Вячаслаў Луцкін паставіў новы рэкорд, злавіўшы ў мінулыя выхадныя на Вілейскім вадасховішчы сома вагой у 44 кілаграмы, а даўжынёй — 1 метр 93 сантыметры. Мяркуецца, што гэта самая буйная рыба, калі-небудзь вылаўленая ў гэтых водах, піша Kraj.by.
Рыбачыць віляйчанін з дапамогай сучаснага абсталявання — сонара, які дазваляе бачыць рыбу ў рэжыме анлайн. См быў выяўлены на глыбіні 12 метраў. Паводле яго слоў, паляванне на гіганта вялі наўмысна на працягу трох тыдняў. Першая спроба скончылася няўдала — сом парваў снасці і ўцёк.
Але гэтым разам удача была на баку рыбака. Пераадолеўшы супраціў гіганта, ён з дапамогай жонкі Юліі змог зацягнуць яго ў лодку. Барацьба з трафеем доўжылася каля 40 хвілін, спінінг зламаўся на тры часткі.
— Адрэналін біў ключом! Лапатку звяло, спіна баліць, — успамінае Вячаслаў.
Вага сома аказалася настолькі вялікай, што магчымасці бязмена зашкалілі. Давялося разрэзаць рыбу і ўзважваць па частках. Адна толькі галава «монстра» пацягнула на 8 кілаграмаў. Паводле ацэнак рыбака, узрост сома складае ад 13 да 15 гадоў. Вячаслаў расказаў, што сомы не агрэсіўныя, за выключэннем перыяду нерасту, калі яны ахоўваюць гняздо.
— Падобна на белае мяса, вельмі смачнае. Частка ўлову пайшла на стэйкі, — рыбак адзначыў выдатныя смакавыя якасці рыбы.
Вячаслаў захапляецца рыбалкай з дзяцінства, гэта захапленне прышчапіў яму дзядуля. Апошнія два гады мужчына прысвячае любімай справе амаль увесь вольны час. Але гэта рыбалка, відавочна, застанецца ў яго памяці як самая яркая і эмацыйная.
Цяпер чытаюць
Затрыманы ў Польшчы беларускі таксіст-шпіён быў сябрам «Паспалітага рушэння»7
Каментары