай прыгожай парай беларускай апазіцыі Гірын і Бурым? Колькі ГРОШАЙ ты прыцягнуў для беларусаў, як ты дапамог нашым бізнэсоўцам?