Украінскі кінарэжысёр і сцэнарыст Алег Сянцоў, які ў 2014—2019 гадах быў палітычным зняволеным Крамля і абараняе Украіну з пачатку развязанай Расіяй у 2022 годзе поўнамаштабнай вайны, стаў камандзірам батальёна.
«У мяне дрэнныя для вас навіны: вайна заўтра не скончыцца, і паслязаўтра не скончыцца, і хутчэй за ўсё ў гэтым годзе не скончыцца», — сказаў ён на штогадовай канферэнцыі «Як нам завяршыць вайну» ў Кіеве. Ягоныя словы прыводзіць Інтэрфакс-Украіна.
У пачатку вайны Сянцоў пайшоў абараняць Кіеў у складзе тэрытарыяльнай абароны, затым улетку 2023 года атрымаў званне афіцэра і стаў камандзірам штурмавой роты 47-й брыгады. Некалькі разоў быў паранены.
Сянцоў адзначыў, што з 2022 года вайна моцна змянілася. «Мы бегалі пад Бахмутам з аўтаматамі ва ўвесь рост — ужо такой вайны няма.
Пяхота выжывае, сядзіць у норах і чакае таго, каб іх не паразілі FPV. Таксама і наш праціўнік: ніякіх ужо механізаваных штурмаў, ніякіх ужо брыгад, якія вось так ідуць, — інфільтрацыя, маленькія групы людзей», — апісаў рэжысёр.
«Яны цяпер крыху прасоўваюцца, але ўжо такіх тэмпаў няма. І калісьці настане дзень, калі мы спынім іх, і тады Пуцін задумаецца, ці ёсць сэнс рабіць нешта далей», — лічыць Сянцоў.
Ён дадаў, што адначасова важна працягваць ціснуць на Расію палітычна і эканамічна.
«Таму што другі этап заканчэння вайны — гэта не калі ўстане фронт, а калі ў Расіі зменіцца палітычны рэжым. Калі Расія прызнае гэтую вайну памылкай, калі Расія будзе гатовая аддаць нашу тэрыторыю, сказаць: мы былі мы не мелі рацыі, прабачце, будзем каяцца ўсё сваё жыццё. Гэта будзе для мяне перамога. Я веру, што гэты дзень настане», — заявіў Сянцоў.
Цяпер чытаюць
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі4
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары